Nabiit pay a nalpas ti dakkel a panang-renovate iti sangay iti Colombia. Nangrugi ti proyekto idi Pebrero 2019 ket nalpas idi Marso 2023. Nasurok a 200 a kakabsat ti nakiraman iti panag-renovate, agraman dagiti boluntario manipud Australia, Canada, Chile, Domican Republic, England, ken United States.

Idi Hunio 1, 2023, mabalinen nga ag-tour dagiti bisita iti baro a na-renovate a pasilidad. Ni Brother John Rodriguez a nabautisaran bayat ti COVID-19 pandemic ket saan pay a pulos nakabisita iti sangay. Imbagana: “Ti trabaho a maar-aramid ditoy ipakitana ti ayat ken kinatan-ok ni Jehova. Maragragsakan ken agyamyamanak ta pasetak iti daytoy nagsayaat nga organisasion.” Imbaga pay ti sabali a kabsat: “Talaga a magusgustuak ti panangusar dagiti kakabsat kadagiti moderno ken kabaruan a teknolohia. Daytoy a panag-renovate ket pammaneknek a kanayon a rumangrang-ay ti organisasion ni Jehova.”

Ti sanga nga opisina, a 42 a kilometro (26 mi) ti kaadayona iti amianan a daya ti Bogotá, Colombia, ti mangay-aywan kadagiti aktibidad ti organisasion iti Bolivia ken Colombia. Agim-imprenta ti sangay kadagiti publikasion para kadagitoy a pagilian, agraman ti Ecuador, Peru, ken Venezuela. Makatulong ti nabiit pay a proyekto a panag-renovate tapno masuportaran ti panagrang-ay kadagitoy a rehion. Nasurok a 350 a kuarto ken opisina ti na-renovate ken 156 a baro nga opisina ti naibangon. Kanayonanna, naibangon dagiti baro a classroom ken conference room ken ad-adun ti mabalin a pasiaren dagiti ag-tour.

Imbaga ni Brother Tait Boulais, a koordineytor ti construction committee: “Nupay adu ti pakarigatan nga impaay ti COVID-19, nalawag a binendisionan ni Jehova ti trabaho. Uray no bimmassit ti bilang dagiti agtrabtrabaho iti konstruksion, maragsakan dagiti boluntario a mangaramid kadagiti trabaho a saanda pay idi nga inar-aramid wenno awan pay ti training a naawatda. Kas iti adu a matalek nga adipen ti Dios idi, nakitami a tinulongan ida ti espiritu ni Jehova isu a dagus a nagbalinda nga eksperto kadagitoy a trabaho.”

Masiguradotayo a ti kabarbaro a na-renovate a pasilidad ti sangay ket makaipaayto iti napateg a suporta iti agtultuloy a panagrang-ay iti daytoy a paset ti lubong.—Aramid 1:8.