• Koj tus tub nyuam qhuav muaj 10 xyoo xwb ua cas txawm siv tsab loj ua luaj!

• Nws xav kom sawvdaws qhuas nws.

Koj yuav xav tias, ‘Xyov ua cas nws ho coj tau li ntawd? Kuv yeej xav kom nws saib nws tus kheej rau nqe, tiamsis kuv tsis xav kom nws muab nws tus kheej saib hlob dua lwm tus!’

Puas yuav qhia tau menyuam kom paub txo hwjchim thiab kom lawv saib lawv tus kheej rau nqe?

Tau 20 tawm xyoo los no, tej neeg txawj ntse txhawb kom cov niam txiv yoog lawv cov menyuam, kom lawv tas zog qhuas menyuam tab txawm menyuam tsis tau ua dabtsi uas tsim nyog qhuas, thiab kom tsis txhob ntuas lossis rau txim rau menyuam. Lawv xav tias yuav tsum qhuas menyuam li no thaum menyuam loj hlob tuaj lawv thiaj saib lawv tus kheej rau nqe. Tiamsis ua li no pab puas tau menyuam tiag? Phau ntawv Generation Me hais tias: “Qhov uas cov niam txiv cob menyuam li no pab tsis tau menyuam ua neeg paub cai thiab muaj kev zoo siab, tiamsis tsuas cob tau ib co menyuam uas xav txog lawv tus kheej nkaus xwb.”

Cov menyuam uas niam txiv qhuas tas li xwb thaum loj hlob tuaj tsis paub yuav ua li cas thaum muaj kev tu siab, raug luag thuam, lossis ua tsis tau ib yam dabtsi twg zoo. Thaum loj hlob tuaj, lawv tsis txawj nrog luag ntaus phoojywg vim lawv tsuas xam pom lawv tus kheej nkaus xwb. Thaum kawg, cov menyuam ntawd thiaj muaj kev txhawj xeeb thiab tus mob nyuaj siab.

Qhov uas menyuam saib lawv tus kheej rau nqe yuav tsum yog los ntawm lawv lub peevxwm, tsis yog los ntawm qhov uas luag tas zog qhuas lawv. Lawv yuav tsum rau siab kawm thiab kub siab xyaum lawv thiaj txawj, tsis yog lam xav tias lawv yeej ua tau xwb. (Paj Lug 22:29) Lawv yuav tsum xam pom lwm tus thiab. (1 Khaulee 10:24) Yuav tsum txo hwjchim thiaj coj tau li no.

Qhuas thaum tsim nyog xwb. Yog koj tus ntxhais xeem tau ntawv zoo, cia li qhuas nws. Yog nws xeem tsis tau zoo, tsis txhob maj liam tus xibhwb. Yog koj ua li ntawd, yuav pab tsis tau nws ua neeg txo hwjchim. Yuav tsum pab nws seb yuav ua li cas kom lwm zaus nws thiaj xeem tau zoo. Nco ntsoov qhuas koj tus menyuam thaum nws ua tau ib yam twg zoo.

Qhuab ntuas thaum tsim nyog. Tsis yog koj yuav tau thuam koj tus menyuam txhua zaus nws ua yuam kev. (Khaulauxi 3:21) Tiamsis yog nws ua yuam kev loj, koj yuav tsum qhuab ntuas nws. Ib yam li ntawd, koj yuav tsum ntuas nws thaum nws coj tus cwj pwm tsis zoo, tsam ntev mus ces cob qhia tsis tau lawm.

Piv txwv li no, yog koj tus tub pheej khav txog nws tus kheej es koj tsis ntuas nws ces nws yuav ua ib tug neeg khav theeb thiab tsis nyiam poo lwm tus. Yog li ntawd, zoo rau koj qhia nws tias yog nws pheej khav txog nws tus kheej ces tibneeg yuav tsis nyiam nws thiab ntev mus kuj yuav ua rau nws poob ntsej muag. (Paj Lug 27:2) Qhia nws ntxiv tias ib tug neeg paub tab yuav tsis muab nws tej peevxwm khav rau tus ub tus no. Yog koj ua tib zoo ntuas nws, yuav pab nws txo hwjchim thiab saib nws tus kheej rau nqe.​—Hauv paus ntsiab lus: Mathai 23:12.

Qhia koj tus menyuam ua neej. Yog menyuam ntshaw dabtsi los koj muab huvsi rau ces nws yuav xav tias nws yeej tsim nyog tau tej ntawd. Yog koj tus menyuam xav tau ib yam uas koj yuav tsis taus, ua tib zoo qhia tias yog vim li cas thiaj yuav tsis taus. Yog nej twb npaj yuav mus ua si lossis yuav mus kev deb tiamsis ho mus tsis tau, ua tib zoo qhia koj tus menyuam tias ua neej nyob qee zaus yeej mus tsis raws li siab xav. Txhob maj pab koj cov menyuam txhua zaus lawv ntsib teeb meem, thaum lawv hlob tiav lawd lawv thiaj paub peem tej kev nyuaj siab uas los raug lawv.​—Hauv paus ntsiab lus: Paj Lug 29:21.

Qhia nws ua neeg siab dawb. Qhia koj tus menyuam tias, “Qhov uas pub rau luag ua rau yus kaj siab dua li txais luag li los.” (Tubtxib Tes Haujlwm 20:35) Yuav qhia li cas? Muaj tej tug uas yuav tsum muaj lwm tus los pab thauj mus tom khw, mus ub mus no, lossis pab kho vaj kho tsev. Nrog koj tus menyuam muab cov no tej npe sau cia. Thaum koj mus pab lawv, coj koj tus menyuam nrog koj mus. Koj tus menyuam yuav pom tias koj zoo siab npaum cas thaum koj pab lwm tus. Yog koj ua li no, yuav pab tau koj tus menyuam paub ua neeg txo hwjchim.​—Hauv paus ntsiab lus: Luka 6:38.