Mangin Mapinasalamaton

“Dear Raquel,

Salamat gid sa imo pagpalig-on sa akon. Wala ka lang makahibalo kon daw ano kadaku ang nabulig sang imo maayo nga pamatasan kag mga pulong sa akon.”​—Jennifer.

NAKABATON ka na bala sing malip-ot nga sulat sang pagpasalamat? Walay duhaduha nga nagpahalipay gid ini sa imo. Natural lamang ini, bangod tanan kita luyag nga pabaloran kag pasalamatan.​—Mateo 25:19-23.

Ang pagpabutyag sing apresasyon nagapasuod pa gid sa nagapasalamat kag sa ginapasalamatan. Dugang pa, ang tawo nga mapinasalamaton nagasunod sa halimbawa ni Jesucristo, ang isa nga pirme nagatalupangod sang maayo nga mga buhat sang iban.​—Marcos 14:3-9; Lucas 21:1-4.

Apang sing makapasubo, talagsa na lang kita karon makabaton sing personal nga mga pagpasalamat, sa hambal man ukon sa sulat. Ang Biblia nagpaandam nga sa “katapusan nga mga adlaw,” ang mga tawo mangin “di-mapinasalamaton.” (2 Timoteo 3:1, 2) Kon indi kita magbantay, basi kon maimpluwensiahan kita sini nga pamatasan.

Ano ang praktikal nga mga tikang nga himuon sang mga ginikanan agod tudluan ang ila kabataan nga mangin mapinasalamaton? Kay sin-o kita dapat magpasalamat? Kag ngaa dapat kita mangin mapinasalamaton bisan pa ang iban indi?

Sa Sulod sang Pamilya

Nagapangabudlay gid sing lakas ang mga ginikanan para sa ila kabataan. Apang kon kaisa, abi nila wala ini ginaapresyar sang ila mga kabataan. Ano ang dapat nila himuon? Importante gid ang tatlo ka butang.

(1) Ang Halimbawa. Ang maayo nga halimbawa epektibo gid nga paagi sa pagtudlo. Ginlaragway sang Biblia ang isa ka mapisan nga iloy sa Israel sang una, kag ini nagsiling: “Ang iya mga kabataan nagapakamahal sa iya.” Sa diin nakatuon ang iya mga kabataan sa pagpasalamat? Ang ulihi nga bahin sining bersikulo nagahatag sa aton sing ideya. Ini nagsiling: “Ang iya bana nagadayaw sa iya.” (Hulubaton 31:28, Maayong Balita nga Biblia) Ang mga ginikanan nga nagapakita sing pagpasalamat sa isa kag isa nagatudlo sa ila kabataan nga ang pagpasalamat nagapahalipay sa nagabaton, nagapasuod sa pamilya, kag nagapakita sang pagkahamtong.

Si Stephen, nga isa ka amay nagsiling, “Ginapanikasugan ko nga mangin halimbawa sa akon mga kabataan paagi sa pagpasalamat sa akon asawa sa paghanda niya sang amon panihapon.” Ano ang nangin resulta? “Nakita ini sang amon duha ka bata nga babayi, kag napahulag sila nga mangin mapinasalamaton man,” siling ni Stephen. Kon minyo ka na, pirme mo bala ginapasalamatan ang imo bana ukon asawa sa paghimo niya sing kinaandan lang nga mga obra sa sulod sang balay? Ginapasalamatan mo man bala ang imo mga kabataan bisan pa simple lang ang ila ginahimo?

(2) Ang Paghanas. Kaangay sang isa ka bulak, ang pagkamapinasalamaton dapat man nga palambuon. Paano mabuligan sang mga ginikanan  ang ila mga kabataan nga mapalambo kag mapabutyag ang ila pagpasalamat? Ginpatalupangod sang maalam nga si Hari Solomon ang isa ka importante nga paagi sang sia nagsulat: “Ang tagipusuon sang matarong nagahunahuna anay antes magsabat.”​—Hulubaton 15:28, NW.

