Kuna ti Biblia a ni Jesus ket “napapatay iti lasag, ngem napagbiag [napagungar] iti espiritu.”—1 Pedro 3:18; Aramid 13:34; 1 Corinto 15:45; 2 Corinto 5:16.

 Ipakita a mismo ti sasao ni Jesus nga isu ket saan a mapagungar iti bagi nga addaan iti lasag ken dara. Imbagana nga itedna ti ‘lasagna maigapu iti biag ti lubong,’ kas subbot para iti amin a tattao. (Juan 6:51; Mateo 20:28) No innala manen ni Jesus ti nainlasagan a bagina idi napagungar, imbabawina met laeng dayta a daton a pangsubbot. Ngem saan a mapasamak daytoy ta kuna ti Biblia nga indatonna ti lasag ken darana a ‘namimpinsan.’—Hebreo 9:11, 12.

No napagungar ni Jesus nga addaan iti espiritu a bagi, apay ngarud a nakita dagiti adalanna?

•  Kabaelan dagiti espiritu a parsua ti maaddaan iti bagi a kas iti tao. Kas pagarigan, idi un-unana, nakipangan ken nakiinum pay ketdi dagiti anghel kadagiti tattao. (Genesis 18:​1-8; 19:​1-3) Ngem espirituda latta ken kabaelanda ti agpukaw iti imatang dagiti tattao. —Uk-ukom 13:15-​21.

•  Kalpasan a napagungar, temporario met a naaddaan ni Jesus iti bagi kas tao, kas iti inaramid idi dagiti anghel. Ngem kas espiritu a parsua, kabaelanna ti agparang ken agpukaw a dagus. (Lucas 24:31; Juan 20:19, 26) Saan nga agpapada dagiti nainlasagan a bagina kadagiti gundaway a panagparangna. Isu nga uray dagiti nadekket a gagayyem ni Jesus, nailasinda laengen babaen ti imbaga ken inaramidna.—Lucas 24:30, 31, 35; Juan 20:14-​16; 21:​6, 7.

•  Idi ni Jesus ket nagparang ken ni Tomas, ti bagina ket addaan iti sugsugat. Inaramidna daytoy tapno mapatibker ti pammati ni Tomas ta pagduaduaanna no nagungaren ni Jesus.—Juan 20:24-​29.