Semua kitai bisi penau ulih nemu asai ati orang bukai. Kitai ngereja tu lebuh ngambarka diri napi utai ke ditapi orang nya. Nitihka pakar pengerai untak, Dr. Rick Hanson, kitai endang ngembuan penyinu ari ada.

PERUNDINGKA: Nama kebuah kitai ngembuan penyinu, lebih agi ari bala jelu? Bup Kudus nerangka Petara ngaga mensia neladan gamal Iya. (Pemungkal 1:26) Nama reti tu? Ketegal kitai digaga nitihka gamal Petara, nya alai kitai ulih mandangka pemanah enggau kualiti Iya. Lebuh kitai nulung orang bukai, kitai mandangka penyinu Penempa kitai, Petara Jehovah.—Jaku Dalam 14:31.

Petara bisi penyinu ke kitai lalu Iya enggai meda kitai merinsa. Ambika chunto, lebuh orang Israel merinsa nyadi ulun ba menua Ejip sereta diau ba menua puang pengelama 40 taun, Bup Kudus madahka: “Iya ngelepaska sida ari semua pemerinsa sida.” (Isaiah 63:8, 9) Petara ukai semina nemu pemerinsa ke ditapi sida, tang Iya mega ulih ngasaika pemedis sida. Ku Iya: “Aku nemu pemalat sida kena perinsa.” (Pemansut 3:7) “Barang sapa ke negu nuan, negu leka mata Aku.” (Sekariah 2:8, NW) Lebuh orang ngemediska kitai, Petara mega ngasaika pemedis nya.

Taja pan kitai ngasaika diri enda berega tauka ngumbai diri enda patut dikesinuka Petara, Bup Kudus madahka: ‘Petara besai agi ari ati kitai, lalu Iya nemu semua utai.’ (1 John 3:19, 20) Petara nemu kitai lebih ari kitai empu. Iya nemu utai ke ditapi kitai, runding kitai enggau asai ati kitai. Iya endang bisi penyinu ke kitai.

 Ayat Bup Kudus madahka

• ‘Lebuh kita ngangauka Jehovah, Iya deka nyaut. Lebuh kita ngangauka Iya, Iya deka nyebut, “Tu Aku.”’—ISAIAH 58:9.

• “Laban Aku nemu pelan Aku ke kita, pelan kena meri kita pemaik ukai kena ngemediska kita, pelan kena meri kita pengidup enggau pengadang ke jemah ila. Nya baru kita deka ngangauka Aku, datai lalu besampi ngagai Aku, lalu Aku deka ninga kita.”—JEREMIAH 29:11, 12.

• “Nuan nemu pemayuh ai mata aku labuh. Ukai enda semua ai mata aku nya udah dituliska Nuan magang dalam bup Nuan?”—MASMUR 56:8.

Baka ni penemu pasal Petara ti bisi penyinu nulung kitai napi penusah? Perundingka utai ti nyadi ba Maria:

“Aku ngasaika pengidup aku tusah amat sepengudah anak lelaki aku ke berumur 18 taun mati ketegal sakit kanser. Iya ngelaban penyakit nya pengelama dua taun. Aku ringat ngagai Jehovah laban enda ngaga nama-nama sereta enda ngeraika iya!

“Pengudah enam taun, seiku pangan ti siru ba eklisia mendingka aku lebuh aku madahka Jehovah enda sayauka aku. Pengudah mendingka aku bejam-jam, iya madahka siti ayat ke negu ati aku ba 1 John 3:19, 20: ‘Petara besai agi ari ati kitai, lalu Iya nemu semua utai.’ Iya nerangka Jehovah meretika pemedis ke ditapi kitai.

“Taja pia, aku agi berasai ringat! Udah nya aku macha Masmur 94:19 ti madahka: ‘Lebuh ati aku mayuh pengirau, Nuan merindang aku, lalu ngasuh ati aku gaga.’ Aku ngasaika ayat tu ditulis endang ke aku! Belubah-lubah, aku ngasaika diri ulih madahka Jehovah pasal pemedis aku, lalu aku andal Iya ninga sereta nemu asai ati aku.”

Endaka tu ngelantangka ati laban kitai nemu Petara bisi penyinu sereta nemu asai ati kitai? Tang, nama kebuah mayuh pemerinsa? Kati nya ukum ari Petara ketegal penyalah kitai? Kati Petara deka muai semua pemerinsa? Pekara tu deka dikerandauka kitai ba artikel pengudah tu.