Hapo Ovahongonone va Jehova ve nOmbeibela yawo oveni?

NYANDA MO

Ovahongonone va Jehova va ungurisa Ozombeibela ozengi pekepeke tjaave konḓonona Ombeibela. Ombeibela i ri momaraka pekepeke, posi yokutja eṱe tu ungurisa o New World Translation of the Holy Scriptures mena rokutja ya ungurisa ena ra Mukuru, ya torokwa osemba, nu i zuvakwa nawa.

Ya ungurisa ena ra Mukuru. Ovapitise tjiva wOmbeibela ka ve toṋene okuyandja ohiviro komutjange wayo. Otjotjihorera, Ombeibela imwe yatamuna omana yovandu mbe ri kombanda 70 mba kara norupa momapitisiro wayo. Posi yokutja Ombeibela otjingeyo ya pitisa ena romutjange ndi ri Jehova Mukuru

Kunao, Ombeibela ndji New World Translation ya yarurapo ena ra Mukuru potuveze pu ra sokukara otja pu ra ri pomautiro, nu okomiti ndja pitisa omatorokero nga kai vanga okutjiukwa.
Ya torokwa osemba. Kamatorokero aehe wOmbeibela nge toroka ombuze ongahu otja komatjangwa inga omatenga. Otjotjihorera, omatorokero yemwe ya toroka nai mu Mateus 7:13: “Hitireye momuvero omumango, mena rokutja omuvero mbu yenda kotjovasengwa omuparanga nu ondjira ndji yenda ngo oyo ombupu.” Posi yokutja, omatjangwa inga omatenga ya ungurisa embo ndi “ombandjarero,” nu ka ye ungurisire “otjovasengwa.” Ngahino ovatoroke va ungurisa embo ndi “otjovasengwa” mena rokutja aave kambura kutja ovarunde mave kapya motjovasengwa nga aruhe. Posi yokutja Ombeibela kai hongo nao. Nungwari, Ombeibela ndji New World Translation i hungira oukahu kutja: “Hitireye momuvero omumango, mena rokutja omuvero mbu twara kombandjarero omuparanga.”
I zuvakwa nawa. Omatorokero omawa ka ye sokutorokwa osemba uriri nungwari ye sokurira omakahu nu ye sokuzuvakwa nawa. Tara kotjihorera hi, mOvaroma 12:11 EEP, omuapostele Paulus wa ungurisa embo ndi heya kutja “mombepo kareje noupju.” Mena rokutja embo ndo ka ri zuvakwa nawa moruveze rwa nambano, o New World Translation ya toroka ezeva ndo momuano mbu mau zuvakwa nawa. Oyo itja Ovakriste ve sokukarera Mukuru “noupyuke.”

Pendje nokutja ya ungurisa ena ra Mukuru, ya torokwa osemba, nongahu, o New World Translation i notjiṋa tjarwe tji tja panguka: Oyo ya handjaurwa otjari. Kunao ovandu ovengi ve yenena okulesa Ombeibela me raka rawo oveni, nandarire imba mbe ha yenene okuranda Ombeibela yawo oveni.