Ginasugid sang Biblia ang duha ka panguna nga rason. Una, bisan pa nga nakahimo ang mga tawo sing makatilingala nga mga butang, wala sila gintuga nga may ikasarang sa pagtuytoy sang ila kaugalingon nga tikang. Ikaduha, nagakapaslawan ang mga plano sang tawo bangod “ang bug-os nga kalibutan yara sa gahom sang isa nga malauton,” si Satanas nga Yawa. Gani, indi gid mapaluntad sang tawo ang paghidait sa kalibutan.—Basaha ang Jeremias 10:23; 1 Juan 5:19.

Ang pagkamaiyaiyahon kag ambisyon sang tawo isa man ka kabangdanan nga mabudlay matigayon ang paghidait sa kalibutan. Ang lamang nga makapaluntad sang paghidait amo ang isa ka gobierno nga makatudlo sa tawo nga higugmaon ang maayo kag ulikdan ang isa kag isa.—Basaha ang Isaias 32:17; 48:18, 22.

Ang Labing Gamhanan nga Dios nagpromisa sang isa ka gobierno nga magagahom sa tanan nga tawo. Buslan sini ang gobierno sang tawo. (Daniel 2:44) Ang Anak sang Dios nga si Jesus amo ang magagahom bilang Prinsipe sang Paghidait. Dulaon niya ang kalautan sa bilog nga duta kag tudluan ang mga tawo nga mangin mahidaiton.—Basaha ang Isaias 9:6, 7; 11:4, 9.

Sa karon, sa idalom sang pagdumala ni Jesus, ginagamit sang minilyon sa bilog nga kalibutan ang Pulong sang Dios nga amo ang Biblia, para tudluan ang mga tawo kon paano magpakighidait. Sa indi madugay, matigayon na naton ang paghidait sa kalibutan.—Basaha ang Isaias 2:3, 4; 54:13.