Gapu iti moderno a teknolohia, nagbiit itan ti maaddaan iti ginasut wenno rinibu pay ketdi a “friends” iti social network babaen laeng ti pananginayon iti naganda iti listaan dagiti contact-tayo iti kompiuter. No met ditay kayaten a “friend” ti maysa kadakuada, i-delete-tayo laeng ti naganna iti listaantayo. Ngem paneknekan ti nakalkaldaang a kapadasan a nadakamaten ti makapakellaat a kinapudno—marigatan ti adu a maaddaan iti pudno a gagayyem. Kinapudnona, impakita ti maysa a nabiit pay a surbey a bimmassit ti bilang dagiti pudno a nasinged a gagayyemtayo, uray no umad-adu ti panawentayo a makilangen.

Kas iti kaaduan a tattao, mabalin nga umanamongka a napateg dagiti nasayaat a gagayyem. Mabalin a mamatika met a ti pannakigayyem ket saan laeng a ti basta panangi-click kadagiti link iti kompiuter wenno selponmo. Ania ti birbirokem iti maysa a gayyem? Kasanoka nga agbalin a nasayaat a gayyem? Ania ti kasapulan tapno agpaut ti panaggayyem?

Usigem ti uppat a mangigiya a prinsipio, ken kitaem no kasano a makatulong kenka ti praktikal a balakad ti Biblia tapno maaddaanka kadagiti kababalin a sapsapulen dagiti tattao iti maysa a gayyem.

Kasapulan ti pannakaikumit iti pudno a panaggayyem. Iti sabali a pannao, marikna ti nasayaat a gayyem nga adda responsabilidadna kenka, ken talaga a maseknan. Siempre, rumbeng nga agpadakayo a makarikna iti kasta, ket agkasapulan dayta iti panagregget ken panagsakripisioyo a dua. Ngem makagunggona ti panagreggetyo. Isaludsodmo iti bagim, ‘Nakasaganaak kadi a tumulong, mangipaay iti panawenko, ken ik-ikutak para iti gayyemko?’ Laglagipem a tapno maaddaanka iti nasayaat a gayyem, sika nga umuna ti masapul nga agbalin a nasayaat a gayyem.

TI SAPSAPULEN DAGITI TATTAO ITI MAYSA A GAYYEM

Irene: “Ti pannakigayyem ket kas iti panangasikaso iti napintas a hardin. Kasapulan ti adu a panawen ken panangaywan. Umuna, rumbeng nga agbalinka a nasayaat a gayyem. Kanayon nga ipakitam ti kinaimbag ken personal nga interes. Nakasaganaka met koma a mangisakripisio iti panawenmo no kasapulannaka.”

Luis Alfonso: “Iparparegta ita ti kagimongan ti panangyun-una iti bagi imbes a ti pagimbagan ti pada a tao. Nagdakkel ngarud a banag no adda mangipakita kenka iti napasnek nga interes nga awan aniaman a namnamaenna a kasukat.”

ANIA TI KUNA TI BIBLIA?

“Kas iti kayatyo nga aramiden kadakayo dagiti tattao, isu met laeng ti aramidenyo kadakuada. Iyugaliyo ti mangted, ket mangtedto kadakayo dagiti tattao.” (Lucas 6:31, 38) Insingasing ni Jesus ti pudno a kinaparabur ken ti di panagimbubukodan. No aramidentayo dayta, maaddaantayo kadagiti nasayaat a gagayyem. No nakasaganaka a tumulong iti gagayyemmo a dimo namnamaen nga adda isukatda, sigurado a sumingedda kenka.

Saan a suminged ti pudno a panaggayyem no awan ti regular a komunikasion. Isu a kanayon nga agtungtongkayo maipapan kadagiti paginteresanyo a dua. Denggem ti makuna ti gayyemmo, ken raemem dagiti opinionna. No posible, komendaram ken paregtaem. Adda dagiti tiempo a mabalin a kasapulanna ti balakad wenno panangkorehir pay ketdi, ket saan a kanayon a nalaka nga aramiden dayta. Ngem ti matalek a gayyem ket natured a mangibaga iti nakaro a kamali ken sitataktika a mangbalakad.

TI SAPSAPULEN DAGITI TATTAO ITI MAYSA A GAYYEM

Juan: “Ti pudno a gayyem ket prangka a mangibaga kadagiti opinionna ngem saan a masuron no dika umanamong.”

