Sungbat Dagiti Saludsod Maipapan iti Biblia
Maaddaantayto kadi iti maysa a gobierno a mangituray iti intero a lubong?
Panunotem no kasano a magunggonaan dagiti tattao iti kasta a kita ti gobierno. Adu ita ti agsagsagaba gapu iti nakaro a kinapanglaw, idinto ta nakabakbaknang ti dadduma. Ngem daytoy maysa a gobierno a mangiturayto iti intero a lubong ammona ti kasapulan dagiti iturayanna ket siguraduenna a maipaay dagita. Makapataud ngata dagiti tattao iti kasta a kita ti gobierno?—Basaem ti Jeremias 10:23.
Iti intero a pakasaritaan ti tao, saan a naipaay dagiti gobierno ti kasapulan dagiti iturayanda, nangruna dagiti napanglaw. Adda dagiti naulpit a gobierno. (Eclesiastes 4:1; 8:9) Ngem inkari ti Mannakabalin-amin a Dios a mangyeg iti gobierno a mangsukatto iti amin a gobierno ti tao. Ti Agturay iti dayta pudno nga aywananna dagiti tattao.—Basaem ti Isaias 11:4; Daniel 2:44.
Anianto ti aramiden ti Pagarian ti Dios?
Nangpili ni Jehova a Dios iti kasayaatan nga Agturay iti lubong—ti Anakna a ni Jesus. (Lucas 1:31-33) Idi adda ni Jesus ditoy daga, maragragsakan a tumulong kadagiti tattao. Kas maysa nga Ari, pagkaykaysaennanto dagiti tattao iti amin a nasion ken ikkatennanto ti amin a panagsagabada.—Basaem ti Salmo 72:8, 12-14.
Akseptaren kadi ti amin a tattao ni Jesus kas Agturay? Saan. Ngem naanus ni Jehova. (2 Pedro 3:9) Ipapaayanna dagiti tattao iti gundaway a mangawat ken Jesus kas Agturay. Asidegen nga ikkaten ni Jesus dagiti dakes a tattao ket iyegna ti sangalubongan a talna ken talged.—Basaem ti Mikias 4:3, 4.