1, 2. Hari inai negai taunimanima be edena bamona hisihisi idia davaria, bona dahaka henanadai idia vara?

TUARI ia vara tanona ta ai, hahine bona natudia tausen momo idia mase. Edia mase tauanina be guri badana ta dekenai idia guria bona ena badinai korosi maragidia idia atoa. Unai korosi ta ta dekenai inai hereva idia torea: “Dahaka Dainai?” Nega haida taunimanima idia lalohisihisi bada dainai unai bamona idia henanadai. Bema tuari, idia vara kava dika idauidau, gorere, eiava taravatu utua karadia dainai edia lalokau taudia idia mase, edia ruma idia hadikaia, eiava dala ma haida ai hisihisi bada idia davaria neganai, unai bamona idia henanadai. Idia ura diba dahaka dainai unai bamona dika idia davaria.

² Dahaka dainai Dirava ese hisihisi ia koua lasi? Bema Iehova Dirava ena siahu, lalokau, aonega bona kara maoromaoro be bada, dahaka dainai tanobada be inai heheni karana bona kara gageva amo ia honu? Nega haida unai bamona oi laloa, a?

3, 4. (a) Dirava ese hisihisi ia koua lasi ena badina ita henanadailaia be maoro, a? (b) Iehova ese kara dika bona hisihisi be edena bamona ia laloa?

³ Dirava ese hisihisi ia koua lasi dainai ita henanadai be maoro, a? Haida idia laloa unai bamona idia henanadai neganai, idia hahedinaraia edia abidadama be maragi eiava Dirava idia matauraia lasi. To, Baibel oi duahia neganai, do oi itaia, Dirava  idia gari henia taudia haida be unai bamona idia henanadai danu. Hegeregere, peroveta tauna Habakuku ese Iehova ia nanadaia: “Lau ese taunimanima edia metau bona hisihisi bada lau itaia noho. Badina dahaka inai bamona hisihisi oi koua lasi? Badina dahaka oi ese inai hisihisi bona metau oi itaia noho, to hanamoa kara ta oi karaia lasi? Kahana ibounai dekenai lau itaia, taunimanima ese idia heatu bona heai henia noho, bona taunimanima edia kohu idia hadikaia noho.”​—Habakuku 1:3.

⁴ Peroveta tauna Habakuku ese unai henanadai idauidau ia henia dainai Iehova ese ia gwau henia, a? Lasi. To Dirava ese Habakuku ena hereva be ena lauma amo ia havaraia bukana, Baibel, lalonai ia torea. Dirava ese Habakuku ia durua idia vara gaudia do ia lalopararalaia namonamo bona ena abidadama ia hagoadaia totona. Iehova ia ura oi dekenai unai bamona ia karaia. Laloatao, Baibel ia hahedinaraia, Dirava ese ita ia laloa bada. (1 Petero 5:7) Dirava ese kara dika bona kara dika ese ia havaraia hisihisi ia inai henia momokani. (Isaia 55:​8, 9) To dahaka dainai tanobada dekenai hisihisi be bada?

5. Tomadiho gunalaia taudia haida ese hisihisi ia vara ena badina be edena bamona idia gwauraia, to Baibel be dahaka ia gwau?

⁵ Tomadiho oreadia idauidau taudia be edia tomadiho  gunalaia taudia bona hadibaia taudia dekenai idia lao badina idia ura diba dahaka dainai hisihisi be bada. Nega momo, tomadiho gunalaia taudia edia haere be, Dirava ena ura dainai hisihisi ia vara bona gabeai do ia vara gaudia ibounai, dika badadia danu, be idaunegai ia gwauraia hidi vadaeni. Idia ese momo idia hamaoroa Dirava be hehuni dala ai ia gaukara eiava ia ese taunimanima​—natudia danu​—edia mauri ia kokia, unai amo guba dekenai ia danu idia noho diba. Karoa gunadia dekenai ita dibaia bamona, Iehova Dirava ese gau dikana ta ia havaraia lasi. Baibel ia gwau: “Dirava be nega ta do ia kara dika diba lasi. Siahu Ibounai Dirava be do ia kerere lasi, lasi bona lasi momokani.”​—Iobu 34:10.

6. Dahaka dainai taunimanima momo idia gwau tanobada dekenai idia vara hisihisi be Dirava ese ia havaraia?

⁶ Dahaka dainai taunimanima idia gwau tanobada dekenai idia vara hisihisi ibounai be Dirava ese ia havaraia? Nega momo, Siahu Ibounai Diravana dekenai kerere idia atoa badina idia laloa ia be inai tanobada ena lohia. Baibel ese ia hadibaia mai anina bada hereva momokanina idia diba lasi. Inai buka ena Karoa 3 ai unai oi dibaia, inai tanobada ia lohiaia tauna korikorina be Satani Diabolo.

