IDI Abril 14, 1989, mangikonkonduktaak iti gimong iti ili ti Maumere, idiay Flores Island, idi bigla a sinerrek dagiti opisial ti gobierno ti balay ket uppatkami a naaresto.

Pinilitdakami dagiti guardia iti pagbaludan nga agsaludo iti bandera. Gapu ta saanmi a kayat, kinabkabil ken kinugkugtarandakami ken lima nga aldaw nga imbilagdakami iti kainitan a nakatakder. Iti rabii, agpigpigergerkami a nakaidda iti sementado a suelo iti nakail-ilet a selda. Nakarugrugit ken nabambannogkami ken nakaut-ut-ot dagiti sugatmi. Maulit-ulit a pinilitnakami ti warden nga agkompromiso, ngem insungbatmi, “Uray mataykami, saankami nga agsaludo.” Kas kadagiti immun-una a Kristiano, imbilangmi a pribilehio ti ‘agsagaba maipagapu iti kinalinteg.’—1 Ped. 3:14.