Sang ginpasulod sa isa ka balay ang duha ka payunir sa Kenya, nakibot sila sang nakita nila ang isa ka gamay nga tawo nga nagahigda sa katre. Gamay katama ang iya lawas kag malip-ot ang iya mga butkon. Sang ginsugid nila sa iya ang saad sang Dios nga “ang piang magalumpat subong sang usa,” nagyuhum gid ang tawo.—Isa. 35:6.

Nahibaluan sang mga payunir nga si Onesmus, nga malapit na lang karon mag-40 anyos, natawo nga may osteogenesis imperfecta, ukon gabok ang iya tul-an. Tuman ini ka gabok, amo nga bisan gamay lang nga hulag nagakaligto ini. Bangod wala ini sing bulong ukon pamaagi nga mag-ayo, ginpaabot ni Onesmus nga magaantos sia sa bilog niya nga kabuhi kag magagamit na lang sing wheelchair.

Ginbaton ni Onesmus ang pagtuon sa Biblia. Pero indi sia pagpasugtan sang iya iloy nga magtambong sa mga miting, kay basi mahalitan sia kag masakitan pa gid. Gani ginrekord sang mga kauturan ang mga miting, kag ginpamatian ini ni Onesmus sa ila balay. Pagligad sang lima ka bulan nga pagtuon, desidido si Onesmus nga magtambong sa mga miting bisan pa may mga risgo.

Mas nasakitan bala si Onesmus sang nagtambong sia sa mga miting? Kabaliskaran ang natabo. “Daw naghaganhagan ang akon ginabatyag nga kasakit sa tion sang mga miting,” siling ni Onesmus. Kumbinsido sia nga ang iya bag-o nasapwan nga paglaum amo ang nakabulig sa iya. Natalupangdan sang iya iloy nga nagbag-o ang disposisyon ni Onesmus kag nalipay gid ini amo nga nagpasugot sia nga magtuon man sa Biblia. “Ang pag-alagad sa Dios amo ang bulong sang akon bata,” siling sang iya iloy.

Wala madugay, nangin di-bawtismado nga manugbantala si Onesmus. Sang ulihi, nabawtismuhan sia kag ministeryal nga alagad na karon. Bisan indi niya magamit ang iya mga tiil kag ang isa niya ka butkon, handum gid ni Onesmus nga himuon ang iya bug-os nga masarangan sa pag-alagad kay Jehova. Gusto niya mag-auxiliary payunir pero nagaduhaduha sia mag-aplay. Ngaa? Bangod nahibaluan niya nga kinahanglan may magtulod sang iya wheelchair. Sang ginsugid niya ini sa mga kauturan, nagpromisa sila nga buligan sia. Ginbuligan gid nila sia, amo nga nakaauxiliary payunir si Onesmus.

Amo man sini ang ginkabalak-an ni Onesmus sang gusto niya magregular payunir. Pero isa ka bes, napalig-on gid sia sang inadlaw nga teksto. Ang teksto amo ang Salmo 34:8: “Tilawi kag tan-awa nga maayo ang GINOO.” Sa tapos mapamalandungan ini nga teksto, nagdesisyon sia nga magregular payunir. Nagabantala sia karon sing apat ka adlaw sa isa ka semana kag may pila sia ka Bible study nga nagauswag sa espirituwal. Sang 2010, nag-eskwela sia sa Pioneer Service School. Nalipay gid si Onesmus kay ang isa sa iya mga instruktor amo ang utod nga una nga nagbantala sa iya!

Patay na karon ang mga ginikanan ni Onesmus, pero ginatatap sang mga kauturan sa kongregasyon ang iya adlaw-adlaw nga mga kinahanglanon. Nagapasalamat sia sa tanan nga pagpakamaayo nga iya natigayon, kag nagapaabot sa adlaw nga ang “pumuluyo indi magsiling, ‘Nagamasakit ako.’”—Isa. 33:24.