Kena 7 September 2019, Bup Kudus Salin Dunya Baru dikeluarka dalam bansa jaku Czech enggau Slovak. Menyadi Stephen Lett, seiku ari Raban ti Ngiring ngeluarka Bup Kudus tu, ba aum ti spesial di Ostrava, Czech Republik. Ba program tu, bisi 25,284 iku orang datai, nyengkaum ba 200 iti bengkah endur ke bukai ba Menua Czech Republik enggau Slovakia.

Tiap iti tim penyalin begunaka lebih ari empat taun nembuka pengawa tu. Salin tu amat beguna laban senang dibacha. Seiku ari tim penyalin ke dalam bansa jaku Slovak madahka, “Mayuh orang rindu agi macha Bup Kudus tu laban bansa jaku ke dikena senang agi, sereta terang. Sida majak deka nemu cherita iya, lalu enggai ngetu macha.”

Bup Kudus tu meri penguntung ngagai 15,000 iku Saksi ba Czech Republik, enggau lebih ari 11,000 ba Slovakia. Seiku ari tim penyalin dalam bansa jaku Czech madahka, “Bup Kudus Salin Dunya Baru tu ngenataika jaku asal, tang ngena leka jaku ti pandak agi, sereta leka jaku ke senang dikena orang kemayaharitu. Bup Kudus tu senang, ukai aja ke orang ti udah lama dalam pemendar, pia mega sida ti baru, indah ba sida ke nembiak.”

Bup Kudus Salin Dunya Baru tu udah disalin penuh tauka sebagi ngagai 184 iti bansa jaku, nyengkaum edisyen penuh ngagai 29 iti bansa jaku ke diambi ari edisyen 2013. Seraya Bup Kudus tu udah dikeluarka, kami ngarapka semua pemendar ari Bup Kudus ulih negu ati orang ke macha.—Luke 24:32.