“Lebuh kita besampi, anang besebutka mayuh macham leka jaku ti nadai reti.”—Matthew 6:7.

Jehovah enggai kitai nandu tauka ngingatka leka sampi tauka macha nya ari bup sampi. Tang, Iya deka kitai besampi ari ati. Perundingka, kati asai ati nuan enti kaban nuan nandu utai ti sama, tiap kali seduai betemu? Kesuah iya, kaban rapat mayuh topik deka dikerandauka. Nyadi, lebuh kitai besampi ngena leka jaku diri empu, kitai ulih mansutka asai ati diri ngagai Apai kitai ba serega.

“Kita minta, tang kita enda nerima, laban juluk ati kita salah.”—James 4:3.

Kitai nemu, Petara enda nyaut sampi ke enda sejalai enggau peneka Iya ngagai kitai. Ngambika chunto, enti seiku orang bejudi, lalu iya besampi ngagai Petara ngambika iya menang lalu bulih duit, kati Jehovah nyaut sampi ke baka nya? Petara udah terang madahka kitai, anang amu lalu anang pechayaka utai ti enda bendar nyengkaum nasit. (Isaiah 65:11; Luke 12:15) Kitai enda ulih ngarapka Jehovah nyaut sampi ke baka tu. Enti kitai deka sampi disaut Petara, kitai patut nentuka peminta nya sejalai enggau utai ti dipadah dalam Bup Kudus.

 ‘Enti nuan enda ngasika adat, Petara deka ringat lalu enggai mendingka sampi nuan.’ —Jaku Dalam 28:9.

Ba jeman Bup Kudus, Petara enda nyaut sampi orang ke nulak adat Iya. (Isaiah 1:15, 16) Runding Petara pasal utai tu enda kala berubah. (Malaki 3:6) Enti kitai deka Petara nyaut sampi, kitai patut ngasika pesan Iya. Tang baka ni enti kitai udah kala ngereja utai ti salah? Kati Jehovah deka ningaka sampi kitai? Tentu deka! Enti kitai udah amat nesal ati ke penyalah diri, enggau pengerindu, Petara deka ngampunka kitai.—Kereja Rasul 3:19.