Isuronatayo ti Kararag ti Apo no kasano ti agkararag ken no ania ti masapul nga ikararagtayo. Imbaga dayta ni Jesus idi kiniddaw dagiti adalanna: “Apo, isuronakami nga agkararag.” (Lucas 11:1) Ngem saan laeng a ti Kararag ti Apo, wenno ti Amami, ti kararag nga awaten ti Dios. a Imbes ketdi, inted dayta ni Jesus kas pagtuladan iti kararag a denggen ti Dios.

Iti daytoy nga artikulo

•  Ania ti linaon ti Kararag ti Apo?

•  Ania ti kaipapanan ti Kararag ti Apo?

•  Ti kadi panangikabesa iti Kararag ti Apo ti kakaisuna a pamay-an ti panagkararag?

•  Kasano koma ti panagkararagtayo?

•  Dadduma pay a kararag iti Biblia

 Ti Kararag ti Apo a mabasa iti Mateo 6:9-13, ket agsasabali ti pannakaibagana iti nagduduma a patarus ti Biblia. Dagitoy ti dua a pagarigan.

 Baro a Lubong a Patarus: “Amami nga adda iti langit, masantipikar koma ti naganmo. Umay koma ti Pagariam. Maaramid koma ti pagayatam ditoy daga, a kas sadi langit. Itedmo koma ti taraonmi ita nga aldaw; ken pakawanem koma dagiti utangmi, kas iti panangpakawanmi kadagiti nakautang kadakami. Dinakami iyeg iti sulisog, ken isalakannakami iti daydiay managdakdakes.”

 King James Version: “Amami, nga addaca sadi langit, madaydayaw coma ti Naganmo. Umay coma ti pagariam. Maaramid coma ti pagayatam, cas sadi langit casta met ditoy daga. Itedmo cadacam ita ti taraonmi iti inaldaw. Ket pacawanennacami cadagiti ut-utangmi, a cas met panamacawanmi cadagiti nacautang cadacami. Ket dinacam iyeg iti pannacasulisog, no di ket isalacannacami iti dakes.” b

 Dagiti pannursuro ni Jesus ket konektado iti dadduma a paset ti Kasuratan, isu nga ekspektarentayo a mailawlawag ti kaipapanan ti Kararag ti Apo iti dadduma a paset ti Biblia.

“Amami nga adda iti langit”

 Umiso laeng nga awagantayo ti Dios kas ‘Amatayo’ ta pinarsuanatayo ken inikkannatayo iti biag.—Isaias 64:8.

“Masantipikar koma ti naganmo”

 Masapul a maidaydayaw ti nagan ti Dios, a Jehova, ken maibilang a nasantuan, wenno sagrado. Tumultulong dagiti tattao iti pannakasantipikar ti nagan ti Dios no ibagbagada dagiti kualidadna ken dagiti kayatna a mapasamak.—Salmo 83:18; Isaias 6:3.

“Umay koma ti Pagariam”

 Ti Pagarian ti Dios ket nailangitan a gobierno a ni Jesus ti Ari. Insuro ni Jesus nga ikararagtayo nga iturayan koma daytoy a gobierno ti intero a daga.—Daniel 2:44; Apocalipsis 11:15.

“Maaramid koma ti pagayatam ditoy daga, a kas sadi langit”

 No kasano nga awan kinadakes wenno ipapatay idiay langit, pagayatan ti Dios nga agbiag iti agnanayon dagiti tattao iti natalna ken natalged a daga.—Salmo 37:11, 29.

“Itedmo koma ti taraonmi ita nga aldaw”

 Masapul a laglagipentayo nga agdepdependetayo iti Namarsua kadatayo nga ipaayna ti taraon ken dadduma a kasapulantayo tapno agbiagtayo.—Aramid 17:24, 25.

“Pakawanem koma dagiti utangmi, kas iti panangpakawanmi kadagiti nakautang kadakami”

 Iti daytoy a konteksto, ti sao nga ‘utang’ kaipapananna ti basol. (Lucas 11:4) Agbasbasoltayo amin ket kasapulantayo ti pammakawan. Ngem no kayattayo a pakawanennatayo ti Dios, masapul a situtulok a pakawanentayo met dagiti nakabasol kadatayo.—Mateo 6:14, 15.

“Dinakami iyeg iti sulisog, ken isalakannakami iti daydiay managdakdakes”

 Saannatayo a pulos sulisogen ni Jehova a Dios nga agaramid iti dakes. (Santiago 1:13) Ngem sulsulisogennatayo “daydiay managdakdakes,” ni Satanas a Diablo—a naawagan met “Mannulisog.” (1 Juan 5:19; Mateo 4:1-4) Kiddawentayo ken Jehova a tulongannatayo a saan a tumulok no masulisogtayo nga agsukir kenkuana.

 Insuro ni Jesus ti Kararag ti Apo kas pagtuladan. Saan a masapul nga ikabesa dayta a sao por sao. Sakbay unay nga insuro ni Jesus ti Kararag ti Apo, impakdaarna: “No agkararagkayo, diyo ulit-uliten ti isu met laeng a sasao.” (Mateo 6:7) Idi nangipaay iti pagtuladan a kararag iti sabali nga okasion, nagusar iti sabali a sasao.—Lucas 11:2-4.

 Ti kasayaatan a pamay-an a panagkararag ket ti panangusar iti napasnek ken bukod a sasao manipud iti pusotayo.—Salmo 62:8.

 Ti Kararag ti Apo ket nagsayaat a pagtuladan no kasano ti agkararag iti pamay-an a denggen ti Dios. Kitaem no kasano a maitunos dayta iti dadduma pay a bersikulo ti Biblia maipapan iti panagkararag.

•   Agkararag laeng iti Dios

   Teksto: “Ipakaammoyo koma iti Dios ti amin a kiddawyo babaen ti kararag ken panagpakaasi, agraman panagyaman.”—Filipos 4:6.

   Kaipapananna: Ti laeng Dios ti masapul a pakaiturongan dagiti kararagtayo—saan a ken Jesus, Maria, wenno dagiti santo. Ti panglukat a sasao ti Kararag ti Apo, nga “Amami,” isurona nga agkararagtayo laeng ken Jehova a Dios.

•   Ikararag ti bambanag a maitunos iti pagayatan ti Dios

   Teksto: “Uray ania ti dawatentayo maitunos iti pagayatanna, denggennatayo.”—1 Juan 5:14.

   Kaipapananna: Mabalintayo nga ikararag ti aniaman a maitunos iti pagayatan ti Dios. Insuro kadatayo ni Jesus no kasano kapateg ti pagayatan ti Dios ta inramanna iti Kararag ti Apo ti sasao a “maaramid koma ti pagayatam.” Maammuantayo ti pagayatan ti Dios para iti daga ken kadagiti tattao no adalentayo ti Biblia.

•   Ikararag dagiti pakaseknantayo

   Teksto: “Ipalladawmo ken Jehova ti dadagsenmo, ket saranayennakanto.”—Salmo 55:22.

   Kaipapananna: Maawatan ti Dios dagiti pakaseknantayo. Inraman ni Jesus iti Kararag ti Apo ti dadduma a personal a kiddaw. Isu a mabalintayo met nga ikararag ti inaldaw a material a kasapulantayo, ti panangiwanwan no agaramidtayo kadagiti importante a desision, ti tulong no adda problematayo, ken ti pammakawan kadagiti basoltayo. c