Biblu basi zẹẹmẹ nujijọ po ninọmẹ delẹ po tọn he na dohia dọ “vivọnu titonu [ehe] tọn,” kavi “opodo aihọn tọn” ko sẹpọ. (Matiu 24:3; Biblu Wiwe lọ—Gun Alada) Biblu ylọ ojlẹ ehe dọ “azán godo tọn lẹ” kavi ‘ojlẹ opodo tọn.’ (2 Timoti 3:1; Daniẹli 8:19) Nujijọ ayidego tọn delẹ die he dọdai lẹ dọ dọ yé na wá aimẹ to azán godo tọn lẹ, kavi ojlẹ opodo tọn lọ mẹ:

•   Awhàn to fisusu.—Matiu 24:7; Osọhia 6:4.

•   Núdùdù whèdomẹ.—Matiu 24:7; Osọhia 6:5, 6.

•   Aigba sisọsisọ daho lẹ—Luku 21:11.

•   Azọ̀nylankan, kavi azọ̀n bẹplamẹ sinsinyẹn lẹ.—Luku 21:11.

•   Jideji sẹ́nhẹngba tọn.—Matiu 24:12.

•   Husudo aigba tọn gbọn gbẹtọvi lẹ dali.—Osọhia 11:18.

•   Doyiyi walọ dagbe tọn, dile susu gbẹtọvi lẹ tọn na yin “mayọndagbenọ, nugbomadọtọ, . . . gbigbọ gbekọndopọ tọn matindotọ, mẹhẹngbletọ, wazẹjlẹgonọ, kanylantọ, owanyi dagbewà tọn matindotọ, mẹdehiatọ, tasinyẹntọ, mẹhe nọ gbọn kikla dali yigo.”—2 Timoti 3:1-4.

•   Gbakija whẹndo tọn, na gbẹtọ lẹ na yin “owanyi jọwamọ tọn matindotọ” bọ ovi lẹ na yin “tolivẹ do mẹjitọ lẹ go tọ́.”—2 Timoti 3:2, 3.

•   Owanyi he mẹsusu tindo na Jiwheyẹwhe na miọn.—Matiu 24:12.

•   Yẹnuwiwa na gbayipe to sinsẹ̀nnọ lẹ ṣẹnṣẹn.—2 Timoti 3:5.

•   Nukunnumọjẹnumẹ gando dọdai Biblu tọn lẹ go na jideji, etlẹ yin dehe gando azán godo tọn go lẹ.—Daniẹli 12:4.

•   Yẹwheho wẹndagbe Ahọluduta lọ tọn na yin didọ lẹdo aihọn pé.—Matiu 24:14.

•   Mẹsusu ma na nọ do ojlo hia bo na tlẹ nọ yí nukunpẹvi do pọ́n kunnudenu he dohia dọ opodo lọ ko sẹpọ lẹ.—Matiu 24:37-39; 2 Pita 3:3, 4.

•   Dọdai ehe lẹpo na mọ hẹndi do zẹnzẹn, e ma yin vude kavi suhugan yetọn wẹ na mọ hẹndi poun gba.—Matiu 24:33.

Be “azán godo tọn lẹ” mẹ wẹ mí to gbẹnọ te ya?

 Mọwẹ. Ninọmẹ aihọn tọn po todohukanji ojlẹ hihia Biblu tọn po dohia dọ azán godo tọn lẹ ko bẹjẹeji sọn 1914. To owhe enẹ mẹ, Ahọluduta Jiwheyẹwhe tọn jẹ gandu ji to olọn mẹ, podọ dopo to onú tintan he e yiwà lẹ mẹ wẹ nado yàn Satani Lẹgba po aovi etọn lẹ po sọn olọn mẹ bo hẹn ẹn diun dọ aigba kẹdẹ ji wẹ yé gán yinuwa te. (Osọhia 12:7-12) Pọndohlan po walọyizan gbẹtọvi lẹ tọn po he fọ́n bo to yinylan deji bosọ to azán godo tọn ehelẹ hẹn zun “ojlẹ awusinyẹn tọn he vẹawu nado pehẹ lẹ” yin kunnudenu de dọ Satani to nuyiwa do yé ji taun.—2 Timoti 3:1.