SANG 2010, halos 800 milyones ka litro sang krudo ang naula sa Gulf of Mexico sang maglupok kag maglugdang ang makinaryas nga gingamit sa pagkuha sang krudo. Pero sa pila lang ka bulan wala na ang naglapta nga mga krudo. Ngaa?

Binagbinaga: Ginapakita sang research sang mga sientipiko nga madamo sing bakterya sa dagat nga nagatunaw sa mga molekula sang karbon nga yara sa langis. Si Propesor Terry Hazen, nga isa ka mikrobiologo naglaragway sa sini nga mga organismo subong “nagatarget sing langis nga mga missile.” Ini nga mga organismo nakabulig sa pagtinlo sa Gulf of Mexico, nga ginsambit sa umpisa.

“Indi na kita makibot nga ang mga dagat dapat may palakaon sing langis nga mga mikrobyo,” siling sang report sang BBC sa sini nga topiko. Kay man, halin pa sang una “kinaugali na nga may nagagua nga langis sa salog sang dagat.”

Ibutang ta nga nagmadinalag-on ang mga tawo sa pagtinlo sa nagalapta nga mga langis sa dagat. Pero ang pagtinguha nila nga tinluan ini mahimo magresulta sing kapin nga halit sangsa kaayuhan. Ang mga kemikal nga ginagamit nagaupang sa kinaugali nga proseso sa pagtinlo sang langis. Isa pa, ina nga mga kemikal makahililo kag madugay madula ang malain nga epekto sini sa palibot. Apang ang ikasarang sang kinaugali nga tinluan ang mga langis, lakip na ang palakaon sing langis nga mga mikrobyo, nagabulig sa dagat nga tinluan ang kaugalingon sini nga wala sing malain nga mga epekto pareho sang artipisyal nga pamaagi. *

Ano sa banta mo? Ang ikasarang bala sang mikroorganismo sa pagtinlo sang langis resulta sang ebolusyon? Ukon gindesinyo ini?