LAKLAKAEN ti maysa a kita ti alibut a maawagan iti agama lizard ti lumagto iti diding manipud iti patad a naggapuanna. Ngem no nagalis ti naggapuanna, agkamali iti posisionna nga aglagto ngem makakapet met latta iti diding. Apay? Gapu iti ipusna.

Usigem: No nakersang ti paggapuan dagiti agama—a pagkaptanda a naimbag—isimpada nga umuna ti bagida ken pagtalinaedenda a nakadisso ti ipusda tapno umiso ti anggulo ti bagida nga aglagto. Ngem no nagalis ti naggapuanda, maikaglis isu nga agkamali iti panaglagtoda. Ngem sakbay pay nga agdisso, baliwandan ti anggulo ti bagida babaen ti panangingatoda iti ipusda. Komplikado dayta a proseso. “Masapul nga umiso ti panangbaliw dagiti agama iti anggulo dagiti ipusda tapno mapagtalinaedda a nakangato dayta,” sigun iti inreport ti University of California, Berkeley. No nagalgalis ti paggapuanda, ad-adda a nasken nga ingatoda ti ipusda tapno mayat ti panagkapetda iti pagdissuanda.

Ti ipus ti agama ket mabalin a makatulong kadagiti inheniero tapno makadisenioda kadagiti napaspas ngem di mabaliktad a robot a lugan a mausar iti panagbirok kadagiti nakalasat iti ginggined wenno dadduma pay a didigra. “Dagiti robot ket saan a kas iti kapaspas dagiti animal,” kuna ti managsirarak a ni Thomas Libby, “isu a dakkel nga idudur-as no adda madisenio a robot a saan a nalaka mabaliktad.”

Ania ti makunam? Babaen kadi iti ebolusion a timmaud ti ipus ti agama? Wenno nadisenio dayta?