NOBIEMBRE 6, 2023
RUSSIA

Naragsakda Latta Uray Nakabaludda

I-PLAY

Dandanin iyanunsio ti District Court iti Cheryomushkinskiy ti desisionna maipapan iti kaso da Brother Sean Pike, Aleksandr Rumyantsev, ken Eduard Sviridov. Saan pay nga imbaga ti prosecutor ti kayatna a sentensiada.

Maipapan Kadakuada

Sean Pike

Nayanak: 1971 (Georgetown, Guyana)

Pakasaritaan: Immakar iti Russia tapno agadal iti unibersidad. Nagbalin a civil engineer

Nakasarita dagiti Saksi ni Jehova idi estudiante pay iti unibersidad. Bimmilib iti praktikal a sirib dagiti balakad ti Biblia. Nabautisaran kas maysa a Saksi ni Jehova idi 1997

Nagkasarda ken Tatyana idi 2001. Naaddaanda iti dua nga annak a babbai

Personal a Komento ti asawa ni Sean a ni Tatyana a

Ania ti timmulong kadakayo ken lakaymo tapno maibturanyo ti saanyo a panagkadua iti daytoy naglabas a dua a tawen gapu iti pannakaibaludna?

Nakarigrigat dayta para kadakami idi damo. Mabutbuteng ken maladladingitankami idi, ngem in-inut met laeng a naakseptarmi ti kasasaad. Dakkel a tulong kenkuana ti suporta dagiti kakabsat iti intero a lubong. Kasta met, kanayon a sursuratanmi kadagiti babbalasangko tapno ipasiguradomi kenkuana nga ay-ayatenmi unay. Ken siempre, nariknami ti ayat ken panangaywan ni Jehova kadakami sipud pay idi damo. Maliwliwaak no pampanunotek ti ibagbaga ti Salmo 18:16, 19: “Manipud iti ngato, ginaw-atnak; ket iti adalem a dandanum, ginuyod ken inalawnak. Natalged a disso ti nangipananna kaniak; insalakannak gapu ta maragsakan kaniak.” Mapampanunotko a ti “adalem a dandanum” ket isu ti pagbaludan a namagsina kadakami ken Sean. Agpayso a saanko a makadua tapno matulongak, ngem nalaka laeng a mayunnat ni Jehova dagiti takiagna a mangtulong ken Sean tapno agtultuloy a natalged.

Aleksandr Rumyantsev

Nayanak: 1977 (Moscow, Moscow Region)

Pakasaritaan: Agtrabtrabaho kas chauffeur. Sakbay a naibalud, ay-aywananna ti baldado a nanangna.

Nakipagadal kadagiti Saksi ni Jehova tapno maammuanna ti isursuro ti Biblia. Nabautisaran idi 2006

Personal a Komento

Kasanom a marikrikna ti tulong ni Jehova bayat a nakabaludka?

Makaliwliwa a maammuan nga ikarkararagandak dagiti kakabsat iti intero a lubong. Ammok a pamay-an daytoy ni Jehova a mangtulong kaniak. Itak la a narikna ti kastoy kapartak a panangsungbat ni Jehova kadagiti kararagko. Natalna ti panunotko ken kalmadoak. Ipalagip daytoy kaniak ti mabasa iti 2 Corinto 1:5: “Ta no kasano nga adu ti sagsagabaentayo gapu iti Kristo, adu met ti aw-awatentayo a liwliwa gapu iti Kristo.” Mangnaynayon amin dagitoy iti ragsakko.

Eduard Sviridov

Nayanak: 1964 (Dushanbe, Tajikistan)

Pakasaritaan: Nagtrabaho kas opereytor ti traktor

Nagkasarda ken Yelena idi 1997

Nagdesision a basaenna ti intero a Biblia a bukbukodna. Di nagbayag, nakasaritada ken Yelena dagiti Saksi ni Jehova ken nakipagadalda kadakuada. Nabautisaranda a dua idi 1999

Personal a Komento

Ania ti tumultulong kenka nga agtalinaed a naragsak uray nakabaludka?

Ti panagbasak iti Biblia, panagkararag, ken ti suporta dagiti kakabsat iti intero a lubong ti tumultulong kaniak nga agtalinaed a naragsak. Ammok met a nagpateg ti panagtalinaed a positibo. Ti biag ket kasla piktiur—napimpintas no nakaisemka. No panunotek ti situasionko, mas piliek ti agyaman ken Jehova ta us-usarenna daytoy a mangsanay kaniak. Agyamyamanak met iti tsansak a mangsungbat iti daydiay mangin-insulto kenkuana.—Proverbio 27:11.

Ti ulidan da Sean, Aleksandr, Eduard, ken dagiti pamiliada ipalagipda kadatayo a “naimbag ni Jehova, ti pagkamangan iti aldaw ti rigat. Sipapanunot kadagidiay agkamang kenkuana.”—Nahum 1:7.

Time Line

Agosto 25, 2021

Sinukisokda ti balbalayda. Naibalud ti tallo a kakabsat
Agosto 27, 2021

Da Sean, Aleksandr, ken Eduard ket nayakar iti pretrial detention center
Nobiembre 14, 2022

Nangrugi ti pannakabistada

a Saan a posible a maalaan iti personal a komento ni Brother Pike.

Baka Kayatmo Met ti

DAMDAMAG

Naibalud Gapu iti Pammatida—Russia

Maibalbalud dagiti Saksi ni Jehova idiay Russia gapu iti pammatida. Ammuem ti pakasaritaanda, ken i-download-mo ti listaan dagiti agdama a nakabalud a Saksi.

DAMDAMAG