ALEXANDRA be South America ena tano ta ena boda amo ia ura hanaia lao tano ma ta dekenai, bona basi ai ia helai noho lalonai inai hereva ia kamonai: “Basi ia heau diba, to inai China tauna be do ia noho!” Ia vara gauna itaia totona basi amo ia diho bona ia itaia unai China tauna be ia hekwarahi, Spanish gado ai boda ia naria tauna dekenai ena hekwakwanai ia gwauraia totona. Alexandra be Iehova ena Witnes taudia edia China gado kongrigeisen ta ia lao henia. Unai dainai unai nega ai, sibona ia volantia bona unai China tauna ena hereva be Spanish gado dekenai ia hahanaia.

Unai China tauna ia gwau ia be unai tano ena sitisen ta, to raskol taudia ese ia amo ena pepa maorodia bona moni idia dadia. Matamanai, ofesa tauna ese unai sivarai ia abia dae lasi, bona danu ia laloa Alexandra be taunimanima idia hoihoilaia oreana (human trafficking) totona ia gaukara. To gabeai, unai China tauna ena hereva ia abia dae bona pepa maorodia be lasi dainai, fine monina ia henia. To ia be moni lasi dainai Alexandra ese 20 dola (eiava 60 kina) ia henia. Unai tau ese Alexandra ia tanikiu henia bona ia gwau, ia henia 20 dola be mai ena profit danu do ia haloua. Alexandra ese ia hadibaia, ia henia moni be davana abia lou totona ia henia lasi, to ia moale badina ia mamia unai be kara namona. Danu, ia dekenai Baibel bukadia haida ia henia bona ia hagoadaia Witnes taudia ida Baibel ia stadilaia totona.

Ma haida ese idia diba lasi taudia dekenai hebogahisi karana idia hahedinaraia ena sivarai oi kamonai neganai, oi moale, ani? Unai bamona hebogahisi karana be dubu idia lao bona dubu idia lao lasi taudia ese idia hahedinaraia danu. Oi sibona emu ura oi dadaraia bona unai bamona hebogahisi karana oi hahedinaraia diba, a? Unai henanadai be mai anina bada, badina Iesu ia gwau: “Henia kara ena moale be bada, abia kara ena moale be maragi.” (Kara 20:35) Danu saiens taudia edia tahua gaukara lalonai idia davaria henia karana be mai ena namo. Mani unai ena dala haida ita itaia.

Ekspiriens momo ese idia hahedinaraia inai hereva rua, henia karana bona moale be idia gaukara hebou. Aposetolo Paulo ia gwau: “Mai moale ida ia henia tauna be Dirava ese ia lalokau henia.” Ia be Keristani taudia ia herevalaia, badina nega aukadia lalonai, edia moni idia gaukaralaia edia abidadama Keristani taudia ma haida idia durua totona. (2 Korinto 8:4; 9:7) Paulo be ia gwau lasi, unai idia karaia badina idia moale. Lasi. To ena hereva ena anina be, idia moale badina henia karana idia hahedinaraia diba.

Oibe, tahua gaukarana ta ese ia hahedinaraia, henia karana ita karaia neganai, unai ese “eda kwarana harana ena kahana ta ai hemami namodia ia havaraia, hegeregere moale, taunimanima ida noho hebou ena hemami, bona ta abidadama henia karana ena hemami ia havaraia.” Tahua gaukara ma ta ese ia hahedinaraia, “ma ta dekenai moni henia karana ese moale ia havaraia, badina iena moni be ia sibona totona ia gaukaralaia lasi to ma haida totona ia hariharilaia.”

Nega ta oi laloa emu noho dalana o moni davaria dalana be auka dainai ma haida oi durua totona be ia auka, a? To momokani, ita ibounai be “mai moale danu  ia henia tauna” ese ia abia moalena ita abia diba. Bema mai badina maorona ida ita henia, moni sisina ita henia diba. Iehova ena Witnes hahinena ta be inai magasin idia halasia taudia dekenai inai revareva bona ena kontribusen ia siaia, bona ia gwau: “Kontribusen henia totona lau hegeregere lasi, to lagani ta ta ai moni sisina sibona be Kingdom Hall dekenai lau atoa diba.” Ma ia gwau: “Iehova Dirava ese lau dekenai ia henia lou gauna ese egu kontribusen ia hereaia. . . . Lau tanikiu badina inai kontribusen lau siaia diba, unai ese egu lalona ia hamoalea.”

Henia karana be moni sibona amo lasi. To henia karana be dala idauidau ai ita hahedinaraia diba.

Baibel ia gwau: “Mai ena bogahisihisi tauna ese, sibona ena namo ia havaraia noho, to dagedage tauna ese, ia sibona ia hisihisi henia noho.” (Aonega Herevadia 11:17) Hebogahisi taudia be hariharibada karana idia hahedinaraia, mai ura bada ida sibona edia nega, goada bona ma gau haida idia henia ma haida durua totona. Unai ese dala idauidau ai idia ia durua, to unai sibona lasi, hariharibada karana ese edia helt ia durua danu.

Tahua gaukara ese idia hahedinaraia, ma haida idia durua taudia be edia tauanina ai hisihisi sisina idia mamia bona idia lalometau momo lasi. Gau badana be, edia mauri idia moalelaia. Bona hariharibada karana ese gorere badadia hegeregere, multiple sclerosis o HIV idia abia taudia ia durua bada. Danu idia hahedinaraia, inuinu kekero karana idia ura rakatania taudia be ma haida idia durua neganai, do idia lalometau momo lasi bona unai ese idia do ia durua kekero karana idia dadaraia totona.

