Orang bansa Judah ngintu Paska, kena sida ngingatka baka ni Petara udah ngelepaska bansa Israel ari nyadi ulun ba menua Ejip kena taun 1513 SM. Petara ngasuh orang Israel ngingatka utai ke nyadi nya ninting taun kena hari ke-14 bulan Abib, ke dikumbai Nisan kemayaharitu.—Pemansut 12:42; Adat Lewi 23:5.

Nama kebuah dikumbai Paska?

 Leka jaku “Paska” mai reti “dipansa.” Sebedau Petara ngenataika tulah munuh anak tuai ba Ejip, Iya ngasuh orang Israel mechikka darah anak bedus tauka anak kambing ba mua pintu sereta tiang pintu sida. (Pemansut 12:27; 13:15) Maya Petara meda bekau darah ke dipechikka nya, rumah orang nya deka “dipansa” aja. Lalu anak tuai sida enda dibunuh.—Pemansut 12:7, 13.

Baka ni orang jeman Bup Kudus ngintu Paska?

 Petara bisi madahka chara ngintu Paska keterubah ngagai orang Israel. a Nitihka Bup Kudus, sekeda chara nya nyengkaum.

•   Pemeri: Tiap iti ruang bilik patut milih siku anak bedus (tauka kambing) ke dalam urung setaun, kena hari ke-10 Abib (Nisan), lalu nyayat jelu nya kena hari ke-14. Ba Paska keterubah, orang Judah mechikka darah jelu nya ba mua pintu sereta tiang pintu rumah sida, udah nya, jelu ke enda ditetak nya dipanggang lalu diempa.—Pemansut 12:3-9.

•   Pemakai: Kelimpah ari makai bedus (tauka kambing), orang Israel mega makai ruti ti enda beragi sereta sayur pait.—Pemansut 12:8.

•   Pengerami: Orang Israel ngintu Pengerami Roti Enda Beragi pengelama tujuh hari pengudah Paska. Sepemanjai nya, sida enda makai sebarang utai ke beragi.—Pemansut 12:17-20; 2 Bansa Israel 30:21.

•   Pelajar: Maya ngintu Paska, apai indai deka ngajar anak sida pasal Jehovah.—Pemansut 12:25-27.

•   Pejalai: Udah nya, orang Israel ngagai Jerusalem ngintu Paska.—Ulang Adat 16:5-7; Luke 2:41.

•   Pengawa bukai: Ba jeman Jesus, orang mega ngirup wai sereta belagu maya sida ngintu Paska.—Matthew 26:19, 30; Luke 22:15-18.

Runding ti salah pasal Paska

 Runding ti salah: Orang Kristian patut ngintu Paska.

 Fakta: Pengudah Jesus ngintu Paska kena 14 Nisan 33 M., iya lalu madahka siti agi pengawa baru ke patut diintu, iya nya Makai Malam Tuan. (Luke 22:19, 20; 1 Korint 11:20) Pengawa tu dikena nganti pengerami Paska, laban nya dikena ngingatka genselan ke diberi Jesus ngagai kitai. (1 Korint 5:7) Tebus Jesus jauh berega agi ari Paska, laban ulih ngelepaska semua orang ari dosa sereta pemati.—Matthew 20:28; Hebrew 9:15.