Indi bala nga kon ang katilingban korap, mangin korap man ang gobierno nga bahin sini nga katilingban? Kon amo, ang gobierno nga wala sing korapsion indi dapat maghalin sa sini nga katilingban. Amo gid sina nga gobierno ang ginalaragway sang Biblia, ang Ginharian sang Dios nga gintudlo ni Jesus sa iya mga sumulunod nga ipangamuyo.—Mateo 6:9, 10.

Ang Ginharian sang Dios amo ang matuod gid nga gobierno nga nagagahom sa langit. Buslan sini ang tanan nga gobierno sang tawo. (Salmo 2:8, 9; Bugna 16:14; 19:19-21) Madamo nga pagpakamaayo ang ihatag sini nga Ginharian. Kag isa ka bahin sini nga pagpakamaayo nga madula na ang korapsion sa gobierno. Binagbinaga ang anom ka aspekto sang Ginharian nga nagapasalig sini.

PROBLEMA: Ang pundo halin sa mga buhis nga ginabayad sang mga tawo amo ang ginagamit sang mga gobierno. Ini nga kuarta amo ang nagasulay sa mga opisyal nga mangawat, kag ang iban naman nagabaton sing hamham sa mga tawo nga luyag mabuhinan ang ila buhis ukon ang iban nga balayran sa gobierno. Gani agod mabawi ang nadula nga kuarta, ginapasakaan sang gobierno ang buhis, kag amo ini ang nagapalala pa gid sang korapsion. Sa sini nga kahimtangan, makaluluoy gid ang mga bunayag.

 SOLUSYON: Ang labing gamhanan nga Dios nga si Jehova * amo ang magahatag sing gahom sa Ginharian sang Dios. (Bugna 11:15) Indi na kinahanglan mangolekta sing buhis agod sakdagon ang mga hilikuton sini. Kay pat-uron sang Dios nga mahinatagon kag may ‘makusog nga gahom’ nga ang Ginharian bugana nga magaaman sang mga kinahanglanon sang iya mga sakop.—Isaias 40:26; Salmo 145:16.

PROBLEMA: Agod madula ang korapsion “dapat sugdan [ini] sa pinakamataas,” siling ni Susan Rose-Ackerman, nga ginsambit sa una nga artikulo. Nagakadula ang kredibilidad sang gobierno kon ginatinguhaan nila nga dulaon ang korapsion sa mga pulis kag sa mga opisyal sang customs pero ginapabay-an lang ang mataas nga mga opisyal. Kag bisan pa maayo ang manuggahom indi gihapon sia himpit. Ang Biblia nagasiling nga “walay tawo nga matarung sa duta nga nagahimo sing maayo.”—Manugwali 7:20.

SOLUSYON: Indi pareho sang indi himpit nga mga tawo, si Jesucristo, nga gintangdo sang Dios subong Manuggahom sang Ginharian, indi masulay nga maghimo sing malain. Ginpakita niya ini sang mangindi sia sa pinakadaku nga hamham nga gintanyag sa iya, “ang tanan nga ginharian sang kalibutan kag ang ila himaya.” Mabaton ini ni Jesus kon maghimo sia sing isa lang ka buhat sang butig nga pagsimba sa manuggahom sang kalibutan nga amo ang Yawa. (Mateo 4:8-10; Juan 14:30) Bisan sang nagaantos si Jesus kag nagatagumatayon, nangin matutom gid sia kay ginpangindian niya ang bulong nga makapahaganhagan kuntani sang kasakit nga iya ginaantos pero madulaan sia sing kontrol sa iya maayo nga panghunahuna. (Mateo 27:34) Sang nakabalik na si Jesus sa langit sa tapos sia ginbanhaw sang Dios, napamatud-an niya nga kalipikado gid sia nga maggahom sa Ginharian.—Filipos 2:8-11.

PROBLEMA: Madamo nga pungsod ang regular nga may eleksion, para mabuslan kuno ang korap nga mga opisyal. Pero ang matuod, ang mga pagpangampanya kag ang mga eleksion nangin kabangdanan pa sang korapsion bisan sa mainuswagon nga mga pungsod. Paagi sa mga kontribusyon sa kampanya, ang mga manggaranon makaimpluwensia sa mga opisyal nga yara sa puesto kag sa mga kandidato.

Ang hukom sang Korte Suprema sang U.S. nga si John Paul Stevens nagsulat nga ina nga impluwensia makahalit “indi lamang sa pagkalehitimo kag sa kalidad sang Gobierno kundi sa pagsalig man sang mga tawo sa sini.” Amo kon ngaa indi katingalahan nga ang kalabanan nga tawo nagapati nga ang mga partido sa pulitika amo ang pinakakorap nga institusyon.

SOLUSYON: Bangod ang Ginharian sang Dios malig-on kag permanente nga pagginahom, wala na sing matabo nga pagdinayaay sa kampanya ukon sa eleksion. (Daniel 7:13, 14) Kag bangod ang Manuggahom  sang Ginharian ginpili sang Dios, indi na kinahanglan ang eleksion kag indi sia mapahalin sang mga tawo. Ang kalig-unan sini nagapasalig nga himuon sini pirme ang para sa kaayuhan sang iya mga sakop.

