Mayuh laki bini ngasaika tusah ka berandau enggau pangan diri, indah lebuh seduai iya benung begulai. Nama kebuah tu tau nyadi?

•  Semak tang jauh—nama kebuah?

•  Utai ke ulih dikereja nuan

•  Dingaka runding laki bini ke bukai

•  Utai ke ulih dikerandau

•   Lelak

   “Suah iya, lebuh kami bisi awak, sekalika nya aku tauka laki aku udah sama bela lelak. Nambahka nya, enti aku lelak, aku jampat mangah. Nyadi, manah agi kami meda TV aja.”—Anna.

•   Kisuk enggau talipun tauka tablet

   “Media sosial tauka pemerindang ke bisi ba Internet masau mayuh jam. Kitai ulih meda nya bejam-jam lalu enda berandau enggau kaling diri, taja pan kitai sama bela dia.”—Katherine.

•   Enda sebaka hobi

   “Sepengudah laki aku pulai kereja, iya lalu kisuk enggau hobi diri empu. Amat, iya begunaka awak kediri pengudah kereja sepemanjai hari, tang aku pan ka kami bisi awak begulai enggau pangan diri.”—Jane.

•   Kereja

   “Ketegal bisi teknologi, barang maya pan kitai ulih kereja, indah maya kitai begulai enggau diri sebilik. Nyadi, suah iya aku ngena awak ke patut dikena aku enggau bini aku, nyaut email sereta mesej pasal kereja.”—Mark.

•   Kingatka, awak begulai enggau kaling nuan nya amat beguna.

   Prinisp Bup Kudus: “Nemu milih utai ti pemadu badas.”—Pilipi 1:10.

   Perundingka: Nengah ulah, kati tikah nuan nya beguna agi ari kereja tauka hobi? Kati nuan semina ngena laluh awak ke dikemisi begulai enggau kaling nuan, lalu ngayanka pengibuh ngagai iya?

   Chara: Anang bedalih pasal awak. Tang, gaga meh jadual ti manah, ngambi bisi awak begulai enggau kaling pengidup nuan aja.

   “Lebuh laki aku ngatur awak ke kami aja, aku berasai dikeibuhka. Aku ngasaika diri spesial ba iya. Ari tu, aku nemu iya amat sayauka aku. Tu pan ngasuh aku sayau agi ke iya.”—Anna.

•   Engkah talipun enggau tablet nuan ketisi.

   Prinisp Bup Kudus: “Semua utai ti nyadi di dunya ti endang nyadi ba maya ti diletak.”—Pengajar 3:1.

   Perundingka: Ni penyuah iya, awak ke patut dikena nuan enggau kaling dikachau ketegal deka nyaut mesej ari talipun?

   Chara: Uji giga awak, abis nadai sekali sehari makai begulai enggau kaling nuan, lalu engkah talipun ketisi. Suah iya, maya makai meh maya ti ngam alai laki bini mayuh berandau enggau pangan diri.

•   Enti ulih, maya seduai bebelika barang tauka maya meresi, kereja nya begulai.

   Prinsip Bup Kudus: “Dua iku manah agi ari siku, laban enti seduai iya begulai, seduai iya bulih agi gawa.”—Pengajar 4:9.

   Perundingka: Kati seduai laki bini suah ngereja pengawa ninting hari begulai?

   Chara: Uji kereja pengawa nya begulai, taja pan nya ulih dikereja kediri aja.

   “Anang ngumbai pengawa bebelika barang, nuchi pinggai, ngelipat gari sereta bekebun nya boring. Tang, nyadika peluang alai laki bini begulai enggau pangan diri.”—Nina.

•    Berundingka pangan diri.

   Prinsip Bup Kudus: “Awakka semua orang nemu penyiru kita.”—Pilipi 4:5.

   Perundingka: Baka ni chara nuan nunjukka diri berundingka kaling nuan?

   Chara: Kerandauka utai ke amat diguna seduai, lalu uji meretika tatak pangan diri. Perundingka, baka ni seduai ngiga awak nitihka chara ti ngena ba seduai.

   “Ketegal bisi penanggul ba pengerai, aku nadai mayuh pengering baka laki aku. Nyadi, aku enda nagang laki aku pansut ke luar ngereja pengawa ke dikerinduka iya tauka besukan. Lebuh iya pansut, aku belelak ba rumah. Kami duai bela gaga ngereja utai kedeka kami.”—Daniela.

 Bisi beberapa iti tanya ba baruh tu. Keterubah, seduai ulih nyaut nya kediri. Udah nya, seduai ulih berandauka saut nya begulai.

•    Kati seduai laki bini selalu ngiga awak begulai enggau pangan diri?

•   Ngelamatu, nama pengawa ke suah iya dikereja seduai ngambi bisi awak begulai?

•   Nama agi utai ke patut digaga kaling nuan, ngambi seduai bisi mayuh agi awak begulai?

•   Ni penyuah iya talipun tauka tablet nuan, ngachau awak seduai benung berandau?

•   Baka ni chara seduai ulih berundingka pangan diri?

•   Ba minggu tu, baka ni seduai ngatur awak, ngambika seduai amat ulih begulai enggau pangan diri?