7, 8. (a) Edena dala ai tanobada ese ena lohia tauna ena kara ia hahedinaraia? (b) Edena dala ai kara dika bona idia “vara kava” gau dikadia ese hisihisi idia havaraia?

⁷ Baibel ia gwau: “Satani ese tanobada taudia ibounai ia gunalaia noho.” (1 Ioane 5:19) Bema unai oi laloa, do oi abia dae unai siri ena hereva be momokani, ani? Badina inai tanobada ese ita itaia diba lasi laumana, “tanobada taudia ibounai ia koia noho” tauna unai, ena kara ia hahedinaraia. (Apokalupo 12:9) Satani be inai heheni, koikoi bona dagedage tauna. Unai dainai ia lohiaia tanobadana be inai heheni, koikoi bona dagedage karadia amo ia honu. Unai dainai hisihisi be bada.

⁸ Hisihisi ia bada ena badina iharuana be Karoa 3 dekenai ita herevalaia vadaeni, Eden umana lalonai ia vara gwau-edeede karana dainai taunimanima be goevadae lasi bona kara dika taudia ai idia lao. Taunimanima idia ura ma haida idia biagua  dainai, tuari bona hisihisi ia vara. (Hadibaia Tauna 4:1; 8:9) Hisihisi ia vara ena badina ihatoina be gau dikadia idia “vara kava.” (Hadibaia Tauna 9:11) Iehova ese inai tanobada ia naria lasi dainai, taunimanima ese hisihisi idia davaria badina idia be nega bona gabu kererena ai idia noho.

9. Dahaka dainai ita diba momokani Iehova be badina namona ta dainai hisihisi ia koua lasi?

⁹ Ita moale badina ita diba Dirava ese hisihisi ia havaraia lasi. Taunimanima dekenai hisihisi ia havaraia gaudia hegeregere tuari, taravatu utua karadia, dagedage, eiava idia vara kava dika badadia be ia ese ia havaraia lasi. To namona be ita diba, Dahaka dainai Iehova ese hisihisi ia koua lasi? Bema ia be Siahu Ibounai Diravana, ia be mai ena siahu hisihisi ia haorea totona. To, dahaka dainai ena siahu ia gaukaralaia lasi? Ita diba Dirava be lalokau Tauna, unai dainai reana badina namona ta dainai unai bamona ia karaia lasi.​—1 Ioane 4:8.

10. Satani be dahaka ia hepapahuahulaia, bona edena dala ai unai ia karaia?

¹⁰ Dirava ese hisihisi ia koua lasi ena badina ita diba totona, namona be hisihisi ia matamaia dalana ita laloa. Satani ese Adamu bona Heva ia hakaua kerere bena Iehova idia gwau-edeede henia neganai, hepapahuahu hereva badana ta ia vara. Satani ese Iehova ena siahu ia hepapahuahulaia lasi. Badina Satani ia diba Iehova ena siahu be hetoana lasi. To, Satani ese Iehova ena lohia siahuna ena maoro ia hepapahuahulaia. Ia gwau Dirava be koikoi tauna, iena taunimanima ibounai dekenai gau namodia ia henia lasi, bona Iehova be lohia tauna dikana. (Genese 3:​2-5) Satani ia gwau bema Dirava ese taunimanima ia lohiaia lasi, namo bada do idia davaria. Unai neganai Satani ese Iehova ena lohia siahuna ena maoro ia hepapahuahulaia.

11. Dahaka dainai Iehova ese Eden umana dekenai gwau-edeede taudia ia hamasedia lasi?

¹¹ Adamu bona Heva ese Iehova idia gwau-edeede henia. Ia be hegeregere idia gwau: ‘Ai ura lasi Iehova be emai Lohia Tauna. Ai sibona ese dahaka be namo bona dahaka be dika ai abia hidi diba.’ Iehova ese unai hepapahuahu herevana be  edena bamona ia hamaoromaoroa? Edena dala ai guba bona tanobada taudia ia hadibaia diba unai gwau-edeede taudia idia kerere bona ia makaia dalana be dala hereadaena? Reana ta do ia gwau, Dirava ese unai gwau-edeede taudia ia hamasedia bena taunimanima ma haida ia havaraia lou be namo. To, Iehova ese ena ura ia gwauraia vadaeni, ia ura tanobada be Adamu bona Heva edia natudia ese idia hahonua bona tanobada paradaisona ai do idia noho. (Genese 1:28) Iehova be nega ibounai ena ura ia hagugurua. (Isaia 55:​10, 11) Unai sibona lasi, bema Dirava ese Eden umana dekenai unai gwau-edeede taudia ia hamasedia, unai ese Iehova ena lohia siahuna dainai ia vara hepapahuahu herevana do ia haerelaia lasi.

