Mangin Suod sa Dios

“Hakwata ang Imo Anak”

2 HARI 4:8-37

WALA na sing mas masakit pa para sa isa ka ginikanan sangsa mapatyan sia sang bata. Pero, masarangan ni Jehova nga Dios nga dulaon ina nga kasakit. Nahibaluan naton ini kay ginhatagan niya sing gahom ang pila ka tawo sang panahon sang Biblia sa pagbanhaw sa mga patay. Ang isa sa ila amo si Eliseo. Ang pagbanhaw niya sa isa ka bata nga lalaki mabasa sa 2 Hari 4:8-37.

Sa siudad sang Sunem, may mag-asawa nga nag-amuma kay Eliseo. Pirme nila sia ginahatagan sing pagkaon kag ginapaistar sa ila balay. Ang asawa indi makabata. Pero isa ka adlaw, ginsilingan sia ni Eliseo: “Sa amo man sini nga tion sa sunod nga tuig may ginakugos ka na nga bata nga lalaki.” Daw indi sia makapati pero natabo gid ang ginhambal ni Eliseo. Ugaling ang iya kalipay wala nagdugay. Pila ka tuig sang ulihi, samtang ang bata ara sa latagon, nagsakit ang iya ulo. Gindala sia sa ila balay kag didto, napatay sia sa ‘sabak sang iya iloy.’ (Bersikulo 16, 19, 20, APD) Ginhakwat sia sang iya nagahilibion nga iloy kag ginbutang sa katre ni Eliseo.

Naglisensia dayon ang babayi sa iya bana kag dalidali nga nagkadto kay Eliseo sa Bukid Carmel nga mga 30 kilometros ang kalayuon. Sang magkitaay sila, wala sia naghilibion ukon nagpakita nga grabe gid ang iya kasubo. Ngaa? Mahimo nga nabatian niya nga ang ginbuslan ni Eliseo nga si Elias nagbanhaw man anay sang bata nga lalaki sang isa ka balo. (1 Hari 17:17-23) Posible nga nagatuo gid sia nga masarangan man ni Eliseo nga banhawon ang iya bata. Ano man ang rason, wala gid sia nagpauli kon indi niya upod si Eliseo.

Sang didto na sila sa Sunem, si Eliseo lang ang nagsulod sa kuarto nga ginatulugan niya sang una. Nakita niya didto ang patay nga bata nga nagahamyang “sa iya katre.” (Bersikulo 32, APD) Nangamuyo ang propeta kay Jehova kag nakitluoy nga buligan sia. Dayon, samtang ginakaptan niya ang bata, “amat-amat nga nag-init ang lawas” sini. (Bersikulo 34, APD) Nagpitik liwat ang iya tagipusuon! Ginsilingan ni Eliseo ang babayi sining makalilipay nga mga tinaga: “Hakwata ang imo anak.”—Bersikulo 36.

Ini nga hitabo nagahatag sa aton sing paglaum kag kalipay. Ginapakita sini nga naintiendihan gid ni Jehova ang kasubo nga ginabatyag sang mga ginikanan nga napatyan sing bata. Handum gid niya nga dulaon ang kamatayon. (Job 14:14, 15) Ang pagbanhaw nga ginhimo ni Eliseo kag sang iban pa sang panahon sang Biblia, nagapakita nga mas daku pa gid nga pagpamanhaw ang himuon ni Jehova sa bag-ong kalibutan sa palaabuton. *

Ang promisa sang Biblia nga pagkabanhaw indi makadula sang kasakit nga nabatyagan naton kon mapatay ang aton hinigugma. Ang isa ka matutom nga Cristianong lalaki nga napatyan sang iya bugtong nga bata, nagsiling: “Madula gid lang ang akon kasubo kon mahakos ko na liwat ang akon bata nga lalaki.” Hunahunaa ang tion nga makaupod mo na liwat ang imo pinalangga nga napatay. Bisan pamensaron mo lang gani nga mahakos mo sia liwat, nagahaganhagan na ang imo kasubo. Gusto mo bala nga magtuon sing dugang pa parte sa Dios nga nagpromisa sining matahom nga paglaum?

[Nota]