Eunice: “Magustuak unay dagiti gagayyem a nakasagana a mangipaay iti panawen kaniak ken dumngeg kaniak, nangruna no adda problemak.”

Silvina: “Dagiti pudno a gagayyem ibagada kenka ti kinapudno—uray no nasakit—ta pampanunotenda ti pagimbagam.”

ANIA TI KUNA TI BIBLIA?

“Tunggal tao masapul a nasiglat no iti panagdengngeg, nainayad no iti panagsao, nabannayat no iti panagpungtot.” (Santiago 1:19) Ti panagimdeng ket kanayon nga apresiaren dagiti nasayaat a gagayyem. Ngem no datayo ti makaadu nga agsao, iparpariknatayo a napatpateg ti opiniontayo ngem kadagiti opinionda. Isu a dumngegka no ibagbaga kenka ti gayyemmo ti pampanunoten ken rikriknana. Dika met koma masaktan no prangka kenka. “Naimbag ti panggep ti maysa a gayyem uray no mapasakitannaka,” kuna ti Proverbio 27:6, Ti Baro a Naimbag a Damag Biblia.

Bayat a sumingsingedtayo iti maysa a gayyem, ad-adda a makitatayo dagiti pakapilawanna. Kas kadatayo, saan a perpekto dagiti gagayyemtayo. Ditay koma ngarud pulos ekspektaren a di agkamali dagiti pakigayyemantayo. Imbes ketdi, apresiarentayo dagiti nasayaat nga ugalida ken palabsen dagiti kamalida.

TI SAPSAPULEN DAGITI TATTAO ITI MAYSA A GAYYEM

Samuel: “Masansan a nangatngato ti ekspektarentayo kadagiti sabsabali ngem iti bagitayo. Ngem no bigbigentayo nga agkamalitayo ken agkasapulantayo iti pammakawan, ad-adda a nakasaganatayo a mangpakawan iti sabsabali.”

Daniel: “Akseptarem a talaga nga agkamali dagiti gagayyemmo. No rumsua dagiti problema, nasayaat no solbarentayo a dagus ken ikagumaan a lipatenen dagita.”

ANIA TI KUNA TI BIBLIA?

“Maitibkoltayo amin iti adu a daras. No ti asinoman saan a maitibkol iti sao, daytoy ket perpekto a tao, a kabaelanna met a ngedngedan ti intero a bagina.” (Santiago 3:2) Ti panamati iti dayta a simple a kinapudno ti makatulong kadatayo nga agbalin a mannakaawat kadagiti gagayyemtayo. Iti kasta, mapalabastayo dagiti babassit a kamali ken pagkurkurangan a mabalin a makapasuron kadatayo. Kuna ti Biblia: “Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. . . . Ngem, malaksid kadagitoy amin a banag, kawesanyo ti bagbagiyo iti ayat, ta dayta ket naan-anay a singgalut ti panagkaykaysa.”—Colosas 3:13, 14.

Agpayso a masapul nga agbalintayo a napili kadagiti pakigayyemantayo. Ngem saan a kaipapanan dayta a ti laeng pakigayyemantayo ket dagiti kaedad wenno kapadatayo iti background. Talaga nga agbalin a naragragsak ti biagtayo no mangipakitatayo iti interes iti amin a tattao, aniaman ti edad, kultura, background, ken nasionalidadda.

TI SAPSAPULEN DAGITI TATTAO ITI MAYSA A GAYYEM

Unai: “No dagiti pakigayyemam ket dagidiay laeng kaedadmo wenno kapadam iti magustuan, kayarigan dayta ti kanayon a panangisuotmo iti paboritom a kolor ti badom. Paboritom man dayta a kolor, addanto tiempo a maumaka iti dayta.”

Funke: “Nagbalinak a manakem idi nakigayyemak iti nadumaduma a klase ti tattao. Nasursurok ti makilangen kadagiti nagduduma ti edad ken background-da, isu a nagbalinak nga ad-adda a mannakigayyem ken mannakibagay. Ket talaga nga apresiaren dayta dagiti gagayyemko.”

ANIA TI KUNA TI BIBLIA?

“Gapuna, kas panangsubad—agsaoak a kas agpaay iti annak—dakayo, met, lumawakayo.” (2 Corinto 6:13) Iparparegta ti Biblia kadatayo a makigayyemtayo iti amin a klase ti tattao. No aramidem dayta, naragragsakka ken ad-adu ti mangipateg kenka.