Sugod pa sang 1956, may mga Saksi ni Jehova na sa Kyrgyzstan kag narehistro sila sang 1998. Bisan pa nakaeksperiensia sila sang grabe nga pagmaltrato kag wala ginrespeto ang ila kahilwayan sa relihion sang una, ginaproteksionan na subong sang pungsod ang ila mga kinamatarong.

Sang Nobiembre 2013, ang tanan nga judge sang Constitutional Chamber of the Supreme Court nag-ugyunay sa desisyon parte sa kasuguan sa alternative service. Nakita nila nga supak sa konstitusyon ang kasuguan sa alternative service kag ginmanduan nila ang gobierno nga bag-uhon ini. Ginsunod sang mga korte sang Kyrgyzstan ang desisyon sang Constitutional Chamber, kag sugod sang una nga mga binulan sang 2014, ang mga Saksi wala na ginakasuhan kon magpangindi sila nga magsoldado. Sang Hunyo 29, 2015, ginbag-o sang Kyrgyzstan ang ila kasuguan sa military service para hatagan sang alternative civilian service nga indi kontrolado sang militar ang mga nagpangindi nga magsoldado bangod sa konsiensia.

Sang Septiembre 2014, nagdesisyon ang Constitutional Chamber of the Supreme Court pabor sa mga Saksi ni Jehova kag sa kahilwayan sa relihion, sang gindeklarar sini nga supak sa konstitusyon ang pila ka bahin sang kasuguan sang 2008 parte sa relihion. Pero, ginbalewala sang State Committee on Religious Affairs ang desisyon sang Korte kag wala sini ginrehistro ang lokal nga relihioso nga mga organisasyon sang mga Saksi ni Jehova sa bagatnan nga mga rehiyon sang pungsod. Bangod sini, ginakabig sang iban nga awtoridad nga ilegal ang hilikuton sang mga Saksi. Pero, kon magpakigkita ang mga Saksi sa mga opisyal para klaruhon ang mga isyu, ginatugutan man sila dayon nga magtipon kag magsugid sang ila mga pagpati sa iban. Nagalaum ang mga Saksi nga ipatuman sing bug-os sang gobierno ang desisyon sang Constitutional Chamber kag irehistro ang lokal nga relihioso nga mga organisasyon sa bagatnan sang Kyrgyzstan.