OTJA kOmatwako wa Moses, okutjita otuyano tja ri otjiṋa otjiyakurwa. Posi yokutja oruveze Jesus tja ri ko, otuyano twa utwa okuungurisiwa tjinene nga Ovajuda tjaave tjiti oruyano kotjiṋa atjihe tji mave hungire. Owo aave tjitire okuraisa kutja oviṋa mbi va hungire ouatjiri, posi yokutja Jesus wa raisa onyengo kovitjitwa mbi. Neye wa honga kutja, “Omambo weṋu ngaye rire ii, ii na indee, indee.”—Mat. 5:33-37; 23:16-22.

Embo ndi o-Theological Dictionary of the New Testament ma ri tja: “Ovajuda va suverere okuyana, okuraisa kutja oviṋa mbi mave hungire ouatjiri.” Ihi tja raisiwa membo ndi o-Talmud ndi raisa kutja otuyano tuṋe tu matu sokuṱakamisiwa, nokutja ootuṋe tu matu yenene okuteyewa.

Jesus kangwa ri omundu erike ngwa pirukira ovitjitwa vyoposyo mbi. Otjotjihorera, omutjange womakuruhungi wOvajuda wena Flavius Josephus wa tja nai ohunga nongamburiro yOvajuda: “Owo kave vanga okuyana, nu okuyana ve ku vara otjotjiṋa otjivi pokukora ovizeze. Nu ve tja omundu ngu tjita oruyano mena rokuvanga kutja varwe ve kambure mu ye, omundu omunavizeze.” Embo rOvajuda ndi tjiukwa otja Wisdom of Sirach wina ra tja: “Omundu ngu yana, omurunde tjinene.” Kunao, Jesus wa nakaura okuyana ohunga noviṋa mbi heri ohepero. Indu aruhe tji matu hungire ouatjiri, katu nokuhepa okuyana kutja varwe ve kambure mu eṱe.