Helaro Ia Henia Hahediba Herevadia
Dirava ia gwauhamata kahirakahira senisi do ia karaia. Ia ese hisihisi do ia haorea bona tanobada ai taunimanima edia mauri do ia hanamoa. (Salamo 37:11) Dahaka dainai unai gwauhamata hereva ita abidadama henia diba? Badina “Dirava be taunimanima bamona lasi, ia hereva koikoi lasi.” (Numera 23:19) Iseda Havaraia Tauna ese do ia karaia gau namodia haida do ita laloa.
Dirava ese Kara Dika Taudia Do Ia Kokia
“Kara dika taudia be ava dikadia bamona idia tubu daekau bona kerere taudia be mauri namona idia abia neganai, dika bada do idia davaria.”—SALAMO 92:7.
Inai atikol ena kahana haida ai ita dibaia bamona kara dika be ia bada ia lao noho. Unai ita diba badina 2 Timoteo 3:1-5 ai Baibel ia peroveta, “dina gabedia” ai taunimanima edia kara be do ia dika momokani. “Dina gabedia” ena anina be dahaka? Hari inai negai Dirava idia kamonai henia lasi taudia ia herevalaia. Kahirakahira, Dirava ese edia kara dikadia idia ura lasi haidaua taudia do ia haorea. Bena, taunimanima namodia, Dirava idia ura badinaia taudia sibona be tanobada ai do idia noho. “Kara maoromaoro taudia be tanobada do idia abia, Bona tanobada ai do idia noho ela bona hanaihanai.”—Salamo 37:29.
Dirava ese Satani Do Ia Haorea
“Maino ia henia Diravana ese . . . Satani . . . do ia moia diho momokani.”—ROMA 16:20.
Kara dika taudia, bona Satani mai ena demoni be do idia noho lasi, unai dainai tanobada ibounai dekenai maino do ia noho hanaihanai. Iseda Havaraia Tauna ia gwauhamata: “Tau ta ese [oi] do ia hagaria lasi.”—Mika 4:4.
Dirava ese Gorere Bona Mase Do Ia Haorea
“Dirava ena palai rumana be taunimanima ida ia noho, . . . Bona ia ese mata ranu ibounai be edia matana amo do ia dahua ore, bona mase, lalohisihisi, taitai, bona hisihisi be do idia ore.”—APOKALUPO 21:3, 4.
Hisihisi bona gorere be do idia ore badina Dirava ese Satani, Adamu, Heva bona iseda goevadae lasi karadia ese idia havaraia dika ibounai do ia haorea. Danu ‘mase be do ia ore.’ Havaraia Tauna idia lalokau henia bona ia idia badinaia taudia be do idia noho ela bona hanaihanai. To edeseniai do idia noho?
Iseda Havaraia Tauna ese Tanobada be Paradaiso ai do Ia Halaoa
“Taunimanima lasi gabuna bona ranu lasi tanona do idia moale, Bona tano kaukau palakana do ia moale bona flaoaflaoa amo do ia honu.”—ISAIA 35:1.
Dirava ese kara dika ia haorea neganai, tanobada be paradaiso ai do ia lao! Gabu ibounai ai flaoaflaoa hairaidia do idia tubu bona gabu ena toana be do ia namo herea, bona uma aniani momo herea do idia tubu. (Salamo 72:16) Davara, gohu, bona sinavai be do idia goeva bona mauri gaudia amo do idia honu. Taunimanima ese inai hereva, “tanobada be ia miro” do idia gwauraia lasi! Taunimanima be idia haginia rumadia do idia biagua bona noholaia. Bona tau ta do ia gwau lasi, ia be ruma lasi, ia hitolo eiava ia ogogami.—Isaia 65:21, 22.
Dirava ese Mase Taudia Do Ia Hamauria
“Do idia toreisi lou.”—KARA 24:15.
Oi ura idia mase lalokau taudia oi itaia lou, a? Siahu Ibounai Diravana ese idia do ia hamauria, tanobada Paradaisona ai do idia toreisi lou. Idia do oi laloatao, bona oi do idia laloatao danu. Do umui mamia moalena mani oi laloa! Dahaka dainai ita diba unai do ia vara momokani? Badina Baibel lalonai, Dirava ese taunimanima badadia bona natudia ia hamauria bona edia famili ida idia noho lou ena sivarai idia noho. Danu, nega momo Iesu be taunimanima momo vairanai mase taudia ia hatoreaisi lou.—Luka 8:49-56; Ioane 11:11-14, 38-44.
Reana Inai Danu Oi Ura
NOGA!
Hekwakwanai Tanobadana ai—Emu Helaro Oi Gimaia
Baibel ese ita ia durua mauri ena hekwakwanai ita haheaukalaia bona nega vaira totona helaro ia henia.
