Etẹwẹ Kọlilẹwa Klisti Tọn Zẹẹmẹdo?
Gblọndo Biblu tọn
Wefọ Owe-wiwe lẹ tọn susu wẹ dọho gando ojlẹ sọgodo tọn he mẹ Klisti na wá nado dawhẹna mẹhe to aigba ji lẹ te go. a Di apajlẹ, Matiu 25:31-33 dọmọ:
“To whenuena Visunnu gbẹtọ tọn [Jesu Klisti] na wá to gigo etọn mẹ po angẹli lẹpo po, to whenẹnu wẹ e na sinai to ofìn gigonọ etọn ji. Podọ akọta lẹpo na yin bibẹpli do nukọn etọn, bọ e na klan gbẹtọ lẹ dovo, yèdọ ode sọn awetọ go, kẹdẹdile lẹngbọhọtọ de nọ klan lẹngbọ lẹ sọn gbọgbọẹ lẹ go do. E nasọ bẹ lẹngbọ lẹ do adusilọ etọn mẹ, ṣigba gbọgbọẹ lẹ do amiyọn etọn mẹ.”
Ojlẹ whẹdida tọn ehe na yin apadewhe “nukunbibia daho” de tọn he ma ko jọ pọ́n to whenuho gbẹtọvi tọn mẹ. Nukunbibia enẹ na dekọtọn do awhàn Amagẹdọni tọn mẹ. (Matiu 24:21; Osọhia 16:16) Kẹntọ Klisti tọn lẹ he ewọ yijlẹdo gbọgbọẹ lẹ go to apajlẹ he e na lọ mẹ, “na jiya whẹdida yasanamẹ he yin vasudo madopodo tọn bo nasọ busẹ.” (2 Tẹsalonikanu lẹ 1:9; Osọhia 19:11, 15) To vogbingbọn mẹ, devizọnwatọ nugbonọ etọn lẹ he e yijlẹdo lẹngbọ lẹ go, na tindo todido nado “nọgbẹ̀ kakadoi.”—Matiu 25:46.
Whetẹnu wẹ Klisti na lẹkọwa?
Jesu dọmọ: “Na nuhe dù azán enẹ po gànmẹ lọ po, mẹdepope ma yọnẹn.” (Matiu 24:36, 42; 25:13) Ṣigba, e basi zẹẹmẹ “ohia” voovo he mí na mọ po nukun po delẹ tọn, ehe na dohia dọ ojlẹ he mẹ ewọ na lẹkọwa te lọ ko bẹjẹeji.—Matiu 24:3, 7-14; Luku 21:10, 11.
Be Klisti na wá to gbigbọ mẹ wẹ ya kavi to agbasalan mẹ?
Jesu yin finfọnsọnku do agbasa gbigbọnọ de mẹ, enẹwutu e na wá taidi nudida gbigbọnọ de, e ma yin po agbasa gbẹtọ tọn po gba. (1 Kọlintinu lẹ 15:45; 1 Pita 3:18) Abajọ Jesu do dọna apọsteli etọn lẹ to azán he jẹnukọnna okú etọn gbè dọmọ: “Whenu vude dogọ, aihọn ma nasọ mọ mi ba.”—Johanu 14:19.
Pọndohlan agọ̀ he gbayipe gando kọlilẹwa Klisti tọn go lẹ
Pọndohlan agọ̀: To whenue Biblu dọ dọ gbẹtọ lẹ na mọ Jesu dile e ‘ja to aslọ lẹ mẹ,’ ehe zẹẹmẹdo dọ Jesu na wá bọ yè na mọ ẹn po nukun po.—Matiu 24:30.
