EPU ROKOMBANDA | OMBEIBELA EMBO NDA TUURUNGA
Ombeibela ya tuurunga omanyoneno
OMATOKERO: Ovanane ovengi wopolotika nozongamburiro vari noumune mbwaa u vetasana otjiuru nombuze yOmbeibela. Potuingi, owo aave ungurisa ouvara wawo okutjaera ovandu okukara nOmbeibela, okupitisa poo okuitoroka. Tara kovihorera vivari mbi:
Mombura ndji ape 167 K.O.Z.: Ombara Antiochus Epiphanes wouhona wa Seleucid, ngwaa kondjo okuṋiṋikizira ongamburiro yOvagrike mOvajuda wa rakiza kutja omatjangwa ayehe wOtjiheberi ye nyonwe. Heinrich Graetz omunamakuruhungi wa tjanga kutja, ovandu mba ri kehi ya Antiochus “aave taura nokunyosa omambo omamangwa, mu mwa tjangerwe Ozoveta indu tji veye munu, nokuzepa imba mbaave kondjo okupaha omasa nomahuhumiṋino moviṋa mbyaave lese.”
Ozombura ape 800 nḓa kapita: Ovanane tjiva vOkatolika aave pindike indu ouṋepo wawo tji mau hungire ohunga nomahongero wOmbeibela pendje nomahongero wawo oveni, nu indu tji wa vazewa nomambo wOmbeibela nge heri Omapsalme nga tjangwa mOtjilatin aau varwa otjovapirukire. Orutu orunane rwokereka imwe rwa rakiza ouṋepo wawo “okupaha nawa ovapirukire aruhe . . . mozondjuwo azehe na motuveze two kehi yehi mbaave hakerwa mokukara nomambo wOmbeibela. . . . Ondjuwo mu mwa vazewa omupirukire aai nyonwa.”
Andakuzu ovanavita wOmbeibela va toṋa mokuinyona, ombuze yOmbeibela atja i zenga oparukaze.
Ombeibela yOtjiingirisa ndja torokwa i William Tyndale ya tuurunga nandarire kehi yomatjaerero, omanyosiro nonḓiro ya Tyndale omuini mombura ndji 1536
OMUANO OMBEIBELA MU YA TUURUNGA: Ombara Antiochus ee ripurire kehi ra Israel, posi yokutja Ovajuda tjandje va katura momahi warwe pekepeke. Ku nao, ovakonḓonone ve haka kutja meserewondo etenga O.Z., Ovajuda mbari kombanda yozoperesende 60 va katura pendje na Israel. Ovajuda aave ṱizire omatjangwa mozondjuwo zawo zomaworonganeno wombongo, nu omatjangwa otjingewo aaye ungurisiwa i yozondekurona zawo nOvakriste wina.—Oviungura 15:21.
Mozombura ape 800 nḓa kapita, ovandu mba suverere Ombeibela va tuurunga ondatumisire nu va kayenda komurungu okutoroka nokutjangurura omatjangwa. Nandarire ngunda omahina ndji tjanga nokupirinda ai hiya ungurwa mokati keserewondo 15, otupa twOmbeibela mape ya twa ri momaraka 33. Kombunda yanao, Ombeibela ya torokwa nokupitisiwa tjimanga.
KWA KONGORERA TJIKE?: Nandarire kehi yomapirukiro okuza kozombara ozonamasa novanane vozongamburiro mbaave pukisa ovandu, Ombeibela ondi ri embo nda handjauka tjinene mouye nu nda torokwa momaraka omengi mekuruhungi. Oyo ya rundurura ozoveta nomaraka momahi tjiva na wina ehupo rovandu ovengi.
Mo yenene okutara ku imbi wina
OZOPROGRAMA NḒE RAISA OVIṊA MBYA TJITWA TJIRI
Owo va raisa ondengero kOmbeibela—Okarupa okasupi (William Tyndale)
Okupitira moviungura mbya ungura eye wa raisa kutja wa suverere Ombeibela, nu eṱe ndino tu muna ouwa mena roviungura vye oviwa mbyo.
