Gempuru Kristian maya abad keterubah bisi ngena lagu, besampi, enggau macha sereta berandauka ayat Bup Kudus—semua nya nadai bekaul enggau adat. (1 Korint 14:26) Nuan ulih meda utai ti sama ba gempuru kami.

Ajar tu nitihka Bup Kudus sereta amat beguna. Ba ujung minggu, tiap iti eklisia begempuru ningaka 30 minit cheramah Bup Kudus ke nerangka baka ni ayat Bup Kudus bekaul enggau pengidup kitai sereta jeman kitai kemaya hari tu. Semua orang ke datai diperansang ngena Bup Kudus sida empu. Pengudah cheramah nya, bisi Belajarka “Menara Jaga” pengelama sejam. Semua orang ke datai sama bela tau ngambi begian dalam randau tu, ke ngena siti ari artikel ba edisi dikena belajar Menara Jaga. Randau tu nulung kami nitihka iring Bup Kudus dalam pengidup kami. Semua kami belajarka utai ti sama ba lebih ari 110,000 iti eklisia ba serata dunya.

Kami dibantu ngemansangka agi pengelandik kami ngajar. Kami mega begempuru maya tengan minggu. Gempuru ke ngembuan tiga iti begian tu dikumbai Pengidup enggau Pengawa Kristian Kitai, lalu semua utai ke dikena ba gempuru tu bisi ba Bup Kereja Kena Gempuru Pengidup enggau Pengawa Kristian ke bisi disediaka ninting bulan. Begian keterubah ba gempuru tu, Reta Ari Bup Kudus, ke dikena nulung kami nemu enggau manah agi ayat Bup Kudus ke udah dibacha sebedau datai gempuru tu. Pengudah nya bisi begian Ngemanahka Agi Chara Kitai Nginjil ke mandangka chara berandauka Bup Kudus enggau orang bukai. Pemeri jaku lalau nulung kami ngemansangka agi pengelandik kami macha enggau bejaku. (1 Timoti 4:13) Begian ti penudi, Pengidup Kristian, lalu begian tu berandauka chara ngena prinsip Bup Kudus ba pengidup ninting hari. Tu nyengkaum randau ke bisi tanya enggau saut ngambika nulung kami ngenalamka agi penemu pasal Bup Kudus.

Maya nuan datai ke gempuru kami, nuan tentu rindu ati meda pemanah kualiti ngajar Bup Kudus ke diterima nuan. —Isaiah 54:13.

• Nama deka didinga nuan ba gempuru Saksi-Saksi Jehovah?

• Ni bagi gempuru ninting minggu ke deka endur nuan datai?