Satu Peter 3:1-22
3 Pia mega, kita ke bini, nunduk meh ngagai laki kita laban enti laki kita enda ngasika jaku Petara, ulah kita ulih ngasuh sida ngasi taja pan kita enda nyebut nama-nama utai.
2 Nya ketegal sida udah meda ulah kita ti tuchi sereta penuh enggau basa.
3 Anang ngias diri nitihka utai ke ulih dipeda orang, baka ngaga buk ngena mayuh macham gaya, ngena perengka emas, tauka gari ti mar.
4 Tang awakka pemajik kita datai ari ati. Ias meh diri ngena runding enggau ulah ke enda kelalu irau sereta nelap. Nya meh utai ti enda nemu reput, lalu amat berega ba mata Petara.
5 Baka nya meh chara bala indu ti kudus jeman kelia ke arapka Petara ngias diri. Sida nunduk ngagai laki sida,
6 baka Sarah ke ngasika Abraham, lalu ngangauka iya tuan. Kita bala anak Sarah enti kita terus ngereja utai ti manah sereta enda alah laban asai ati ti takut.
7 Pia mega, kita ke laki, lebuh begulai enggau bini kita, terus meh ngayanka diri meretika asai ati sida.* Bebasa meh ke sida laban sida lemi agi sereta baka periuk ke senang pechah. Bebasa mega ke sida laban Petara udah manah ati meri sida pemeri, iya nya pengidup, baka ke diberi Iya ngagai kita. Enti enda, Petara enda ningaka sampi kita.
8 Ke pengujung iya, awakka semua kita amat sepenemu,* ngayanka simpati,* rinduka pangan diri baka diri menyadi, ngayanka penyiru, sereta baruh ati.
9 Anang malas penyai ngena penyai, tauka jaku kelese ngena jaku kelese. Tang, balas meh ngena jaku ti manah,* laban kita udah dikangau ngambika nitihka jalai pengidup tu awakka kita ulih nerima berekat.
10 Nya ketegal “barang sapa ke rinduka pengidup sereta idup lantang, patut nyaga dilah ngambika enda nyebut utai ti jai sereta nyaga mulut ngambika enda bula.
11 Awakka iya nyeliahka utai ti jai, tang ngereja utai ti manah. Awakka iya bebendar ngulihka sereta ngetanka kaul ti manah enggau orang bukai.
12 Nya ketegal mata Jehovah merening ngagai orang ke lurus, lalu pending Iya ningaka sampi ke disebut sida enggau bebendar. Tang Jehovah nungaka belakang Iya ngagai sida ke ngereja penyai.”
13 Sapa ke deka ngemediska kita enti kita ransing ngereja utai ti manah?
14 Tang taja pan kita patut merinsa ketegal ngereja utai ti lurus, kita deka gaga ati. Anang takutka utai ke ngasuh orang bukai takut,* lalu anang irau.
15 Tang dalam ati kita, kita patut ngaku Kristus nya Tuan, lalu iya kudus. Kita patut seruran besedia nyaut tiap iku orang ke nanya kita pasal utai ke dianti kita enggau andal. Tang, kita patut ngereja nya enggau nelap sereta penuh enggau basa.
16 Awakka kita seruran ngembuan ati* ti beresi, ngambika sida ke bejaku jai pasal kita ngena nama-nama chara deka berasai malu ketegal ulah ti manah ke diayanka kita ke nyadi murid Kristus.
17 Manah agi merinsa ketegal ngereja utai ti manah, enti Petara ngemendarka nya, ari ke merinsa ketegal ngereja utai ti jai.
18 Indah Kristus ke lurus deh mati sekali aja ke belama iya kena ngelepaska orang ke enda lurus ari dosa, ngambika ulih ngiring kita ngagai Petara. Iya agi nyadi mensia lebuh iya dibunuh, tang lebuh iya diidupka baru, iya ngembuan tubuh serega.*
19 Lebuh ngembuan tubuh nya, iya madahka pesan ngagai bala melikat ke dijil.
20 Bala melikat nya meh ke enda ngasi lebuh Petara nganti enggau sabar, maya bandung* benung digaga ba jeman Noah. Bandung nya semina mai beberapa iku orang aja, iya nya lapan iku orang,* kena nyelamatka sida nengah ai bah.
21 Utai ke nyadi nya ngambarka baptisa ke nyelamatka kita diatu nengah pengangkat Jesus Kristus ari mati. Baptisa ukai kena muai utai ti kamah ari tubuh, tang kena minta ati* ti beresi ari Petara.
22 Jesus bisi ba sepiak kanan Petara laban iya udah ke serega, lalu bala melikat, sida ke bekuasa, enggau bala pemerintah diasuh nunduk ngagai iya.
Nota Kaki
^ Tauka “terus meh berundingka sida; terus meh begulai enggau sida sejalai enggau penemu.”
^ Tauka “sama runding.”
^ Tauka “pengibuh.”
^ Jaku Asal, “berekat.”
^ Tauka engka, “Anang takutka jaku ugut orang.”
^ Jaku Gerika, “sy·neiʹde·sis.” Peda Penerang Leka Jaku, “Sy·neiʹde·sis.”
^ Jaku Gerika, “pneu′ma.” Peda Penerang Leka Jaku, “Pneu′ma.”
^ Kapal besai ti baka kutak ti panjai.
^ Jaku Asal, “psykhe.” Peda Penerang Leka Jaku, “Psykhe.”
^ Jaku Gerika, “sy·neiʹde·sis.” Peda Penerang Leka Jaku, “Sy·neiʹde·sis.”