Mga ginikanan, mahimo bala ninyo buligan ang inyo kabataan nga hunahunaon ang mga panikasog kag kaayo sang naghatag sing regalo sa ila? Kon himuon ninyo ini, mapalambo sang inyo kabataan ang pagkamapinasalamaton kaangay sang isa ka maayo nga duta nga nagapalambo sang bulak. Si Maria, nga nagpadaku sang tatlo ka kabataan nagsiling: “Kinahanglan nga istoryahon mo gid ang imo mga kabataan. Ipaathag sa ila nga kon hatagan sila sing regalo, buot silingon may nagadumdom kag nagapalangga sa ila. Maayo gid ang resulta sini.” Indi lamang sini mabuligan ang mga kabataan nga matun-an kon ano ang ila ihambal kon makabaton sila sing regalo, kundi kon ngaa dapat nila ihambal ini.

Dapat buligan sang mga ginikanan ang ila kabataan nga indi sila magpaabot nga hatagan sila sing regalo. * Ang paandam tuhoy sa kon paano tamdon ang mga ulipon, maaplikar man sa pagpakig-angot sa mga kabataan: “Kon ginapagustuhan sang isa ang iya ulipon kutob sa iya pagkabata, sia mangin wala sing kabalaslan sa ulihi.”​—Hulubaton 29:21, NW.

Paano matudluan ang mga bata nga mangin mapinasalamaton? Si Linda, nga may tatlo ka kabataan nagsiling, “Ginapabulig namon sang akon bana ang amon mga kabataan sa paghimo sing mga kard sa pagpasalamat paagi sa pagpadrowing sa ila ukon pagbutang sang ila ngalan sa kard.” Matuod nga simple lang ang ila mga drowing kag indi gid man manami ang ila agi, apang madamo sila sing matun-an gikan sini.

(3) Ang Pagkapursigido. Tanan kita may yara huyog nga mangin maiyaiyahon, kag mahimo amo ini ang magaupang sa aton nga mangin mapinasalamaton. (Genesis 8:21; Mateo 15:19) Apang, ginpalig-on sang Biblia ang mga alagad sang Dios: “Magbag-o kamo sa puersa nga nagapahikot sa inyo hunahuna, kag magsuklob sang bag-o nga personalidad nga gintuga suno sa kabubut-on sang Dios.”​—Efeso 4:23, 24.

Nahibaluan sang eksperiensiado nga mga ginikanan nga indi mahapos buligan ang ila kabataan nga “magsuklob sang bag-o nga personalidad.” Si Stephen, nga ginsambit kaina, nagsiling, “Medyo madugay nga nakatuon ang amon kabataan nga babayi nga magmatumato sa pagpasalamat.” Apang wala gid nangampo si Stephen kag ang iya asawa. “Bangod pursigido gid kami,” padayon ni Stephen, “nakatuon gid man ang amon kabataan sa pagpasalamat kag nalipay kami sa sini.”

Magpasalamat sa Imo mga Abyan kag mga Kaingod

Kon indi kita makapasalamat, indi buot silingon nga indi na kita mapinasalamaton, mahimo nga nalipat lang kita. Ngaa importante gid nga ipabutyag mo ang imo pagpasalamat? Agod masabat ini nga pamangkot, binagbinaga ang natabo kay Jesus kag sa pila ka mga aruon.

Sang nagapakadto si Jesus sa Jerusalem, may napulo ka aruon nga nagsugata sa iya. Ang Biblia nag-asoy: “Kag ginpabaskog nila ang ila tingog kag nagsiling: ‘Jesus, Manunudlo, kaluuyi kami!’ Sang nakita niya sila nagsiling sia sa ila: ‘Lakat kamo kag magpakita sa mga saserdote.’ Nian samtang nagalakat sila nag-ayo sila. Sang nakita sang isa sa ila nga nag-ayo sia, nagbalik sia nga nagahimaya sa Dios sa mabaskog nga tingog. Kag naghapa sia sa tiilan ni Jesus, nga nagapasalamat sa iya; dugang pa, isa sia ka Samaritano.”​—Lucas 17:11-16.

