Tomadiho momo ese taunimanima idia durua lasi Dirava idia tomadiho henia totona, to moni karaia dalana sibona idia laloa. Unai oi itaia danu, a? Edia kohu gaudia idia hoihoilaia. Edia dubu gunalaia taudia dekenai moni badadia idia pei bona taga maurina idia noholaia. Mani inai oi laloa, hegeregere:

•   Ripoti ta ese ia hahedinaraia lagani 13 mai kahana lalonai, Katolik bisop ta be nega 150 private jet amo ia lao mai, bona limousine motuka ai ia loaloa be nega 200 mai kahana bamona, bona dubu ena moni amo ia ese unai gaudia edia davana ia karaia. Danu ia be dubu ena ruma ta ai ia noho, bona 4 milioni dola mai kahana be unai ruma hanamoa totona ia gaukaralaia.

•   Africa tanona ai, taunimanima tausen momo be hanaihanai dubu ena haroro tauna ta ese ia karaia tomadiho dekenai idia mai. Iena dubu badana lalonai, gau idauidau ia hoihoilaia hegeregere, iena “oela ta be hoa karadia totona” bona tauele bona T-siedi. Bona unai tomadiho dekenai idia lao taudia momo be idia ogogami, to ia be taga bada tauna.

•   China ena Buddhist tomadiho ena ororo foa amo, rua be pablik kampani lista ai idia noho . Bona taunimanima idia diba momo Shaolin Temple be bisinesi totona idia gaukaralaia momo. Ena gunalaia tauna be idia gwauraia “CEO monk.”

•   America ena bisinesi momo ese tomadiho taudia dekenai moni idia henia, edia gaukara taudia totona tomadiho karadia bona daladia idia hadibaia.

 Taunimanima ese moni davaria totona tomadiho be bisinesi ai idia halaoa karana be edena bamona oi laloa? Dirava ese unai bamona taudia be edena bamona ia laloa?

 Dirava be unai ia abia dae lasi. Baibel ese ia hahedinaraia, idaunegai hahelaga taudia idia gwau Dirava totona idia gaukara. To idia be “davana abia totona” edia hahediba gaukarana idia karaia. Bona Dirava be edia kara dekenai ia moale lasi. (Mika 3:11) Taunimanima ese edia mataganigani bisinesi karadia amo Dirava ena tomadiho gabuna be “henaohenao taudia edia kohua” ai idia halaoa dainai, Dirava ese idia ia gwauraia dika.​—Ieremia 7:11.

 Danu, Iesu ese unai karadia ia inai henia momokani. Iena nega ai, tomadiho gunalaia taudia ese davana abia totona Ierusalema ena dubu lalonai bisinesi taudia idia abia dae, edia kohu idia hoihoilaia totona. Unuseniai, tomadiho totona idia mai kudou-maoro taudia amo moni idia abia. Iesu be mai gari lasi ida koikoi bisinesi taudia be dubu helaga lalonai ia luludia raka-lasi, bona ia gwau: “Namo lasi egu Tamana ena ruma be maketi gabuna ai umui halaoa!”​—Ioane 2:14-16.

 Iesu be hesiai gaukara ia karaia neganai, Dirava ena laloa dalana ia hahedinaraia. (Ioane 8:28, 29) Taunimanima dekenai Dirava ia hadibaia neganai, idia amo davana ia abia lasi. Ena be hoa dalanai hitolo taudia ia ubua, gorere ia hanamoa, bona mase taudia ia hatoreaisi to, davana abia totona ia hereva lasi. Iesu be taga tauna ai ia lao totona ena hesiai gaukara ia karaia lasi. Danu ia be ruma ta ia biagua lasi.​—Luka 9:58.

 Iesu ese ena hahediba taudia ia hamaoroa, namo lasi edia tomadiho gaukaradia be moni abia totona idia karaia. Ia gwau: “Umui abia davana lasi, umui henia davana lasi.” (Mataio 10:8) Iesu murinai idia raka taudia ginigunadia, gabeai idia gwauraia Keristani taudia ese Iesu ena hereva idia badinaia. Haheitalai haida mani ita itaia:

•   Tau ta ladana Simona be siahu bona dagi ia ura abia totona, Aposetolo Petero, Iesu ena hesiai gaukara lalonai ia bamoa tauna, dekenai moni ia henia. To Petero be maoromaoro Simona ese ia henia moni ia dadaraia bona ia hamaoroa: “Namona be emu siliva moni be oi ida ia dika hebou. Oi laloa moni amo Dirava ese ai dekenai ia henia davana lasi harihari gauna do oi abia, a?”​—Kara 8:18-20.

•   Momo idia diba aposetolo Paulo be misinari loaloa gaukarana ia karaia. Ena be lagani momo lalonai Keristani kongrigeisen totona ia gaukara goada, to iena gaukara ena davana abia totona ia hereva lasi. Ia bona ena Keristani tadikaka be “taunimanima momo bamona Dirava ena hereva [idia] hoihoilaia lasi.” (2 Korinto 2:17) Bona ia gwau: “Umui dekenai Dirava ena sivarai namona ai harorolaia neganai, ai be dina bona hanuaboi ai gaukara, unai amo umui ta dekenai metau ai henia lasi.”​—1 Tesalonika 2:9.

 Oibe, Keristani ginigunadia be tauanina dalanai heduru idia abia totona moni haida idia abia be namo. To edia hesiai gaukara totona davana idia noia lasi. Taunimanima be edia ura hegeregerena idia henia diba, Baibel ena hakaua hereva hegeregerena:

•   2 Korinto 8:12: “Badina bema ta be mai ena ura ida gau ta ia henia, Dirava ese unai henia karana do ia abia dae. Ia dekenai ia noho gauna hegeregerena ia henia, to ia dekenai ia noho lasi gauna ia henia lasi.”

   Unai ena anina: Ta ena henia karana ena badina be gau badana, to hida ia henia be gau badana lasi.

•   2 Korinto 9:7: “Namona be ta ta ese edia kudouna ai idia laloa vadaeni gauna hegeregerena do idia henia. Namo lasi mai lalohisihisi ida eiava ta ese ia doria dainai idia henia, badina mai moale ida ia henia tauna be Dirava ese ia lalokau henia.”

   Unai ena anina: Dirava ia ura lasi tau ta ese ita ia doria dainai henia karana ita hahedinaraia. To ta ese iena ura dainai ia henia neganai, Dirava be unai ia moalelaia.

 Baibel ai ia hedinarai, Dirava ese tomadiho edia kara idauidau ia abia dae lasi. (Mataio 7:21-23) Baibel ena peroveta hereva hegeregerena, tomadiho koikoi oreadia ibounai be ariara hahine ta bamona, badina moni totona gavamani ida idia gaukara hebou bona tanobada besedia ibounai amo moni idia abia. (Apokalupo 17:1-3; 18:3) Danu unai peroveta herevana ese ia hahedinaraia, tomadiho koikoi be kahirakahira Dirava ese do ia hahemaoro henia.​—Apokalupo 17:15-17; 18:7.

 Dirava ia ura lasi taunimanima be tomadiho koikoi ena kara dikadia ese ia hakaua kerere, eiava ia koudia ia kahirakahira do idia lao totona. (Mataio 24:11, 12) Dirava ese kara momokani idia karaia taudia ia hagoadaia, ia abia dae tomadiho dalana ai ia do idia tomadiho henia bona tomadiho koikoi amo do idia heau siri dalana idia dibaia totona.​—2 Korinto 6:16, 17.