PROBLEMA: Mahimo maghunahuna ka nga ang bag-o nga mga kasuguan makabulig. Pero naobserbahan sang mga eksperto nga sa madamo nga kaso, nagadugang lang ang korapsion kon ginadugangan man ang mga kasuguan. Isa pa, masami nga daku ang gasto sa pagpatuman sing espesipiko nga kasuguan nga gintuyo para dulaon ang korapsion pero ang kaayuhan nga mahatag sini diutay lang.

SOLUSYON: Ang mga kasuguan sang Ginharian sang Dios labaw gid sa mga gobierno sang tawo. Halimbawa, sa baylo nga isaisahon ang mga dapat kag indi dapat himuon, naghatag si Jesus sang ginatawag nga Bulawanon nga Pagsulundan. Nagsiling sia: “Busa, ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila.” (Mateo 7:12) Talalupangdon nga ginapadaku sang kasuguan sang Ginharian ang mga motibo kag mga buhat. “Higugmaon mo ang imo isigkatawo subong sang imo kaugalingon,” siling ni Jesus. (Mateo 22:39) Ang Dios lamang nga makabasa sang tagipusuon ang makapatuman sini nga mga sugo.—1 Samuel 16:7.

PROBLEMA: Ang kabangdanan sang korapsion amo ang kakagod kag interes sa kaugalingon. Masami ini ginapakita sang mga opisyal sang gobierno kag sang mga pumuluyo. Sa narumpag nga daku nga balaligyaan sa Seoul nga nasambit na, ginhamhaman sang mga kontraktor ang mga opisyal sang gobierno kay nakahibalo sila nga mas diutay ang ila gasto sangsa maggamit sila sing nagakaigo nga mga materyales kag pamaagi sa pagtukod.

Gani agod madula ang korapsion, dapat tudluan ang mga tawo nga dulaon ang kakagod. Pero ang gobierno sang tawo wala sing determinasyon kag ikasarang nga itudlo ini.

 SOLUSYON: Ginadula sang Ginharian sang Dios ang gamot sang korapsion paagi sa pagtudlo sa mga tawo nga landason ang malain nga mga motibo. * Nakabulig ini sa ila nga ‘magbag-o sa puersa nga nagapahikot sa ila hunahuna.’ (Efeso 4:23) Natun-an nila nga bayluhan ang kakagod sing pagkakontento kag pag-ulikid sa iban.—Filipos 2:4; 1 Timoteo 6:6.

PROBLEMA: Ang iban nga mga tawo korap gihapon kag indi bunayag bisan pa maayo ang ila kabuhi kag naedukar sila sing maayo. Suno sa mga eksperto, amo ini ang rason kon ngaa indi madula sang gobierno sang tawo ang korapsion. Ang mahimo lang sang gobierno amo nga pahaganhaganon ang korapsion kag ang halit sini.

SOLUSYON: Ang United Nations Convention Against Corruption nagsiling nga para madula ang korapsion, dapat itudlo sang mga gobierno ang mga kinaiya nga “integridad, pagkabunayag kag pagkaresponsable.” Bisan pa maayo ini nga katuyuan, indi lamang pagtudlo sini nga mga kinaiya ang ginahimo sang Ginharian sang Dios kundi ginaobligar sini ang mga sakop sini nga ipakita ini nga mga kinaiya. Ang Biblia nagasiling nga indi makasulod sa Ginharian ang “makagod nga mga tawo” kag ang mga “butigon.”—1 Corinto 6:9-11; Bugna 21:8.

Matun-an sang mga tawo nga sundon ining mataas nga mga talaksan sa moral, subong sang ginpakita sadto sang una nga mga Cristiano. Halimbawa, sang gintinguhaan sang disipulo nga si Simon nga baklon ang balaan nga espiritu sa mga apostoles, nangindi sila kag ginsilingan sia: “Hinulsuli ining imo kalainan.” Sang marealisar niya nga malain ang iya handum, ginpangabay niya ang mga apostoles nga mangamuyo para sa iya agod malandas niya ini.—Binuhatan 8:18-24.

Bisan ano ang imo nasyonalidad, mahimo ka nga mangin sakop sang Ginharian sang Dios. (Binuhatan 10:34, 35) Itudlo ini sa imo paagi sa programa sang pagpanudlo sang Ginharian nga matigayon subong sa bilog nga kalibutan. Nalipay ang mga Saksi ni Jehova nga ipakita sa imo kon paano ginahimo ining libre nga pagtuon sa Biblia sa imo balay. Mga napulo lang ini ka minutos kada semana. Matun-an mo man ang “maayong balita sang ginharian sang Dios,” kag kon paano sini dulaon ang korapsion. (Lucas 4:43) Ginaagda ka namon nga kontakon ang mga Saksi sa imo lugar ukon buksan ang amon Web site nga jw.org/hil.