Iti napalabas nga artikulo, naammuantayo ti pagilasinan nga inted ni Jesus a mangipakita a naipasdeken ti Pagarian ti Dios idiay langit a ni Jesu-Kristo ti Arina.

Ibaga ti Biblia nga idi nagturay ni Jesus iti Pagarian, pinapanawna ni Satanas ken dagiti demoniona idiay langit. Addadan ditoy daga ken saandan a makasubli idiay langit ket dayta ti maysa kadagiti makagapu no apay nga adun ti dakes a mapaspasamak ditoy daga manipud idi 1914.—Apocalipsis 12:7, 9.

Uray rumigrigat dagiti kasasaad iti lubong, adun ti naaramidan ni Jesus kas Ari ti Pagarian ti Dios tapno matulongan dagiti tattao iti intero a daga. Gapu iti sangalubongan a trabaho a panangyadal iti Biblia nga impadto ni Jesus, adun ti makasursuro ken mangyap-aplikar kadagiti prinsipio ti Biblia. (Isaias 2:2-4) Minilionen ti nakasursuro a mangpasayaat iti biag ti pamiliada, iti kababalinda iti trabaho, ken maaddaan iti balanse  a kapanunotan iti material a bambanag tapno saan a dayta ti kangrunaan iti biagda. Marikriknadan ti pagsayaatan dagita. Ken agbalbalindan a kas iti kita ti tattao a kayat ti Dios nga iturayan ti Pagarianna.

Uray agturturayen ni Jesus idiay langit, agturturay pay laeng dagiti gobierno ti tao ditoy daga. Ngem imbilin ti Dios ken Jesus: “Mapanka iti tengnga dagiti kabusormo ken parmekem ida.” (Salmo 110:2) Dandanin dadaelen a naan-anay ni Jesus ti amin a bumusbusor ken bang-aranna dagiti situtulok nga agtulnog iti Dios.

Iti dayta a tiempo, ti Pagarian ti Dios

• Dadaelenna ti ulbod a relihion. Awanton dagiti relihion a mangisursuro iti kinaulbod maipapan iti Dios ken mangparparigat kadagiti tattao. Dineskribir ti Biblia ti ulbod a relihion kas balangkantis. Makigtotto ti adu iti pannakadadaelna.—Apocalipsis 17:15, 16.

• Pagpatinggaenna ti turay ti tao. Ti Pagarian ti Dios pagpatinggaennanto ti amin a turay ti tao.—Apocalipsis 19:15, 17, 18.

• Ikkatenna ti dakes a tattao. Ania ngarud ti mapasamak kadagidiay mangigaggagara nga agaramid iti dakes ken dida kayat ti agtulnog iti Dios? “Maikkatto dagiti dakes ditoy daga.”—Proverbio 2:22.

• Pukawenna ni Satanas ken dagiti demonio. Saanton a “maallilaw” ni Satanas ken dagiti demoniona dagiti nasion.—Apocalipsis 20:3, 10.

Ania ti kaipapanan amin dagitoy kadagiti agpaituray iti Pagarian ti Dios?

Kas Ari nga agturturayen idiay langit, ad-adunto nga amang ti aramiden ni Jesus ngem iti aniaman a maaramidan ti turay ti tao. Tulonganto dagiti 144,000 a kaduana nga agturay, a napili manipud iti sangatauan. (Apocalipsis 5:9, 10; 14:1, 3) Siguraduennanto a maaramid ti pagayatan ti Dios ditoy daga. Anianto ti aramiden ti Pagarian ti Dios kadagiti agnanaed iti daga?

• Ikkatenna ti sakit ken ipapatay. “Awanto ti residente a mangibaga: ‘Masakitak,’” ken “awanton ni patay.”—Isaias 33:24; Apocalipsis 21:4.

• Iyegna ti pudpudno a talna ken talged. “Saanto nga agpatingga ti talna dagiti annakmo,” ken “agtugawto ti tunggal maysa iti sirok ti ubasna ken iti sirok ti kayona a higos, ken awanto ti pagbutnganda.”—Isaias 54:13; Mikias 4:4.

• Mangipaay iti makapnek a trabaho. “Naan-anayto a tagiragsaken dagiti pinilik ti aramid ti imada. Didanto agbannog iti awan serserbina.”—Isaias 65:22, 23.

• Solbarenna dagiti problema iti aglawlaw. “Agragsakto ti let-ang ken ti natikag a daga, ket agrag-onto ti desierto ken agsabongto a kas iti safron.”—Isaias 35:1.

• Isurona kadagiti tattao dagiti aramidenda tapno agbiagda nga agnanayon. “Maaddaanto iti biag nga agnanayon dagidiay mangam-ammo kenka, ti maymaysa a pudno a Dios, ken ti imbaonmo, ni Jesu-Kristo.”—Juan 17:3.

Kayat ti Dios a maawatmo dagita a bendision. (Isaias 48:18) Ilawlawag ti sumaruno nga artikulo no ania ti aramidem itan tapno maysakanto kadagiti maaddaan iti nakasaysayaat a masanguanan.