Iti daytoy nga artikulo

•  Ania ti responsabilidad ti ama?

•  Kasano a naidumduma ti maysa nga ama?

•  Amma ken annak a babbai

•  Balakad para kadagiti amma

•   Sakbay a mayanak ti anakyo. No aniaka a klase ti asawa ita ipakitana no anianto a klase ti ama ti pagbalinam. Ti libro a Do Fathers Matter? kunana:

   “Ti ama a tumultulong iti masikog nga asawana a gumatang kadagiti suplay, kaduaenna nga agpadoktor, ken kitaenna ti resulta ti ultrasound wenno denggenna ti pitik ti puso ti maisiksikog ket dakdakkel ti posibilidadna a tumulong ken baketna inton mayanaken ti anakda.”

   “Diak kayat a marikna ni baketko nga agmaymaysa bayat ti panagsikogna isu nga inkagumaak a tulongan. Nagkaduakami pay a nangurnos iti kuarto ti baby-mi. Importante dayta a tiempo tapno makapagsaganakami sakbay ti pannakayanakna.”—James.

   Prinsipio ti Biblia: “Sapulenyo dagiti pagimbagan ti dadduma, saan la a dagiti bukodyo a pagimbagan.”—Filipos 2:4.

•   No mayanaken ti anakyo. Nadekdekketka iti anakmo no ubbaem ken kaay-ayammo. Tumulongka a mangaw-awir kenkuana. Adu ti maaramidam kas ama iti nasayaat a pannakapadakkel ti anakmo. Ti nasinged a relasionmo kenkuana ipakitana a napateg kenka ti anakmo.

   “Agkaradap, agay-ayam, ken ray-awem ti anakmo. Saanka unay a serioso. Laglagipem a sika kas nagannak ti umuna a pakasursuruan ti ubing iti ayat.”—Richard.

   Prinsipio ti Biblia: “Dagiti annak ket impatawid ni Jehova; ti bunga ti aanakan ket bendision.”—Salmo 127:3.

•   Bayat a dumakdakkel ti anakyo. Ipakita dagiti research a nalalaing iti eskuelaan dagiti ubbing a nadekket iti amada, bassit ti problemada iti emosion, ken basbassit ti posibilidad nga agdroga wenno agaramidda iti krimen. Isu nga ikagumaam ti maaddaan iti nasayaat a relasion iti anakmo.

   “Imbaga ti barok a ti kailiwnanto inton sumina ket ti panaginnestoriami bayat ti napaut a panagbiahemi wenno no mangmangankami. Dadduma kadagiti kapatgan a panagsaritami ket kadagiti tiempo a diak ninamnama. Napasamak dagita gapu ta kanayonkami nga agkadkadua.”—Dennis.

   Prinsipio ti Biblia: “Itultuloyyo ti agannad a naimbag a ti pannagnayo ket saan a kas kadagiti maag no di ket kas kadagiti masirib, nga usarenyo ti tiempoyo iti kasayaatan a pamay-an.”—Efeso 5:15, 16.

 Ekspektaren ti adu nga ipaay ti ama ti material a kasapulan ti pamiliana ken protektaranna ida, ket dagiti inna ti ad-adda a maseknan iti emosional a kasapulan ti pamilia. (Deuteronomio 1:31; Isaias 49:15) Iti dadduma a pamilia, mabalin nga aramiden ti ama wenno ina ti papel ti asawana. Nupay kasta, ibaga dagiti researcher nga adda naidumduma a maaramidan ti ama ken ina iti panangpadakkel iti annakda. a

 Inyestoria ni Judith Wallerstein, a maysa a family researcher, ti personal a kapadasanna a mangipakita iti dayta a punto. Insuratna: “Idi nadungpar iti kotse ti dose anyos a balasitangmi, kayatna a ni papana ti kaduana a lumugan iti ambulansia ta mas agtalek a maprotektaran ni papana iti dayta a situasion. Ngem idi addakamin iti ospital, kayatna nga agmalmalem nga addaak iti abayna tapno liwliwaek.” b

 “Maited ti ama ti kinatalged ken proteksion iti pamiliana a mabalin a marigatan ti ina a mangited nga is-isuna. Maiparikna met ti ina nga adda mangay-ayat ken makaawat kadagiti annakda no naimpusuan a dumngeg kadakuada. Agtinnulongda kas maysa a team.”—Daniel.

 Prinsipio ti Biblia: “Anakko, ipangagmo ti disiplina ni tatangmo, ken dimo sukiren ti instruksion ni nanangmo.”—Proverbio 1:8.

 Kas ama, isurom iti balasangmo no kasano ti rumbeng a panangtrato kenkuana dagiti lallaki. Masursurona dayta iti dua a pamay-an:

•   Babaen ti makitana a panangtratom iti inana. No ayatem ken respetuem ni baketmo, makita ti balasangmo dagiti kualidad a nasken a sapulenna iti agbalinto nga asawana.—1 Pedro 3:7.

•   Babaen ti makitana a panangtratom kenkuana. No respetuem ti balasangmo, isursurom met kenkuana a respetuenna ti bagina. Masursurona met a kasta ti ekspektarenna a panangtrato kenkuana dagiti lallaki.

   Ngem no kanayonmo a kritikaren ti balasangmo, bumaba ti panagkitana iti bagina ket mabalin nga agbirok ti atension iti sabali a lalaki, a saan met a pudno a maseknan kenkuana.

   “Ti balasang nga ay-ayaten ken supsuportaran ti amana ket saan a dagus a matnag ti riknana iti lalaki nga awanan kadagiti kualidad ti nasayaatto nga asawa.”—Wayne.