YUAV UA CAS THIAJ KOV YEEJ KEV SIB NTXUB
2 | Txhob Ua Phem Pauj Phem
Phau Vajlugkub Qhia Tias:
Yog muaj leej twg ua phem rau nej, tsis txhob ua phem pauj. Nrog sawv daws nyob sib haum. ‘Kuv yog tus yuav ua pauj thiab kuv yog tus yuav rau txim, Yehauvas hais li ntawd.’—LOOS 12:17-19.
Nqe No Txhais Tias:
Peb yeej yuav chim thaum lwm tus ua siab peb. Txawm li los Vajtswv tsis xav kom peb pauj kua zaub ntsuab. Peb yuav tsum ua siab ntev tos nws. Thaum txog caij txog nyoog, nws yeej yuav rhuav tshem txhua txoj kev uas tsis ncaj ncees.—Phau Ntawv Nkauj 37:7, 10.
Peb Xyaum Nqe No Li Cas:
Nco ntsoov tias peb yog neeg txhaum. Yog peb ua phem pauj phem ces txoj kev sib ntxub yuav tsis paub xaus li. Yog ib tug ua rau koj chim los sis mob siab lawm, tsis txhob ua pauj. Ua siab txias txias thiab hais tej lus mos lus muag. Tej lub sij hawm zoo dua yog peb cia li zam luag xwb. (Paj Lug 19:11) Tiam sis yog muaj teeb meem loj xws li kev sib ntaus sib tua lawm ne? Thaum ntawd, peb yuav tau qhia rau tub ceev xwm paub.
Kev sib pauj yuav rov ua teeb meem rau yus
Ua li, yog peb twb ua txhua yam los daws ib qho teeb meem tiamsis daws tsis tau li nev? Peb yuav ua li cas? Tsis txhob maj pauj kev chim. Yog peb nrhiav kev los pauj kua zaub ntsuab ces yuav tsim teeb meem ntxiv xwb. Txhob cia txoj kev ntxub tswj tau koj. Peb yuav tsum tso siab rau Vajtswv ua tus daws tej teeb meem ntawd. Nws yeej yuav pab peb.—Phau Ntawv Nkauj 37:3-5.
Tej Yam No Yuav Pab Tau Koj Thiab
VAJLUGKUB KHO TAU LUB NEEJ
Kuv Xav Kho Tej Kev Tsis Ncaj Ncees
Lafikas (Rafika) mus koom nrog ib pab tibneeg xav kho teb kho chaw. Tiamsis thaum nws kawm phau Vajlugkub, nws mam pom tias tsis ntev tom ntej Vajtswv yuav kho tej kev tsis ncaj ncees kom sawvdaws thiaj nyob tau sib haum xeeb.
VAJLUGKUB KHO TAU LUB NEEJ
Johny thiab Gideon: Chiv Thawj Yog Yeeb Ncuab, Nimno Yog Kwvtij
Nyob rau tej thaj tsam tseem muaj kev sib cais sib ntxub. Kawm seb ob tug txiv neej ua li cas nkawv thiaj los ua tau phooj ywg.