12, 13. Dahaka dainai Iehova ese Satani ia koua lasi inai tanobada ia lohiaia totona, bona dahaka dainai dala ia karaia taunimanima be sibodia idia lohiaia totona? Haheitalai gwauraia.

¹² Mani haheitalai ta ita laloa. Tisa ta be stiuden taudia dekenai matematik ena henanadai aukana ta ena haere davaria dalana ia gwauraia noho. Diba bada stiuden ta ia gwau-edeede bona ia gwau tisa ese unai henanadai ia haerelaia dalana be kerere. Ia gwau ia be unai henanadai ena haere davaria dalana namona ia diba, unai amo ia hahedinaraia unai tisa ia hegeregere lasi. Stiuden haida ese ena hereva idia abia dae, bona idia  danu idia gwau-edeede. Tisa be dahaka do ia karaia? Bema unai gwau-edeede stiuden taudia be klasrum amo ia luludia, stiuden ma haida be dahaka do idia laloa? Idia ese unai gwau-edeede stiuden tauna bona ena bamodia edia hereva do idia abia dae, a? Stiuden taudia ibounai ese tisa do idia matauraia lasi, badina do idia laloa tisa ia gari dainai ia ura lasi unai gwau-edeede stiuden ese ena hereva ia hakoikoia. Unai dainai tisa ese stiuden ia koua lasi, to ia hamaoroa klas taudia vairanai unai henanadai ena haere davaria dalana do ia hahedinaraia.

¹³ Unai tisa ia karaia karana be Iehova ia karaia karana hegeregerena. Namona be ita laloatao, Eden dekenai ia vara gwau-edeede karana be aneru milioni momo ese idia itaia. (Iobu 38:7; Daniela 7:10) Iehova ese unai gwau-edeede taudia ia kara henia dalana be mai anina bada aneru bona taunimanima ibounai dekenai. Unai dainai, Iehova be dahaka ia karaia? Iehova ese Satani ia koua lasi, to dala ia karaia unai amo Satani do ia hahedinaraia edena bamona ia ese taunimanima do ia lohiaia. Danu, Dirava ese taunimanima ia koua lasi Satani ena siahu henunai sibodia idia lohiaia totona.

14. Iehova ese taunimanima ia koua lasi sibodia idia lohiaia totona, unai ese dahaka namo ia havaraia?

¹⁴ Unai tisa be ia diba unai gwau-edeede stiuden bona ia idia bamoa stiuden taudia be idia kerere. To ia diba bema idia dekenai nega ia henia klas taudia vairanai edia hereva idia hamomokania totona, unai ese klas taudia do ia durua bada. Unai gwau-edeede stiuden taudia ese edia hereva idia hamomokania lasi neganai, kara momokani stiuden taudia ibounai do idia diba tisa sibona be ia hegeregere klas taudia ia gunalaia totona. Unai murinai bema tisa ese gwau-edeede taudia be klasrum amo ia luludia, ena badina do idia lalopararalaia. Unai hegeregerena, Iehova ia diba bema kudou-maoro taudia bona aneru ibounai idia itaia Satani bona ena bamodia ese edia hereva idia hamomokania lasi, bona taunimanima be sibona idia lohiaia diba lasi, unai amo idia diba Iehova sibona be lohia tauna maorona. Idaunegai tauna, Ieremia hegeregerena, idia ese inai mai anina bada hereva momokanina do idia dibaia: “Lohiabada e,  lau diba taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.”​—Ieremia 10:23.

15, 16. (a) Dahaka dainai Iehova ese kara dika ia koua haraga lasi? (b) Dahaka dainai Iehova ese taravatu utua karadia ia koua lasi?

¹⁵ Dahaka dainai Iehova ese kara dika ia koua haraga lasi? Bona dahaka dainai ita dekenai idia vara gau dikadia ia koua lasi? Unai tisa ese ia karaia lasi kara rua mani ita laloa. Gau ginigunana be, stiuden ia koua lasi, to ia hamaoroa unai henanadai ena haere davaria dalana ia hahedinaraia totona. Gau iharuana be, tisa ese unai gwau-edeede stiuden ena hereva ia durua lasi. Unai hegeregerena, Dirava ese ia karaia lasi kara rua mani ita laloa. Gau ginigunana be, Iehova ese Satani bona ena bamodia ia koua lasi edia hereva idia hamomokania totona. Unai ia karaia totona idia dekenai nega ia henia. Lagani tausen momo huanai, taunimanima be sibodia idia lohiaia totona gavamani idauidau idia haginia. Saiens bona gau ma haida dekenai taunimanima ese edia diba idia habadaia, to kara gageva, ogogami, taravatu utua karadia, bona tuari idia bada daekau noho. Unai amo ita itaia diba taunimanima be sibodia idia lohiaia diba lasi.

