DISIEMBRE 25, 2020
UNITED STATES
Napabakod ang mga Priso sang Mensahe Halin sa Biblia Bisan Pa May Lockdown
Bangod sa COVID-19 nga pandemic, gindumilian ang pagbisita sa mga priso sa bilog nga United States. Gani ang ginatos ka mga Saksi ni Jehova nga regular nga nagakadto sa prisuhan para magdala sang mga literatura nga base sa Biblia kag mag-Bible study, indi naman makakadto sa prisuhan. Buot silingon linibo ka mga priso ang indi na makatuon parte kay Jehova. Pero ang aton mga kauturan nangita sing paagi para matudluan gihapon sing Biblia ang mga priso samtang ginasunod nila ang mga safety protocol nga ginapatuman bangod sa COVID-19.
“May mga priso nga nagahulat gid sa amon kay gusto gid nila maintiendihan ang Biblia,” siling ni Brother Dan Houghton, nga nagadumala sang pagbantala sa mga prisuhan sa United States. “Mas kinahanglan gid nila kita subong.”
Halimbawa, ginkontak ni Brother Micah Seierstad ang mga opisyal sang prisuhan sa Vacaville, California. Ginpamangkot niya sila kon bala puede kita makapadala sang mga video halin sa JW Broadcasting para ipatan-aw sa mga priso. Nakibot sia sang ginhambalan sia sang mga opisyal nga puede sia makapadala sing mga video nga ipagua nila sa 33 ka prisuhan sa California. Bangod sini, ang 2020 “Magkasadya Pirme” nga Kombension gintungatunga sa tig-28 minutos nga mga seksion kag ginapatan-aw sa mga 130,000 ka priso sing tatlo ka beses kada adlaw.
Si Brother Seierstad nagsiling: “Dalayawon gid ang mahimo ni Jehova. Kon may gusto sia himuon, wala gid sing makapugong sa iya!”
Nabalitaan sang aton mga kauturan nga gusto sang mga opisyal sang prisuhan sa Sarasota County Jail sa Florida, nga hatagan sing makapalig-on nga mga libro ang mga priso para maghaganhagan ang ila stress sa sining panahon sang lockdown. Gani ang aton mga kauturan nagtanyag nga magadala sila sang sarisari nga publikasyon nga nabase sa Biblia sa English kag Spanish. Nagpasugot ang mga opisyal. Nagsiling man ang mga kauturan nga puede sila maka-Bible study sa mga priso paagi sa videoconference. Ang isa ka priso nga naga-Bible study paagi sa videoconference, nagsulat sa naga-study sa iya: “Eksayted gid ’ko sa aton pag-Bible study. Napalig-on ako nga basahon ang Biblia. Nagbag-o gid ang akon pagtan-aw sa palaabuton.”
Ginkuha sang mga opisyal sang Sarasota County Jail ang 70 ka Biblia sa English kag Spanish kag ang 30 ka publikasyon nga base sa Biblia sa balay ni Brother Manolo Rodriguez. Ginabuligan sila ni Brother Manolo Rodriguez sa pagkarga sang mga literatura sa ila salakyan
Nalipay kita nga bisan ang pandemic kag prisuhan, indi makapugong sa aton Amay sa langit nga si Jehova, nga buligan ang mga tawo nga gusto magtuon parte sa iya.—Salmo 139:7-10.
