Petero Ena Revareva Iharuana 1:1-21
1 Lau, Simona Petero, be Iesu Keriso ena hesiai tauna bona aposetolo tauna ta. Lau ese umui, Keristani abidadama umui abia taudia,* lau tore henia. Umui abia abidadama be hahenamo ta, ai abia gauna bamona. Unai be iseda Dirava bona iseda Hamauria Tauna, Iesu Keriso, edia kara maoromaoro amo ita abia.
2 Dirava bona iseda Lohiabada Iesu umui dibaia namonamo karana amo,+ mani Dirava ese umui dekenai ena hebogahisi hereadaena bona maino ia habadaia.
3 Badina Dirava ese ena siahu amo heduru gaudia ibounai ita dekenai ia henia, davana lasi, do ita mauri bona ia do ita badinaia, badina iena hairai bona kara namo amo ita ia boiria Tauna+ ita dibaia namonamo.
4 Unai gaudia amo ia ese ita dekenai mai anina bada gwauhamata namodia ia henia, davana lasi.+ Unai gwauhamata amo umui be lauma taudia ai umui lao diba, Dirava bamona,+ badina umui ese inai tanobada ena kara gageva umui dadaraia vadaeni, idia be ura dikadia* amo idia vara.
5 Unai dainai umui gaukara goada,+ umui abidadama sibona lasi, to kara namodia do umui karaia danu,+ bona kara namodia sibona lasi, to diba danu do umui abia,+
6 bona diba sibona lasi, to sibona biagua karana danu,+ bona sibona biagua karana sibona lasi, to haheauka danu, bona haheauka sibona lasi, to Dirava badinaia karana danu,+
7 bona Dirava badinaia karana sibona lasi, to tadikaka lalokau henia karana danu, bona tadikaka lalokau henia karana sibona lasi, to taunimanima ibounai lalokau henia karana danu.+
8 Bema unai kara ibounai umui karaia bona umui hahedinaraia badabada, vadaeni iseda Lohiabada Iesu Keriso umui dibaia namonamo dainai do umui noho kava lasi, to huahua do umui havaraia.+
9 Bema tau ta ese unai kara ibounai ia hahedinaraia lasi, ia be ia matakepulu bona ia ura lasi diari ia itaia,+ bona ia laloaboio gauna be, ena kara dika gunadia be Dirava ese ia huria oho vadaeni.+
10 Unai dainai tadikaka e, do umui gaukara goada Dirava ese umui ia boiria+ bona umui ia abia hidi karana umui hamomokania totona, badina bema unai kara umui hahedinaraia noho, do umui moru lasi momokani.+
11 Oibe, unai dala amo do umui abia hahenamo badana be iseda Lohiabada bona Hamauria Tauna, Iesu Keriso, ena noho hanaihanai Basileia+ lalonai mai hairai ida do umui vareai.+
12 Unai dainai, ena be unai umui diba bona umui dibaia hereva momokani umui dogoatao auka, to hanaihanai lau noho hegaegae umui dekenai lau torea gaudia ibounai lau herevalaia lou totona.
13 To lau laloa inai palai dubu*+ lalonai lau do noho lalonai, ia maoro umui dekenai inai gaudia lau herevalaia lou.+
14 Badina lau diba, kahirakahira egu palai dubu be do idia kokia, iseda Lohiabada Iesu Keriso ese lau dekenai ia hahedinaraia hegeregerena.+
15 Lau be nega ibounai do lau gaukara goada, unai amo umui lau rakatania murinai, unai gaudia ibounai umui laloatao* lou diba.
16 Iseda Lohiabada Iesu Keriso ena siahu bona ena noho be umui dekenai ai gwauraia neganai, ai be taunimanima edia koikoi sivaraidia ai gwauraia lasi. Lasi, to ai be emai matana amo iena hairai ai itaia.+
17 Badina ia ese Tamana Dirava amo hemataurai bona hairai ia abia, hairai Diravana ese inai hereva be ia dekenai ia gwauraia neganai: “Inai be egu Natuna, egu lalokau, ia lau lalonamo henia.”+
18 Oibe, ia ida ororo helagana dekenai ai noho neganai, guba amo unai hereva ai kamonai.
19 Vadaeni, unai ese emai abidadama peroveta herevadia dekenai ia hagoadaia momokani. Umui ese unai peroveta herevadia umui badinaia namonamo, ia be lamepa bamona emui kudouna ena dibura gabuna ia hadiaria,+ ela bona daba ia rere bona daba hisiu+ ia hedinarai.
20 Badina inai mai anina bada gauna umui diba vadaeni, Toretore Helagadia ai idia noho peroveta herevadia be tau ta ese sibona ena lalohadai amo ia gwauraia lasi.
21 Badina peroveta herevadia be tau ta ese sibona ena ura dekenai ia gwauraia lasi,+ to lauma helaga ese taunimanima ia hasiahua* hegeregerena, idia ese Dirava amo idia mai hereva idia gwauraia.+
Futnout
^ Eiava “umui abia hereva momokani be ai abia hahenamo hegeregerena.”
^ Eiava “matabodaga uradia.”
^ Eiava “palai ruma,” unai be, iena tanobada tauanina.
^ Eiava “gwauraia.”
^ Gr., “hakaua.”
