Mabasa Kadi ti Purgatorio iti Biblia?
Sungbat ti Biblia
Saan. Awan ti masarakan a sao a “purgatorio” iti Biblia, ken saan met nga isursuro ti Biblia a madalusan iti purgatorio ti kararua dagiti natay. a Kitaem ti isursuro ti Biblia maipapan iti basol ken ipapatay ken no kasano a maikontra dayta iti doktrina a purgatorio.
Ti panangipakita ti maysa a tao iti pammati iti dara ni Jesus ti mangdalus kenkuana manipud iti basol, saan a ti kaaddana iti ibagbagada a purgatorio. Kuna ti Biblia a “ti dara ni Jesus nga Anak [ti Dios] ugasannatayo iti amin a basol.” (1 Juan 1:7, Ti Baro a Naimbag a Damag Biblia) Ibagana pay a ni “Jesu-Cristo [ti] nangluc-at cadatayo cadagiti basbasoltayo iti darana met laeng.” (Apocalipsis 1:5, Ti Biblia, Philippine Bible Society) Inted ni Jesus “ti biagna a pangsubbot kadagiti adu a tattao” tapno mabayadan dagiti basolda.—Mateo 20:28, Ti Baro a Naimbag a Damag Biblia.
Awan puot dagiti natay. “Ammo dagiti sibibiag a mataydanto ngem awan ammo dagiti natay.” (Eclesiastes 9:5, Ti Baro a Naimbag a Damag Biblia) Awanen ti marikna dagiti natay. Saanda ngarud a makarikna iti ragsak ken saanda met nga agrigat iti ibagbagada a mangdalus nga apuy ti purgatorio.
No matay ti maysa a tao, saanen a madusa gapu kadagiti basolna. Kuna ti Biblia a “patay ti supapak ti basol” ken “no matay ti maysa a tao, mawayawayaan iti pannakabalin ti basol.” (Roma 6:7, 23, Ti Baro a Naimbag a Damag Biblia) Ti ipapatay ti naan-anay ken ultimo a dusa ti basol.
a Kuna ti libro nga Orpheus: A General History of Religions maipapan iti purgatorio: “Awan uray maysa a sao maipapan iti dayta ti nadakamat kadagiti Ebanghelio.” Kasta met, kuna ti New Catholic Encyclopedia: “Kas konklusion, ti doktrina ti Katoliko maipapan iti purgatorio ket naibatay iti tradision, saan nga iti Sagrado a Kasuratan.”—Maikadua nga Edision, Tomo 11, panid 825.
b Kitaem ti New Catholic Encyclopedia, Maikadua nga Edision, Tomo 11, panid 824.