Kuna ni Rosie, “Kanayon a madanaganak kadagiti nagduduma a bambanag ta sangkapanunotko ti kadaksan a posible a mapasamak.” Ania a bersikulo ti Biblia ti nakatulong kenkuana? Maysa ti Mateo 6:34: “Dikay pulos maringgoran maipapan iti sumaganad nga aldaw, ta ti sumaganad nga aldaw addaanto kadagiti bukodna a pakaringgoran. Umdasen iti tunggal aldaw ti bukodna a kinadakes.” Kuna ni Rosie a nakatulong dagitoy a sasao ni Jesus tapno saanen a madanagan maipapan iti masanguanan. Innayonna, “Adun ti problemak, isu a saanen a kasapulan nga agdanagak pay kadagiti situasion a di pay met napasamak ken mabalin a saan met a mapasamak.”

Narikna met idi ni Yasmine a kasla malapunosen kadagiti pakadanaganna. “No mano nga aldaw kada lawas nga agsangsangitak, ken diak makaturog. Panagriknak, kasla alun-onennak a sibibiag ti negatibo a pampanunotko.” Imbagana a nakatulong ti 1 Pedro 5:7: “Iyallatiwyo [iti Dios] ti isuamin a pakaringgoranyo, agsipud ta isu maseknan kadakayo.” Kuna ni Yasmine: “Nagkarkararagak ken Jehova, ket sinungbatannak. Kas man la naikkat ti nadagsen a bakbaklayek. Adda met latta dagiti panawen a makapanunotak iti negatibo, ngem ita, ammokon ti aramidek.”

Kuna ti agtutubo a ni Isabella: “Matawtawid siguro ti panangitantan ta kasta met la ni tatangko. Bay-ak dagiti importante a banag tapno laeng agrelaks wenno agbuya iti TV. Saan a nasayaat ti epektona ta ad-adda a ma-stress-ka ken saan a pulido ti trabahom.” Nakatulong kenkuana ti 2 Timoteo 2:15: “Aramidem ti amin a kabaelam a mangiparang iti bagim a naanamongan iti Dios, maysa a mangmangged nga awan ti aniaman nga ibainna.” Intuloy ni Isabella, “Diak kayat nga ibain ni Jehova ti kalidad ti trabahok gapu laeng ta intantanko dayta.” Nagdakkel ti nagbaliwan ni Isabella.

Kasta met la ti kuna ni Kelsey: “No adda project-ko idi, aramidek laeng inton dandanin deadline. Makasangit, mapuyatan, ken madanaganak. Nagdakes ti epektona kaniak.” Nakatulong kenkuana ti kuna ti Proverbio 13:16 a ti “nasaldet agtignayto a buyogen ti pannakaammo, ngem daydiay maag agiwarasto a sisasaknap iti kinamaag.” Pinampanunotna dayta ket kastoy ti nasursurona: “Makatulong no realistikoka ken no agplanoka. Adda notebook-ko itan nga adda laeng iti lamisaanko tapno mayeskediulko dagiti aramidek. Naur-urnosak itan ket saanakon nga agitantantan.”

Insalaysay ni Kirsten: “Pinanawannak ni lakayko. Imbatina ti uppat nga ubbingmi.” Ania ti nakatulong kenkuana? Ti Proverbio 17:17: “Ti pudno a kadua agayat iti isuamin a tiempo, ken ti kabsat a mayanak no adda rigat.” Nagpatulong ni Kirsten kadagiti padana nga agserserbi ken Jehova. Ania ti resultana? “Adu ti naitulong dagiti gagayyemko! Dadduma ti nangibati iti grocery ken sabsabong iti ridawmi. Namitlo a tinulongandakami nga agiina iti panagakarmi iti balay. Adda pay timmulong kaniak nga agbirok iti trabaho. Kanayon a nakasaganada a tumulong.”

Ni Delphine, a naibaga itay, linabananna met ti kinaliday. Malagipna ti tiempo idi nariknana a napukawna ti amin: “No makitak a naragsak nga agkakadua ti dadduma, nalidayak ken kasla agmaymaysaak iti lubong.” Nakatulong kenkuana ti Salmo 68:6: “Dagidiay agwaywayas [wenno, agmaymaysa] pagnanaeden ti Dios iti maysa a balay.” Inlawlawag ni Delphine: “Ammok a saan la a literal a balay ti kayat a sawen dayta no di ket naespirituan a pagtaengan—lugar nga addaan seguridad, pudpudno a panaggagayyem ken nadekket a relasion kadagiti mangay-ayat ken Jehova. Ngem ammok a saanak nga agbalin a nadekket iti sabsabali no saanak nga umuna nga agbalin a nadekket ken Jehova. Dakkel a tulong ti Salmo 37:4: ‘Agragsakka iti napalalo ken Jehova, ket itdennanto kenka dagiti kiddaw ta pusom.’”

Kinunana: “Nasursurok a masapul nga agbalinak a nadekdekket pay ken Jehova. Isu ti kasayaatan iti amin. Inlistak dagiti mabalinko nga aramiden a kadua ti sabsabali tapno magayyemko dagiti padak a mangay-ayat ken Jehova. Nasursurok a kitaen ti positibo iti sabsabali ken palabsen ti kinaimperpektoda.”

Siempre, imperpekto latta dagiti gagayyem nga agserserbi iti Dios. Adda met problema dagiti Saksi ni Jehova kas iti dadduma. Ngem gapu iti nasursuroda iti Biblia, matignayda a tumulong. Nagsayaat no adda kasta a gagayyem. Ngem makatulong met kadi ti Biblia kadagiti problema a saan a masolbar ita, kas iti nakaro a sakit ken ladingit gapu iti ipapatay ti ay-ayaten?