Zoo ib yam li ntawd, yuav muaj ib yam zoo li “cua daj cua dub” los raug txhua tus. Yexus muab qhov ntawd hu ua “kev ceeblaj txom nyem loj kawg li.” (Mathais 24:21, TT ) Qhov xwm txheej ntawd yeej yuav raug peb sawvdaws. Yog li ntawd, peb yuav ua li cas thiaj tiv thaiv tau peb tus kheej thaum ntawd?

Thaum Yexus Khetos cev nws zaj lus qhia saum roob, nws hais tias: “Nej yuav tsum xub nrhiav Vajtswv lub tebchaws [tseem fwv] thiab nws txojkev ncaj ncees ua ntej.” (Mathais 6:33, TT ) Peb yuav ua li no li cas?

Xub nrhiav Vajtswv lub tseem fwv. Qhov no txhais tias peb yuav tau muab Vajtswv lub tseem fwv ua yam uas tseem ceeb tshaj txhua yam huv tibsi. (Mathais 6:25, 32, 33) Vim li cas peb yuav tau ua li no? Rau qhov tibneeg kho tsis tau tej teeb meem uas raug noob neej niaj hnub nimno. Tsuas yog Vajtswv lub tseem fwv xwb thiaj kho tau.

Nrhiav nws txojkev ncaj ncees. Peb yuav tau ua lub neej raws li Vajtswv tej kevcai thiab tej hauv paus ntsiab lus uas ncaj ncees. Yog peb tsis ua li ntawd es txiav txim rau peb tus kheej tias yam twg zoo thiab tsis zoo rau peb, ces peb yuav txiav txim tau yuam kev. Thaum kawg peb yuav ntsib teeb meem xwb. (Pajlug 16:25) Tiamsis, yog tias peb ua raws li Vajtswv tej kevcai, ces peb yuav ua rau Vajtswv zoo siab thiab peb yuav kaj siab dua.​—Yaxayas 48:17, 18.

Xub nrhiav Vajtswv lub tseem fwv thiab nws txojkev ncaj ncees tsis tseg. Yexus twb ceeb toom lawm tias muaj ib txhia xav yuam kev tias lawv yuav nyob tso siab plhuav yog lawv mus khwv tiag kom muaj txiag nplua nuj. Muaj dua ib txhia ho siv dag siv zog los tu lawv tej teeb meem lawv thiaj tsis muaj  sijhawm los nrhiav Vajtswv lub tseem fwv.​—Mathais 6:19-21, 25-32.

Txawm li ntawd los, Yexus cog lus tias cov uas txhawb nqa Vajtswv lub tseem fwv yog cov uas Vajtswv yuav saib xyuas tamsim no thiab yav tom hauv ntej.​—Mathais 6:33.

Txawm tias Yexus cov thwjtim uas nyob rau thawj ib puas xyoo xub nrhiav Vajtswv lub tseem fwv thiab nws txojkev ncaj ncees los, lawv tsis pom Vajtswv rhuav tshem tag nrho tej kev txom nyem uas tibneeg muaj. Txawm li ntawd los, Vajtswv haj tseem tiv thaiv lawv. Nws tiv thaiv lawv li cas?

Thaum cov thwjtim ua lub neej raws li Vajtswv tej kevcai ncaj ncees, lawv tsis raug tej kev nyuaj siab li cov neeg uas tsis quav ntsej Vajtswv tej lus. Lawv kuj ua siab ntev thev tej teeb meem vim lawv ntseeg tias Vajtswv lub tseem fwv yuav los. Tsis tas li ntawd, Vajtswv pub nws “lub hwjchim uas loj kawg nkaus” kom lawv thiaj thev dhau.​—2 Kauleethaus 4:7-9.

Cov Khixatia nyob thawj ib puas xyoo mloog Yexus cov lus kom xub nrhiav Vajtswv lub tseem fwv ua ntej. Lawv thiaj tshaj tawm txoj xov zoo txog lub tseem fwv ntawd thoob plaws ib cheeb tsam lawv nyob. (Kaulauxais 1:23) Puas muaj leejtwg ua li ntawd niaj hnub no?

Yeej muaj! Yehauvas Cov Timkhawv paub tias tshuav tsis ntev Vajtswv lub tseem fwv twb yuav los kho txhua yam hauv ntiajteb no. Vim li ntawd, lawv thiaj siv zog ua tes haujlwm Yexus hais kom lawv ua. Nws hais tias: “Thaum muaj neeg mus qhia Txojmoo Zoo uas hais txog Ntuj Ceebtsheej [lub tseem fwv] mus thoob qab ntuj thiab ua timkhawv rau txhua haivneeg paub lawm, ces thaum ntawd twb yuav txog lub sijhawm kawg.”​—Mathais 24:14.

Peb yuav ua li cas thaum peb hnov txoj xov zoo ntawd? Peb kuj xyaum tau ib yam li cov neeg nyob thawj ib puas xyoo hauv lub nroog Npele-as. Thaum lawv hnov tus tubtxib Paulus qhia txoj xov zoo txog Vajtswv lub tseem fwv, lawv “kub siab lug mloog Vajtswv txojlus” thiab ua tib zoo “kawm Vajtswv txojlus” seb puas muaj raws li lawv tau hnov. Ces, lawv txawm ua raws nraim li lawv tau kawm.​—Tes Haujlwm 17:11, 12.

Koj kuj ua tau tib yam li ntawd. Thaum koj xub nrhiav Vajtswv lub tseem fwv thiab nws txojkev ncaj ncees ua ntej, Vajtswv yuav saib xyuas thiab tsom kwm koj tamsim no. Tsis tas li ntawd, koj yuav tau kev thaj yeeb thiab nyob tso siab plhuav yav tom hauv ntej.