To owhe agọe tọn lẹ mẹ, nuhahun akuẹzinzan tọn po hunyanhunyan otò tọn po sinyẹn deji taun to otò Vénézuéla tọn mẹ. Kunnudetọ de he nọ yin Edgar dọmọ: “To owhe vude poun gblamẹ, akuẹ po nutindo gbẹ̀mẹ tọn lẹ po masọ họakuẹ ba, bọ e taidi dọ mí sẹtẹn yì otò devo mẹ wẹ nkọ, dile etlẹ yindọ mí gbẹ́ pò to otò mítọn titi mẹ!”

 Etẹwẹ gọalọna Edgar nado diọda? E dọmọ: “Yẹn po asi ṣie Carmen po lẹnnupọndo apajlẹ mẹdehlan he sẹtẹn yì otò wamọnọ tọn mẹ lẹ tọn ji, bo plọn nado nọgbẹ̀ matin dandannu lẹ.” Ehe whàn mí nado hẹn gbẹzan mítọn bọawu bo kàn ayiha devo lẹ taidi nado nọ do jinukun lẹ bo wleawuna núdùdù mítọn titi.

 Amọ́, Edgar po Carmen po ma nọte do enẹ kẹdẹ ji. Yé dovivẹnu nado miọnhomẹna yisenọ hatọ lẹ kakajẹ mẹhe to ayimajai mẹ lẹ ji. (1 Tẹsalonikanu lẹ 5:11) Edgar dọmọ: “Gbọnvona dọ mí nọ miọhomẹna yé, mí tẹnpọn nado na tuli yé nado duvivi ayajẹ he alọgigọna mẹdevo he to hudo mẹ lẹ nọ hẹnwa tọn.”—Owalọ lẹ 20:35.

 To bẹjẹeji azọ̀n bẹplamẹ COVID-19 tọn, Argenis basi dide nado nọ dekunnuna hẹnnumẹ etọn lẹ. Delẹ to yé mẹ yigbe nado plọn Biblu gbọn alokan ji.

 Argenis sọ jlo dọ hẹnnumẹ emitọn he ma do Intẹnẹt lẹ ni duvivi plidopọ daho 2020 tọn. Kunnudetọ de he to tòpẹvi he sẹpọ yé de mẹ na yé hóyidokanji tito-to-whinnu lọ tọn. Enẹgodo, hẹnnumẹ Argenis tọn lẹ whé televiziọn daho de po zomọ gbèzeyiaga tọn de po nado pọ́n tito lọ. Whẹpo tito-to-whinnu lọ nado bẹ, Argenis tẹkan hlan yé bo hodẹ̀ bẹjẹeji tọn na yé. Na Argenis dovivẹnu vẹkuvẹku wutu, hẹnnumẹ etọn 4 gọna omẹ 15 devo lẹ penugo bo pọ́n tito lọ.

 Jairo po Johana po he yin asu po asi po de kẹdẹ wẹ tindo mọto to agun yetọn mẹ, enẹwutu yé nọ gbọn alọtútlú dali yí i zan nado gọalọna mẹdevo lẹ. Dopo to avùnnukundiọsọmẹnu he yé nọ pehẹ lẹ mẹ wẹ amì he vẹ́ taun to Vénézuéla. Jairo dọmọ: “Mí nọ tò na gànhiho susu, etlẹ yin ozán dopo blebu to whedelẹnu, nado sọgan jẹ amì.”

 Jairo mọdọ vivẹnudido yetọn nado gọalọna mẹdevo lẹ ma yin to ovọ́ mẹ. E dọmọ: “Whenue mí yí míde zan nado họ̀nú na mẹmẹsunnu lẹ, e nọ vivi na mí nado mọdọ yé yọ́n pinpẹn etọn bo nọ dopẹ́ e ma yin na mílẹ, amọ́ na Jehovah, mẹhe nọ na omẹ etọn lẹ nuhe yé do hudo etọn lẹpo.”—2 Kọlintinu lẹ 9:11, 14.

 Dile etlẹ yindọ Norianni yin mẹmẹyọnnu de he tindo owhe 28, e tindo numọtolanmẹ lọ dọ yè gán mọdọ emi gbẹ́ whè gbau nado gọalọna mẹdevo lẹ. Amọ́, e hia 1 Timoti 4:12 he dọmọ: “A dike mẹdepope yí nukunpẹvi do pọ́n jọja-yinyin towe gbede blo. Kakatimọ, lẹzun apajlẹ de na nugbonọ lẹ.”

 Wefọ enẹ whàn Norianni nado nọ yí whenu zan hẹ mẹhomẹ lẹ to agun etọn mẹ bo nọ gọalọna yé nado wleawuna wekanhlanmẹ lẹ to lizọnyizọn lọ mẹ bo tlẹ nọ basi oylọna yé nado hodo e yì plọnmẹ Biblu etọn lẹ. E sọ nọ tẹkan hlan yé bo nọ do hogbe tulinamẹ tọn lẹ hlan yé gbọn wekanhlanmẹ alokan ji tọn gblamẹ. Norianni dọmọ: “Jehovah ko dohia mi dọ nususu wẹ n’gán wà.”

 Avùnnukundiọsọmẹnu susu lẹ wẹ mẹmẹsunnu po mẹmẹyọnnu mítọn lẹ po to pipehẹ to Vénézuéla to ojlẹ awusinyẹn tọn ehelẹ mẹ. Etomọṣo, yé gbẹ́ hẹn zohunhun yetọn go to lizọnyizọn lọ mẹ bosọ yin “asisa homẹmiọnnamẹ tọn daho de” na ode awetọ.—Kolosinu lẹ 4:11; 2 Timoti 4:2.