Nugbo lọ: Biblu nọ saba yí aslọ lẹ zan nado dlẹnalọdo nuhe yè ma sọgan mọ. (Levitiku 16:2; Osọha lẹ 11:25; Deutelonomi 33:26) Di apajlẹ, Jiwheyẹwhe dọna Mose dọmọ: “Yẹn ja dè we to aslọ titli de mẹ.” (Eksọdusi 19:9) Mose ma mọ Jiwheyẹwhe nukun sọ nukun. Mọdopolọ, Klisti ‘ja to aslọ lẹ mẹ,’ to linlẹn lọ mẹ dọ gbẹtọ lẹ na doayi wiwà etọn go mahopọnna dọ yé ma sọgan mọ ẹn nukun sọ nukun.
Pọndohlan agọ̀: Hodidọ lọ “nukun lẹpo wẹ na mọ ẹn,” he tin to Osọhia 1:7 mẹ he dọho gando wiwá Klisti tọn go, dohia dọ yè na mọ ẹn po nukun po.
Nugbo lọ: To whedelẹnu, hogbe Glẹkigbe tọn lẹ he yin lilẹdo “nukun” po “mimọ” po to Biblu mẹ, nọ zẹẹmẹdo nado doayi nude go kavi nado mọnukunnujẹ nude mẹ, e ma yin nado mọ nulọ po nukun po gba. b (Matiu 13:15; Luku 19:42; Lomunu lẹ 15:21; Efesunu lẹ 1:18) Biblu dọ dọ Jesu he yin finfọnsọnku wẹ “omẹ lọ he . . . nọ nọ̀ hinhọ́n he ma yọ́n dọnsẹpọ mẹ, mẹhe gbẹtọ depope ma . . . sọgan mọ.” (1 Timoti 6:16) Enẹwutu, hodidọ lọ “nukun lẹpo wẹ na mọ ẹn,” zẹẹmẹdo dọ gbẹtọ lẹpo wẹ na doayi e go dọ Jesu wẹ mẹhe na hẹn whẹdida Jiwheyẹwhe tọn ṣẹ.—Matiu 24:30.
Pọndohlan agọ̀: Nuhe 2 Johanu 7 dọ lẹ dohia dọ Jesu na lẹkọwa to agbasalan mẹ.
Nugbo lọ: Wefọ Biblu tọn enẹ dọmọ: “Na mẹklọtọ susu wẹ ko sọawuhia to aihọn mẹ, yé he ma yigbe dọ Jesu Klisti wá to agbasalan mẹ lẹ.”
To azán apọsteli Johanu tọn lẹ gbè, mẹdelẹ ma kẹalọyi dọ Jesu ko wá nọ aigba ji pọ́n to agbasalan mẹ taidi gbẹtọ. Omẹ enẹlẹ nọ yin yiylọdọ Gnostiques lẹ. Johanu kàn nuhe to wefọ 7tọ ehe mẹ lẹ nado jẹagọdo linlẹn lalo yetọn enẹ.
A Gán Sọ Pọ́n Hosọ Ehelẹ
GBLỌNDO NA KANBIỌ SINAI DO BIBLU JI LẸ
Etẹwẹ Awhàn Amagẹdọni Tọn Zẹẹmẹdo?
Whladopo gee wẹ hogbe lọ “Amagẹdọni” yin mimọ to Biblu mẹ, amọ́ Owe-wiwe lẹ basi zẹẹmẹ awhàn wunmẹ he e nọtena tọn.
NUPLỌNMẸ TANGAN BIBLU TỌN LẸ
Ahọluduta Jiwheyẹwhe Tọn Jẹ Gandu Ji to 1914
To owhe 2 600 linlán die, Jiwheyẹwhe gbọdo ahọlu huhlọnnọ de nado kudlọ dọdai de tọn he to hẹndi mọ to alọnu.
NUHE BIBLU PLỌN MÍ
Tẹ́n Tito Biblu Pinplọn Tọn Mítọn Pọ́n
A gán plọnnu vọnu hẹ mẹplọntọ de nukun sọ nukun nado mọ ayinamẹ sinai do Biblu ji lẹ yí.