Haida ese tanobada bona mauri gaudia idia hadikaia noho dainai taunimanima idia laloa momo. Diba bada taudia idia gwau, taunimanima be idia karaia gaudia amo mauri gaudia idauidau idia hadikaia bona momo idia mase noho.

 Taunimanima ese tanobada do idia hadikaia ore, a? Eiava havaraia gaudia ida do idia noho hebou diba, a?

 Diba bada taudia momo idia abia dae taunimanima ese tanobada bona mauri gaudia idia gimaia diba. To diba bada taudia ma haida idia gwau, bema taunimanima idia ura edia gaukara ese namo do ia havaraia, gau momo dekenai senisi idia karaia be namo. Senisi haida be hegeregere:

•   Tano, uda, swampa gabudia bona davara naria dalana idia hanamoa.

•   Uma karaia dala matamatadia bona paua (energy sources) abia daladia idauidau dibaia.

•   Aniani dekenai senisi karaia, unai amo taunimanima ese tano ai idia hadoa aniani gaudia do idia abia bona vamu hegeregere, meat bona gwarume ania karana do idia hamaragia bona gaukaralaia kerere lasi.

•   Namona be ita abia dae, mauri namona be tauanina gaudia abia karana sibona amo lasi.

 Dahaka oi laloa? Momokani, gavamani, bisinesi oreadia, bona ma haida be idia gaukara hebou diba, a? Eiava oi laloa unai do ia vara lasi, badina taunimanima be idia mataganigani, sibona edia namo idia laloa bada, bona vaira negana do idia laloa lasi, a?​—2 Timoteo 3:1-5.

 Baibel ese ita ia hadibaia iseda vaira negana be do ia namo. Bona ia hahedinaraia taunimanima be hegeregere lasi tanobada idia gimaia. To danu, Baibel ese senisi namona do ia vara dalana ia herevalaia.

 Taunimanima ese tanobada do idia hamauria lasi ena badina. Iehova a Dirava ese tanobada ia havaraia, bona taunimanima dekenai gaukara ia henia idia naria totona. (Genese 1:28; 2:15) Unai gaukara idia karaia namonamo diba, bema edia Havaraia Tauna ena hakaua dalana idia tahua bona idia badinaia. (Aonega Herevadia 20:24) To, Iehova idia dadaraia bona sibona edia mauri idia naria diba dalana idia abia hidi. (Hadibaia Tauna 7:29) Idia sibona ese tanobada idia naria be hegeregere lasi, bona edia hekwarahi ese gau ibounai do ia hanamoa lasi.​—Aonega Herevadia 21:30; Ieremia 10:23.

 Senisi ia vara be namo. Dirava ia ura taunimanima ese tanobada idia hadikaia karadia ia hadokoa. (Apokalupo 11:18) Tanobada gavamani bona taunimanima do ia kokia badina idia ese planeti idia hadikaia noho. (Apokalupo 21:1) Unai dainai, Iehova ia gwau: “Lau ese gau ibounai lau hamatamataia noho.”​—Apokalupo 21:5.

 Unai senisi do ia vara dalana. Dirava ena guba gavamani o iena Basileia ese taunimanima edia gavamani ena gabu do ia abia. Iesu Keriso ena hakaua henunai unai gavamani ese tanobada ibounai do ia lohiaia.​—Daniela 2:44; Mataio 6:10.

 Dirava ena Basileia ese taunimanima do ia hadibaia Dirava ena taravatu idia badinaia totona. Taunimanima ese edia Havaraia Tauna idia dibaia bona iena hakaua dalana idia badinaia neganai, idia be havaraia gaudia ibounai ida do idia noho namonamo. (Isaia 11:9) Baibel ese ia hahedinaraia Dirava ena gavamani ese ena sitisen taudia do ia durua, mauri mai moalena do idia noholaia, unai be mai ena namo planeti totona. Inai gaudia do ia karaia:

•   Ibounai be mai edia aniani.​—Salamo 72:16.

•   Tano do ia namo lou.​—Isaia 35:1, 2, 6, 7.

•   Taunimanima ese animal do idia naria bona animal ese taunimanima do idia dagedage henia lasi.​—Isaia 11:6-8; Hosea 2:18.

•  Disasta idauidau do idia vara lasi.​—Mareko 4:37-41.

 Kahirakahira Dirava ena Basileia ese senisi namodia do ia karaia. Heduru hereva ma haida totona, inai atikol duahia; “Edena Nega ai Dirava Ena Basileia ese Tanobada Do Ia Lohiaia?”