Sang 1960, sa sulod man kag sa gua sang pungsod, nagadamo pa gid ang nagapamatok sa pagginahom ni Trujillo. Bisan pa sini, nagbisita sa pungsod si Milton Henschel halin sa ulong talatapan kag nagtambong sa tatlo ka adlaw nga asembleya sang Enero 1961. May 957 nga nagtambong sa pamulongpulong publiko, kag 27 ang nabawtismuhan. Sa tion sang iya pagbisita, ginbuligan ni Brother Henschel ang mga kauturan nga maorganisar liwat ang hilikuton kag kon paano matuptupan ang teritoryo.

Ang duha ka manugtatap sang sirkito nga sanday Enrique Glass kag Julián López, gin-asayn sa pagduaw sa mga kongregasyon. “Sakop sang akon sirkito,” siling ni Julián, “ang duha ka kongregasyon sa sidlangan sang pungsod kag ang tanan nga kongregasyon sa aminhan. Ang sakop naman sang sirkito ni Enrique amo ang iban nga kongregasyon sa sidlangan kag ang bug-os nga bagatnan.” Paagi sini nga mga pagduaw, nakapakig-angot liwat ang mga kongregasyon sa organisasyon kag napabakod ang espirituwalidad sang mga kauturan.

Sanday Salvino kag Helen Ferrari, nga naggradwar sa ikaduha nga klase sang Gilead, nag-abot sang 1961. Ang ila eksperiensia subong mga misyonero sa Cuba nakabulig gid sa daku nga espirituwal nga pagpangani sa Dominican Republic. Sang ulihi, si Salvino nag-alagad subong katapo sang Komite sang Sanga tubtob napatay sia sang 1997. Si Helen naman 79 ka tuig na nga ara sa bug-os tion nga pag-alagad, nga ang kalabanan sini bilang misyonero.

Wala madugay sang nakaabot ang mga Ferrari, natapos ang mapintas nga pagginahom ni Trujillo sang gab-i sang Mayo 30, 1961, sang ginpaarakan sang bala ang iya  salakyan. Pero, ang iya pagkapatay wala nagresulta sa kahim-ong sa pulitika. Padayon nga nakaeksperiensia ang pungsod sing kinagamo sang mga pumuluyo kag sa pulitika sa sulod sang pila ka tuig.

Madamo pa nga misyonero ang nag-abot sa pungsod. Si William Dingman sa una nga klase sang Gilead kag ang iya asawa nga si Estelle upod sanday Thelma Critz kag Flossie Coroneos, ginsaylo sa Dominican Republic halin sa Puerto Rico duha pa lang ka adlaw sa tapos nga ginpatay si Trujillo. “Magamo gid ang pungsod sang pag-abot namon,” siling ni William, “kag masako ang mga militar. Ginakahadlukan nga basi magrebolusyon ang mga tawo, kag ginarekisa sang mga soldado ang tanan nga nagaagi sa haywey. Ginapapundo kami sa mga checkpoint, kag ginausisa ang amon mga dala. Ginapagua ang tanan nga unod sang amon mga maleta, bisan ang pinakagamay nga butang.” Mabudlay gid ang pagbantala sa sining makatalagam nga kahimtangan sa pulitika.

“Sa tion sang pagginahom ni Trujillo,” siling ni William, “ginsilingan ang publiko nga ang mga Saksi ni Jehova mga Komunista kag sila ang pinakamalain nga sahi sang tawo. . . . Pero, amat-amat nga napabag-o namon ang sayop nga pagpati.” Bangod nagpadayon ang hilikuton, madamo nga sinsero nga indibiduwal ang nagbaton sa mensahe sang Ginharian. Sa katapusan nga bahin sang 1961 nga tuig sang pag-alagad, may 33 ka espesyal payunir sa pungsod.