¹⁶ Gau iharuana be, Satani ese inai tanobada ia lohiaia lalonai, Iehova ese Satani ia durua lasi. Hegeregere, bema Dirava ese taravatu utua karadia ia koua, do ia hahedinaraia Eden lalonai gwau-edeede karana idia hamatamaia taudia edia hereva ia durua, ani? Unai amo taunimanima do idia laloa idia sibodia idia lohiaia diba bona dika do idia davaria lasi, ani? Bema Iehova be unai bamona ia karaia, ia be Satani ena koikoi herevana do ia durua. To, “Dirava ia koikoi diba lasi.”​—Heberu 6:18.

17, 18. Taunimanima edia lohia dalana bona Satani ena siahu dainai idia vara dika ibounai dekenai Iehova be dahaka do ia karaia?

¹⁷ To, Dirava idia gwau-edeede henia karana dainai idia vara hisihisi ibounai dekenai dahaka do ia vara? Laloaboio lasi Iehova be siahu ibounai Diravana. Unai dainai, ia ese taunimanima  edia hisihisi ibounai do ia haorea. Ita dibaia vadaeni bamona, ena be taunimanima ese tanobada idia hadikaia, to Dirava ese tanobada be Paradaiso ai do ia halaoa. Iesu ena mauri davana abidadama henia karana ese taunimanima edia kara dika do ia kokia bona toreisi lou dainai mase do ia ore. Dirava ese Iesu do ia gaukaralaia “Satani ena kara dika do ia haorea momokani totona.” (1 Ioane 3:8) Dirava ese ena nega korikorina ai unai ibounai do ia karaia. Ita moale, badina ia haheauka dainai hereva momokani ita dibaia bona ia ita hesiai henia diba. (2 Petero 3:​9, 10) Dirava ese mai momokani ida ia idia tomadiho henia taudia ia tahua noho bona idia ia durua inai tanobada dikana lalonai idia davaria hekwakwanai idia haheaukalaia totona.​—Ioane 4:23; 1 Korinto 10:13.

¹⁸ Bema Dirava ese Adamu bona Heva be do idia gwau-edeede diba lasi dalanai ia karadia, inai hisihisi ibounai do idia vara, a? Unai henanadai haerelaia totona, namona be Iehova ese oi dekenai ia henia harihari gauna namona oi laloa.

19. Iehova ese ita dekenai edena harihari gauna namo hereana ia henia, bona dahaka dainai unai ita laloa bada?

¹⁹ Karoa 5 dekenai ita dibaia bamona, Dirava ese taunimanima dekenai ura kwalimu ia henia. Unai be harihari gauna namo hereana, ani? Dirava ese animal momo herea ia karaia bona idia lalonai ia noho dibana ese idia ia biagua. (Aonega Herevadia 30:24) Taunimanima ese robot idia karaia, unai amo karaia taudia edia hahegani sibona idia badinaia. Bema Dirava ese ita be unai bamona ia karaia, do ita moale, a? Lasi, ita moale badina ita  sibona ita abia hidi diba edena bamona taudia ai do ita lao, edena mauri dalana do ita badinaia, edena bamona taudia do ita bamoa, bona unai bamona gaudia ma haida. Ita moale badina ita be mai iseda ura kwalimu bona unai be Dirava ena ura.

20, 21. Edena dala ai iseda ura kwalimu be dala maorona ai ita gaukaralaia diba, bona dahaka dainai unai bamona ita karaia be namo?

²⁰ Iehova ia ura lasi ma ta ese ita ia doria dainai ia ita hesiai henia. (2 Korinto 9:7) Haheitalai ta: Oi laloa tama eiava sina do ia moale bema ta ese natuna ia doria dainai ia gwau “oi lau lalokau henia” eiava do idia moale bema natuna be mai ena kudouna ibounai ida unai hereva ia gwauraia? Vadaeni namona be ita henanadai, Iehova ese oi dekenai ia henia ura kwalimu be edena bamona do oi gaukaralaia? Satani, Adamu, bona Heva ese edia ura kwalimu be dala kererena ai idia gaukaralaia. Idia ese Iehova Dirava idia dadaraia. Dahaka do oi karaia?

²¹ Oi be mai emu dala unai harihari gauna namo hereana, ura kwalimu, be dala namona ai oi gaukaralaia totona. Iehova ena kahana ai idia noho taunimanima milioni momo oi bamoa diba. Idia ese Dirava idia hamoalea, badina idia hahedinaraia Satani be koikoi tauna bona ia hegeregere lasi momokani taunimanima ia lohiaia totona. (Aonega Herevadia 27:11) Unai bamona oi karaia diba, bema mauri dala maorona oi abia hidi. Unai be karoa gabena ai do ita herevalaia.