Unai hegeregerena, “bema ma haida ita hebogahisi henidia, bona durudia, hemami dikadia ita hanaia diba.” Henia karana ese lalometau bona eda tauanina ena rara presa ia hamaragia diba. Bona mase amo edia lalokau adavana idia haboioa taudia be ma haida idia durua neganai, edia lalohisihisi ia maragi ia lao diba.

Unai oi daradaralaia lasi. Henia karana ese oi dekenai namo ia havaraia diba.

Iesu ese ena murinai idia raka taudia ia hagoadaia, ia gwau: “Henia kara do umui manadalaia, vadaeni taunimanima ese umui dekenai do idia henia. Emui rami do idia hahonua, do idia pataia diho, bona do idia hamarerea, bona do idia hahonua noho ela bona do idia bubua. Badina ma haida dekenai umui henia sikele hegeregerena, umui dekenai unai bamona sikele do idia henia.” (Luka 6:38) Bema henia karana oi hahedinaraia, taunimanima be emu hariharibada karana dainai oi do idia hanamoa bona idia danu be oi do idia tohotohoa. Henia karana ese gaukara hebou bona hetura karana ia havaraia.

Taunimanima edia mauri stadilaia taudia idia davaria “ma haida edia namo idia laloa bada taudia edia kara ese ma haida ia hagoadaia idia danu be unai bamona idia karaia totona.” Momokani, “ma haida dekenai hebogahisi idia hahedinaraia taudia edia sivarai duahia karana ese momo ia durua unai kara idia hahedinaraia totona.” Unai hegeregerena, tahua karana ta ese ia hahedinaraia, “tau tamona ese ma haida edia mauri ia haidaua diba, herevana idia ia diba  eiava lasi.” Danu, tau tamona ena hariharibada karana ese gabu eiava komiuniti ta ai idia noho taudia ia durua, idia danu be unai kara idia hahedinaraia totona. Oi ura unai bamona gabu ta dekenai oi noho, a? Oibe, namo bada do oi davaria bema taunimanima momo be henia karana idia hahedinaraia.

Florida, U.S.A ai, unai bamona sivarai ta ia hahedinaraia. Lai badana ta ese dika bada ia havaraia murinai, Iehova ena Witnes taudia edia grup ta be idia volantia haida durua totona. Lai ese ia hadikaia rumana ai ruma hanamoa kohudia idia naria noho lalonai, idia itaia neiba ta ena geiti be ia dika, bona ena geiti idia hanamoa. Daudau lasi murinai, unai neiba tauna be Iehova ena Witnes taudia edia hedikwota dekenai revareva ta ia torea, ia gwau “Lau tanikiu bada, lau itaia taunimanima ma haida amo inai taudia be namo herea momokani.” Iena tanikiu karana ia hahedinaraia totona, moni sisina ia siaia Witnes taudia edia gaukara durua totona.

Saiens edia tahua gaukarana ese ia hahedinaraia, “taunimanima dekenai inai ura goadana ia noho ma haida idia durua totona.” Unai stadi ese ia hahedinaraia, “natudia be idia do herevahereva lasi neganai, unai kara idia diba vadaeni.” Dahaka dainai? Baibel ia gwau, Dirava ese taunimanima ia karaia neganai “ena toana hegeregerena ia karaia,” unai dainai idia ese iena kara idia hahedinaraia.—Genese. 1:27.

Kara namodia ibounai amo, iseda Havaraia Tauna, Iehova Dirava, ena kara badana be hariharibada karana. Ia ese ita dekenai mauri bona ita idia durua totona do ita moalelaia gaudia ibounai ia henia. (Kara 14:17; 17:26-28) Iseda guba Tamana bona iena ura ita totona do ita dibaia bema iena Hereva, Baibel, ita stadilaia. Danu unai buka ai Dirava ese vaira negana ena moale ia herevalaia. * (1 Ioane 4:9, 10) Iehova Dirava be hariharibada Diravana bona ita be iena toana hegeregerena ia karaia dainai, bema henia karana ita hahedinaraia, ita be Dirava ita tohotohoa bona hahenamo do ita abia bona ita do ia lalonamo henia.—Heberu 13:16.

Matamanai ita herevalaia hahinena Alexandra, oi laloatao? Dahaka ia vara? Ena be ia badinai ia helai tauna ia gwau Alexandra be ena moni ia halusia kava, to ia durua tauna ese unai basi do ia stopu gabunai idia noho turadia ia rini henidia, bena Alexandra ena moni do idia haloua. Danu, unai tauna be Alexandra ena hereva hegeregerena Baibel ia stadilaia matamaia. Hua toi murinai, Peru ai, Iehova ena Witnes taudia edia China gado hebouhebouna dekenai unai tauna ia davaria neganai, ia moale bada. Alexandra ese ia karaia gaudia ibounai dainai ena tanikiu karana ia hahedinaraia totona, Alexandra bona ia ida idia lao taudia be iena restaurant dekenai ia boiridia.

Henia karana bona ma haida durua karana ese moale bada ia mailaia. Bema unai bamona oi karaia noho, taunimanima oi durua diba, harihari gaudia namodia ia henia Tauna, Iehova Dirava idia dibaia namonamo totona! (Iamesi 1:17) Oi be henia karana ena hahenamo idauidau oi moalelaia, a?