Ang pag-renovate nakaiskedyul nga sugdan sa Hunyo 2022. Himuon ini sa apat ka panalgan nga bilding nga mangin dugang nga ilistaran kag opisina para sa Angola branch. Subong, ang 207 ka miembro sang pamilya Bethel gutok na sa branch, nga nahuman sang 2003.

Kinahanglan ang dugang nga ilistaran kay ang iban nga miembro sang pamilya Bethel nagaistar sa ginaarkilahan nga mga balay. Ini nga bilding ginbakal sang mga utod sang Disiembre 2021. Puede lang ini malakat halin sa branch office.

Ini nga bilding himuan sang 57 ka kuarto kag 60 ka opisina. Ang mga kuarto butangan sang opisina, kag ang mga opisina gindesinyo nga may mga division ukon cubicle ukon sirado gid. Ining bag-o nga bilding butangan man sing conference room kag multipurpose room. Ang dingding sang mga opisina puede makakas, ma-install liwat, kag masaylosaylo depende sa kinahanglan.

Ang mga miembro sang pamilya Bethel nga nagaistar sa gin-arkilahan nga mga balay magasaylo sa sini nga bilding sa Pebrero 2024.

“Nagapangamuyo kami kag nagapanghikot upod sa Worldwide Design/Construction para mapangitaan sing solusyon ang kagutok sa branch,” siling ni Samuel Campos, nga miembro sang Branch Committee sa Angola. “Ang pagbakal kag pag-renovate sini nga bilding amo ang sabat sa amon mga pangamuyo kay Jehova.”

May ara sobra 160,000 ka manugbantala sa Angola. Sobra 400,000 ang nag-attend sa Memoryal sang nagligad nga tuig, kag sobra 200,000 ang gina-Bible study. Nagasalig kita nga pakamaayuhon gid ni Jehova ang pag-renovate sining bag-o nga pasilidad sang branch kay makabulig ini sa padayon nga pag-uswag sang hilikuton sang Ginharian.—1 Cronica 29:16.