Tapno maammuantayo no kaano ti panungpalan ti lubong, napateg a maawatantayo no kasano a nausar iti Biblia ti termino a “lubong.” Ti Griego a sao a koʹsmos, a kaaduanna a naipatarus kas “lubong,” ket masansan a tumukoy iti sangatauan, nangruna dagiti tattao a nasukir iti Dios ken saan a mangar-aramid iti pagayatanna. (Juan 15:18, 19; 2 Pedro 2:5) No dadduma, tumukoy ti sao a koʹsmos kadagiti mangbukel iti kagimongan ti tattao, a pakairamanan ti komersio, politika, ken relihion.​—1 Corinto 7:​31; 1 Juan 2:​15, 16. a

Ania ti “panungpalan ti lubong”?

 Ti sasao a “panungpalan ti lubong,” a nagparang iti adu a patarus ti Biblia, ket mabalin met a maipatarus kas “panungpalan ti sistema ti bambanag,” wenno “panagpatingga ti panawen.” (Mateo 24:3; English Standard Version) Saan a tumukoy dayta iti pannakadadael ti daga wenno ti amin a tattao, no di ket tumukoy iti panungpalan dagiti mangbukel iti kagimongan ti tattao.​—1 Juan 2:​17.

 Isursuro ti Biblia a “magessatto [wenno, madadaelto] dagiti mismo a managaramid iti dakes” tapno naragsakto nga agbiag ditoy daga dagiti nasingpet a tattao. (Salmo 37:​9-​11) Mapasamakto dayta a pannakadadael bayat ti “dakkel a rigat,” nga agpatingga iti gubat ti Armagedon.​—Mateo 24:21, 22; Apocalipsis 16:14, 16.

Kaano ti panungpalan ti lubong?

 Kinuna ni Jesus: “Maipapan iti dayta nga aldaw ken oras awan ti asinoman a makaammo, uray dagiti anghel ti langlangit wenno uray ti Anak, no di laeng ti Ama.” (Mateo 24:36, 42) Innayonna a ti tiempo nga umay ti panungpalan ket di mapakpakadaan, “iti oras a saanyo nga ipagarup.”​—Mateo 24:44.

 Uray no saantayo a maammuan ti eksakto nga aldaw ken oras, nangted ni Jesus iti ragup a “pagilasinan,” wenno grupo dagiti paspasamak, nga agserbi kas tanda ti panawen nga agturong iti panungpalan ti lubong. (Mateo 24:​3, 7-​14) Tinukoy ti Biblia dayta a panawen kas “tiempo ti panungpalan,” ken ‘ti maudi nga al-aldaw.’​—Daniel 12:4; 2 Timoteo 3:​1-5.

Addanto pay kadi ti mabati kalpasan ti panungpalan ti lubong?

 Wen. Agtalinaedto ti daga, ta kuna ti Biblia a “saanto a mapagdiwengdiweng dayta agingga iti tiempo a di nakedngan, wenno iti agnanayon.” (Salmo 104:5) Ken mapnonto ti daga kadagiti tattao, kas iti ikarkari ti Biblia: “Dagiti nalinteg tagikuaendanto ti daga, ket agtaengdanto nga agnanayon iti dayta.” (Salmo 37:29) Pagbalinento ti Dios a posible dagiti kasasaad nga orihinal a pinanggepna:

•   Paraiso.​—Isaias 35:1; Lucas 23:43.

•   Kinatalged ken kinarang-ay.​—Mikias 4:4.

•   Naragsak ken makapnek a trabaho para iti amin.​—Isaias 65:21-​23.

•   Awan ti sakit ken panaglakay wenno panagbaket.​—Job 33:25; Isaias 33:24.