Wen. Ti Biblia, a nagkauna a libro iti sirib, ket mangipapaay iti sungbat dagiti napateg a saludsod iti biag ken makatulong tapno maliwliwaka ken mariknam a napategka. Usigem ti sumagmamano a saludsod a sungbatanna.

1.   Adda kadi Namarsua? Kuna ti Biblia a ti Dios ‘pinarsuana ti amin a bambanag.’ (Apocalipsis 4:11) Kas Namarsua, ammo ti Dios no ania ti kasapulantayo tapno sumayaat ti riknatayo ken mapnektayo iti biagtayo.

2.   Maseknan kadi kaniak ti Dios? Saan nga isursuro ti Biblia a ti Dios ket adayo iti sangatauan no di ket kastoy ti kunana: “Saan nga adayo iti tunggal maysa kadatayo.” (Aramid 17:27) Interesado ti Dios iti mapaspasamak kenka ken kayatnaka a tulongan tapno agballigika.—Isaias 48:17, 18; 1 Pedro 5:7.

3.   Kasano a sumayaat ti riknak no maam-ammok ti Dios? Pinarsuanatayo ti Dios nga addaan iti ‘naespirituan a panagkasapulan,’ ti nainkasigudan a tarigagay a mangammo iti kaipapanan ken panggep ti biag. (Mateo 5:3) Ti naespirituan a kasapulantayo ramanenna met ti panagtarigagay a mangam-ammo iti Namarsua kadatayo ken ti pannakigayyem kenkuana. Apresiaren ti Dios ti panangikagumaantayo a mangam-ammo kenkuana, ta kuna ti Biblia: “Umadanikayo iti Dios, ket isu umadaninto kadakayo.”—Santiago 4:8.

 Natakuatan ti minilion a tattao a simmayaat ti rikna ken nagbalin a makapnek ti biagda gapu iti pannakigayyemda iti Dios. No am-ammom ti Dios, dina kayat a sawen a saankan nga agproblema, ngem ti sirib a masarakan iti Biblia ket makatulong kenka a

•   Maaddaan iti naragragsak a biag ti pamilia.

•   Mangtagiragsak iti natalna a relasion kadagiti dadduma.

•   Mangsango kadagiti nagduduma a problema a kas iti depression, parikut iti kuarta, ken nakaro a sakit.

 Adu a relihion nga agus-usar iti Biblia ti saan a mangsursurot kadagiti pannursuro ti Biblia. Ngem ti pudno a relihion, a mangsursurot iti kuna ti Biblia, tulongannaka a mangam-ammo iti Dios.