Bayat ti ministerio ni Jesus, maulit-ulit nga impaganetgetna ti kinapateg ti kinapakumbaba. (Lucas 14:​8-11) Maragsakan a makasarak kadagiti tattao a mayat nga agserbi iti Dios a sipapakumbaba. Ngem dadduma kadakuada ti agar-aramid pay laeng iti nadagsen a basol.

Napaliiw dagiti Fariseo ken eskriba a dagitoy a tattao​—dagiti ibilangda nga awan serserbina​—ket aginteresda ken Jesus ken iti mensahena. Kinunada: “Makilanglangen daytoy a tao kadagiti managbasol ken makipangpangan kadakuada.” (Lucas 15:2) Dagiti Fariseo ken eskriba ibilangda ti bagida a nangatngato ken tratuenda dagiti gagangay a tattao a kas mabadbaddekan a tapuk. Tapno maipakita ti pananglaisda, awagan ida dagiti lider ti relihion iti ‛am ha·’aʹrets, Hebreo a sao a kaipapananna, “tattao iti daga.”

Ngem saan a kasta ni Jesus. Ipakitana iti amin ti dayaw, kinaimbag, ken asi. Adu kadagiti nanumo a tattao, karaman ti dadduma a pagaammo a managbasol, ti magagaran a dumngeg ken Jesus. Ngem ania ti reaksion ni Jesus iti panangbabalawda kenkuana gapu ta tultulonganna dagitoy?

Nalawag ti sungbat idi imbagana ti makatukay nga ilustrasion nga umasping iti imbagana idi idiay Capernaum. (Mateo 18:​12-14) Iti ilustrasionna, pinagparang ni Jesus a dagiti Fariseo ket nalinteg ken natalgedda iti arban ti Dios. Iti sabali a bangir, dagiti nanumo ket dinakamatna a napukaw ken nayaw-awan. Kinuna ni Jesus:

“No maysa kadakayo ti addaan 100 a karnero ket mapukawna ti maysa, saanna ngata a panawan ti 99 iti pagaraban ket birokenna ti maysa agingga a masarakanna? Ket inton nasarakanna, maragragsakan ken ibaklayna iti abagana. Inton makaawiden, ayabanna dagiti gagayyem ken kaarrubana, a kunkunana, ‘Agragsaktayo ta nabirokakon ti napukaw a karnerok.’”​—Lucas 15:​4-6.

Kasano nga inyaplikar ni Jesus dayta? Inlawlawagna: “Kasta met, naragragsakto ti langit gapu iti maysa a managbasol a nagbabawi ngem iti 99 a nalinteg a saanda a kasapulan ti agbabawi.”​—Lucas 15:7.

Matignay koma dagiti Fariseo iti dinakamat ni Jesus maipapan iti panagbabawi. Ibilangda ti bagida a nalinteg ken ipagarupda a saan a masapul nga agbabawida. Sumagmamano a tawen ti napalabasen, idi binabalaw ti dadduma ni Jesus gapu ta nakipangan kadagiti agsingsingir iti buis ken managbasol, insungbatna: “Immayak tapno ayabak dagiti managbasol, saan a dagiti nalinteg.” (Marcos 2:​15-17) Saan a nabigbig dagiti managinsisingpet a Fariseo a kasapulan nga agbabawida, isu a saanda a makaipaay iti ragsak idiay langit.  Kasungani dayta no talaga nga agbabawi dagiti managbasol.

Tapno mapatalgedan pay ni Jesus ti imbagana maipapan iti panagragsak idiay langit no agbabawi dagiti managbasol, dinakamatna ti ilustrasion a napasamak iti uneg ti balay: “No ti babai nga addaan iti 10 a sinsilio a drakma ket napukawna ti maysa, saanna ngata a sindian ti lampara ken sagadan ti balayna tapno birokenna a naimbag agingga a masarakanna? Ket inton nasarakanna, ayabanna dagiti gagayyemna ken kaarrubana, a kunkunana, ‘Agragsaktayo, ta nabirokakon ti sinsilio a napukawko.’”​—Lucas 15:​8, 9.

Ti imbaga ni Jesus nga aplikasionna ket umasping met laeng iti imbagana iti ilustrasion maipapan iti napukaw a karnero. Kinunana: “Kasta met, ipasiguradok a maragragsakan dagiti anghel ti Dios no agbabawi ti maysa a managbasol.”​—Lucas 15:10.

Agasem, interesado unay dagiti anghel ti Dios a mabirokan dagiti napukaw a managbasol! Talaga a nakapatpateg dayta ta ti managbasol nga agbabawi ken makagun-od iti lugar iti nailangitan a Pagarian ti Dios ket maaddaanto iti nangatngato a saad ngem kadagiti anghel! (1 Corinto 6:​2, 3) Ngem saan nga agimon dagiti anghel. Ania ngarud koma ti riknatayo no naimpusuan nga agbabawi ti managbasol ken agsubli iti Dios?