Gambarka enti seiku apai madah ngagai anak iya ke beumur tujuh taun pasal baka ni semua utai ditempa. Ku iya: “Petara udah nempa dunya kitai, bulan, bintang enggau mata panas.” Udah nya, anak iya nanya baru, “Sapa nempa Petara?”

Apai iya nyaut, “Nadai sapa-sapa nempa Petara. Iya seruran bisi.” Anak iya puas ati enggau saut nya. Tang seraya iya mansang besai, iya berunding baru ke tanya nya. Iya berunding, enti dunya raya bisi pun, tentu Petara mega bisi pun.

Kebendar iya, saut ari Bup Kudus nyauka sama enggau saut apai nya. Moses nulis: ‘O Jehovah, . . . Sebedau Nuan nempa bukit tauka nempa dunya, Nuan endang Petara ti meruan belama iya.’ (Masmur 90:1, 2) Nabi Isaiah mega madah: ‘Kati kita enda nemu? Kati kita nadai kala ninga? Jehovah nya meh Petara ti meruan belama iya, ke ngaga semua dunya.’ (Isaiah 40:28) Penulis bup Jude mega madah, Petara udah bisi “kenyau ari dulu kelia.”—Jude 25.

Ayat nya udah nunjukka Petara endang udah bisi kenyau ari dulu kelia. Rasul Paul mega madah, Petara nya “Raja ke meruan belama iya.” (1 Timoti 1:17) Reti iya, Petara nadai pun, sereta nadai ujung. (Pemandang 1:8) Jaku tu semina ulih dituju ngagai Petara ti Pemadu Bekuasa.

Tang kitai engka tusah deka meretika nya. Nama kebuah? Pengidup mensia bisi tatak, nya alai runding mensia pasal awak bebida enggau Petara. Ketegal Petara meruan belama iya, Bup Kudus madahka, ba Iya seribu taun nya baka sehari aja. (2 Peter 3:8) Kena meretika tu, aram kitai meda chunto pasal buntak. Buntak ulih idup semina urung 50 hari. Kati buntak nemu pemanjai awak 70 taun tauka 80 taun? Tentu enda! Pia mega, enti dibandingka enggau Petara, kitai baka buntak. Nya alai kitai enda ulih mereti semua runding Petara ti Pemadu Tinggi. (Isaiah 40:22; 55:8, 9) Lalu nya meh kebuah mensia enda ulih meretika runding Petara pasal awak.

Amat, kitai engka tusah deka mereti pasal Petara ke nadai pun sereta nadai ujung. Tang utai nya ulih dimeretika. Nama kebuah? Enti sema Petara ditempa orang bukai, reti nya, Iya ukai Penempa. Tang Bup Kudus madahka, Jehovah nya meh ke “ngaga semua utai.” (Pemandang 4:11) Kelimpah ari nya, dunya raya pan bisi pun. (Pemungkal 1:1, 2) Ari ni penatai dunya raya? Endang amat, tentu Penempa ke udah bisi nya ke nempa dunya raya. Iya mega udah nempa bala melikat sereta Anak Iya. (Jop 38:4, 7; Kolosi 1:15) Nya alai Petara udah bisi sebedau semua utai ditempa. Lalu Iya enda ditempa orang bukai.

Nya alai, bala mensia ke ditempa, dunya raya enggau atur ba dunya raya nunjukka Penempa kitai nya Petara ti meruan belama iya. Iya meh ke pun semua pengidup.—Jop 33:4.