Wala bala matalupangdan ni Jesus ang iban nga wala nagpasalamat sa iya? Ang rekord nagpadayon: “Bilang sabat nagsiling si Jesus: ‘Napulo ka aruon ang gin-ayo, indi bala? Kon amo, diin na ang siam? Wala na bala sing nagbalik sa paghimaya sa Dios luwas sa sini nga tawo sang iban nga pungsod?’”​—Lucas 17:17, 18.

Indi man mga malauton ang siam ka aruon. Nagpakita sila sing pagtuo kay Jesus sang ginsugata nila sia. Ginsunod man nila ang ginsiling ni Jesus nga magkadto sa Jerusalem kag magpakita sa mga saserdote. Apang, bisan matuod nga ginpabaloran  nila ang kaayo ni Jesus, wala nila mapabutyag ang ila pagpasalamat sa iya. Nasubuan gid sadto si Cristo. Kamusta naman kita? Kon may tawo nga magpakita sa aton sing kaayo, maabtik bala kita nga nagapasalamat, ukon nagahatag sing malip-ot nga sulat agod magpasalamat?

Ang Biblia nagsiling nga ang gugma “wala nagapangita sang kaugalingon nga kaayuhan.” (1 Corinto 13:5) Gani, ang sinsero nga pagpasalamat indi lamang isa ka maayo nga pamatasan kundi isa man ka pamatuod sang gugma. Ang hitabo tuhoy sa mga aruon nagtudlo sa aton nga kon luyag naton pahamut-an si Cristo, kinahanglan nga mangin mahigugmaon kag mapinasalamaton kita sa tanan, ano man ang iya rasa ukon relihion.

Pamangkuta ang imo kaugalingon, ‘Sang san-o ko bala ulihi napasalamatan ang akon kaingod, kaupod sa trabaho, kaeskwela, nagatrabaho sa ospital, nagabantay sa tiangge, kag ang iban pa nga nagbulig sa akon?’ Ngaa indi ka maghimo sing listahan sa sulod sang isa ukon duha ka adlaw kon daw ano ka kasunson nga nagapasalamat ukon nagahimo sing malip-ot nga sulat agod magpasalamat? Makabulig ini sa imo nga makita kon diin ang imo palauswagon agod mangin mapinasalamaton.

Siempre pa, ang dapat gid naton pasalamatan amo si Jehova nga Dios. Sia ang Manughatag sang “tagsa ka maayong dulot kag tagsa ka himpit nga regalo.” (Santiago 1:17) Sang san-o ka ulihi nakapasalamat sa Dios sa mga butang nga ginhatag niya sa imo?​—1 Tesalonica 5:17, 18.

Ngaa Mangin Mapinasalamaton Bisan ang Iban Indi?

Kon nagahimo kita sing maayo sa iban, mahimo ang pila sa ila wala nagapasalamat sa aton. Ngaa dapat gihapon kita mangin mapinasalamaton? Binagbinaga ang isa ka rason.

Kon padayon kita nga nagahimo sing maayo sa mga wala nagapasalamat sa aton, ginailog naton ang aton maalwan nga Manunuga nga si Jehova nga Dios. Bisan pa nga madamo ang wala nagaapresyar sa gugma ni Jehova nga Dios, wala ini nagpugong sa iya nga pakitaan sila sing kaayo. (Roma 5:8; 1 Juan 4:9, 10) “Ginapabutlak niya ang iya adlaw sa mga tawo nga malaut kag sa mga maayo kag nagapaulan sa mga tawo nga matarong kag di-matarong.” Kon ginapanikasugan naton nga mangin mapinasalamaton bisan nagakabuhi kita karon sa kalibutan nga di-mapinasalamaton, mapamatud-an naton nga ‘mga anak kita sang aton Amay nga yara sa langit.’​—Mateo 5:45.

[Footnote]

[Blurb sa pahina 15]

Maghimo sing listahan sa sulod sang isa ukon duha ka adlaw kon daw ano ka kasunson nagahambal sing salamat ukon nagahimo sing malip-ot nga sulat agod magpasalamat

[Piktyur sa pahina 15]

Mangin halimbawa sa imo kabataan sa pagpabutyag sing pagpasalamat

[Piktyur sa pahina 15]

Bisan ang mga bata mahimo tudluan nga magpasalamat