nahin! hazaron saal se bible ki nakal aisi cheezon par utari jaa rahi hai jo kharab ho jaati hain. fir bhi agar hum aaj ki bible ki tulna purani hastlipiyon se karein, to hamein pata chalega ki bible vaisi-ki-vaisi hai.

bible ki hazaron purani hastlipiyaan paayi gayi hain. kuch hastlipiyaan ek-doosre se mel nahin khaatin, jisse pata chalta hai ki nakal utarte vakt thodi-bahot galtiyaan hui thi. inmein se zyadatar galtiyaan chhoti-moti hain jinse likhi hui baaton ka matlab nahin badla. lekin kuch galtiyon ko nazarandaz nahin kiya jaa sakta. in hastlipiyon mein yah chhedkhani jaanboojhkar ki gayi thi taaki bible ka sandesh badal jaaye. aaiye iske do udahranon par gaur karein:

1. kuch bibalon mein 1 yuhanna 5:7 mein ye shabd bhi paaye jaate hain, “swarg mein, pita, vachan aur pavitra aatma, ye teenon ek hain.” lekin jin hastlipiyon par bharosa kiya jaata hai, unmein ye shabd nahin paaye jaate jisse saabit hota hai ki ye shabd mool paath mein bhi nahin the balki inhein baad mein joda gaya tha. * isliye aaj ke zamane ki kai jaani-maani bibalon mein ye shabd nahin jode gaye.

2. parmeshvar ka naam bible ki purani hastlipiyon mein hazaron baar aaya hai. fir bhi bible ke kai anuvadon mein se yah naam hatakar “prabhu” ya “parmeshvar” jaisi upadhiyaan daal di gayin.

aaj ki taareekh mein bible ki itni saari hastlipiyaan paayi gayi hain ki agar kisi mein koi galti ho bhi, to use aasani se pakda jaa sakta hai. * in hastlipiyon ko ek-doosre se milakar dekhne par yah kaise saabit hua ki aaj hamare paas jo bible hai woh bilkul sahi hai?

• ibrani shastra ke paath ke baare mein, jise aksar “purana niyam” bhi kaha jaata hai, vidvan william h. green ne kaha: “hum poore daave ke saath keh sakte hain ki aisi koi aur pracheen kitab nahin jise bina kisi ferbadal ke hum tak sahi-sahi pahunchaya gaya ho.”

• maseehi yoonani shastra ke baare mein, jise aksar “naya niyam” kaha jaata hai, bible ke vidvan f. f. bruce ne likha, “purane zamane ke mashhoor lekhakon ki aisi kai rachnayen hain jinki sachchai par saval uthane ke baare mein koi sapne mein bhi nahin sochta, magar un rachnaon ke mukable hamare naye niyam ki kitabon ke sach hone ke saboot kahin zyada hain.”

• bible ki hastlipiyon ke ek jaane-maane vidvan sir fredric kenyon ne kaha, “bible ke baare mein koi bhi bina kisi hichkichahat ke, bedhadak bol sakta hai ki uske haath mein parmeshvar ka sachcha vachan hai. sadiyon purani yah kitab hum tak bina kisi milavat ke pahunchi hai, peedhi-dar-peedhi iske sandesh mein koi badlav nahin ho paaya.”

• yahoodi aur maseehi nakalnaveeson ne bible ke mool paath mein darz un kisson ki bhi nakal utari, jinmein parmeshvar ke logon ki badi-badi galtiyaan batayi gayi thi. * (ginti 20:12; 2 shamooel 11:2-4; galatiyon 2:11-14) unhonne aise kisson ko nahin nikala jinmein yahoodi raashtra ko unki bagavat ke liye aur unki banayi paramparaon ke liye fatkara gaya tha. (hoshe 4:2; malaki 2:8, 9; matti 23:8, 9; 1 yuhanna 5:21) is tarah ke kisson ki sahi-sahi nakal utaarkar, in nakalnaveeson ne saabit kiya ki woh parmeshvar ke vachan ki kadar karte hain aur unhonne apna kaam imandari se kiya hai.

• jis parmeshvar ne bible ko apni prerna se likhvaya, kya woh ismein koi ferbadal hone dega? * (yashayah 40:8; 1 patras 1:24, 25) usne apna vachan sirf beete zamane ke logon ke liye nahin, balki hamare liye bhi likhvaya tha taaki hum bhi isse faayda paayen. (1 kurinthiyon 10:11) bible khud bhi kehti hai, “jo baatein pehle se likhi gayi thi, woh isliye likhi gayin ki hum unse seekhein aur shastra se hamein dheeraj dharne mein madad mile aur hum dilasa paayen taaki hamare paas aasha ho.”—romiyon 15:4.

• yeeshu aur uske shishya bhi ibrani shastra ki hastlipiyon se bedhadak sikhate the, kyonki unhein poora yakeen tha ki inmein likhi baatein ekdam sahi hain.—luka 4:16-21; preshiton 17:1-3.