Sa pila ka higayon sa ministeryo ni Jesus, ginpadaku niya nga importante ang pagpaubos. (Lucas 14:8-11) Nalipay sia nga makakita sang mga tawo nga gusto mag-alagad sa Dios sing mapainubuson. Ang pila sa ila mahimo kilala pa nga makasasala.

Natalupangdan sang mga Fariseo kag mga escriba nga ini nga mga indibiduwal—ang mga ginakabig nila nga indi takus—amo ang nagapalapit kay Jesus kag sa iya mensahe. Nagreklamo sila: “Ini nga tawo nagabaton sa mga makasasala kag nagakaon upod sa ila.” (Lucas 15:2) Nagabatyag ang mga Fariseo kag mga escriba nga superyor sila kag gintratar nila ang ordinaryo nga mga tawo nga daw higko nga ila ginatapakan. Bangod ginapakanubo nila ini nga mga tawo, gingamit sang mga lider ang Hebreo nga ekspresyon nga ‛am ha·’aʹrets, “mga tawo sang duta,” para patuhuyan sila.

Pero, gintratar ni Jesus ang tanan nga may dignidad, kaayo, kag kaluoy. Gani madamo sang mga kubos, lakip ang kilala nga mga makasasala, ang gusto mamati kay Jesus. Pero ano ang ginbatyag kag reaksion ni Jesus sa pagpakalain sa iya kay ginabuligan niya ining mga kubos?

Maathag ang sabat sang ginpresentar niya ang isa ka makatalandog nga ilustrasyon, nga pareho sa isa nga ginhatag niya sang nagligad sa Capernaum. (Mateo 18:12-14) Ginpresentar ini ni Jesus sa paagi nga ang mga Fariseo daw matarong kag yara sa panong sang Dios. Sa kabaliskaran, ang kubos nga mga tawo amo ang mga nagtalang kag nadula. Si Jesus nagsiling:

“Sin-o sa inyo nga may 100 ka karnero, nga kon madula ang isa, ang indi magbiya sang 99 sa kamingawan kag pangitaon ang isa nga nadula tubtob makita niya ini? Kag kon makita niya ini, pas-anon niya ini kag magkalipay sia. Kag sa iya pagpauli, tawgon niya ang iya mga abyan kag mga kasilingan, kag silingan sila, ‘Magkalipay kamo upod sa akon, kay nakita ko ang akon karnero nga nadula.’”—Lucas 15:4-6.

Paano ini ginpaathag ni Jesus? Nagsiling sia: “Sing kaanggid, nagasiling ako sa inyo, may daku pa nga kalipay sa langit tungod sa isa ka makasasala nga nagahinulsol sangsa 99 ka matarong nga indi kinahanglan maghinulsol.”—Lucas 15:7.

Ang pagsambit ni Jesus sang paghinulsol dapat magtandog sa mga Fariseo. Ginkabig nila ang ila kaugalingon nga matarong kag nagbatyag sila nga indi sila dapat maghinulsol. Sang ang pila sa ila nagpakalain kay Jesus mga pila ka tuig ang nagligad kay nagkaon sia upod sa mga manugsukot sing buhis kag mga makasasala, nagsabat sia sa ila: “Wala ako nagkari sa pagtawag sa mga matarong, kundi sa mga makasasala.” (Marcos 2:15-17) Ang nagapakamatarong sa kaugalingon nga mga Fariseo wala makahangop nga dapat sila maghinulsol,  amo kon ngaa wala sila makahatag sing kalipay sa langit. Kabaliskaran ang nagakatabo kon ang mga makasasala maghinulsol gid.

Sa pagpadaku sang iya punto nga ang pagbalik sang nadula nga mga makasasala nagahatag sang daku nga kalipay sa langit, nagpresentar si Jesus sang isa pa ka ilustrasyon nga natabo sa isa ka puluy-an: “Sin-o nga babayi nga may napulo ka sensilyo nga drakma, nga kon madula ang isa ka drakma, ang indi magsindi sang suga kag magsilhig sang iya balay kag magpangita sing maayo tubtob makita niya ini? Kag kon makita niya ini, tawgon niya ang iya mga abyan kag mga kasilingan kag silingan sila, ‘Magkalipay kamo upod sa akon, kay nakita ko na ang akon nadula nga drakma.’”—Lucas 15:8, 9.

Ang leksion nga gintudlo ni Jesus pareho sa gintudlo niya sang ginsugid niya ang ilustrasyon parte sa nadula nga karnero. Nagsiling sia: “Sing kaanggid, nagasiling ako sa inyo, nagakalipay ang mga anghel sang Dios tungod sa isa ka makasasala nga nagahinulsol.”—Lucas 15:10.

Hunahunaa, ang mga anghel sang Dios interesado gid sa pagbalik sang nadula nga mga makasasala! Importante gid ini kay ang mga makasasala nga naghinulsol kag may bahin sa langitnon nga Ginharian sang Dios may mas mataas nga posisyon sangsa mga anghel mismo! (1 Corinto 6:2, 3) Pero wala mahisa ang mga anghel. Gani ano dapat ang batyagon naton kon ang isa ka makasasala mahinulsulon nga magbalik sa Dios?